ខេត្តបន្ទាយមានជ័យ ៖ គិតមកដល់ថ្ងៃទី១៦ ខែធ្នូ ឆ្នាំ២០២៥ ជនភៀសសឹកបានកើនឡើងដល់ជាង៥ម៉ឺនគ្រួសារ ស្មើនឹងជាង១៧ម៉ឺនាក់ ក្រោយពេលទាហានថៃបន្តបាញ់មកលើភូមិសាស្ត្រខេត្តមិនឈប់ឈរ ហើយសមរភូមិក្ដៅគឺភូមិព្រៃចាន់ ភូមិជោគជ័យ…
ខេត្តបន្ទាយមានជ័យ ៖ គិតមកដល់ថ្ងៃទី១៦ ខែធ្នូ ឆ្នាំ២០២៥ ជនភៀសសឹកបានកើនឡើងដល់ជាង៥ម៉ឺនគ្រួសារ ស្មើនឹងជាង១៧ម៉ឺនាក់ ក្រោយពេលទាហានថៃបន្តបាញ់មកលើភូមិសាស្ត្រខេត្តមិនឈប់ឈរ ហើយសមរភូមិក្ដៅគឺភូមិព្រៃចាន់ ភូមិជោគជ័យ និងបឹងត្រកួន ឃុំអូរបីជាន់ ស្រុកអូរជ្រៅ ។
យោងតាមរបាយការណ៍របស់រដ្ឋបាលខេត្ត រហូតមកដល់ថ្ងៃទី១៦ ខែធ្នូ ឆ្នាំ២០២៥ ជនភៀសសឹកកើនឡើងដល់ចំនួន ៥៣ ០៥៥គ្រួសារ ស្មើនឹងចំនួន១៧៨ ៣០២នាក់ ក្នុងនោះស្រី៩២ ១៥៨នាក់ និងកុមារ ៥៣ ៩៤៦នាក់ ដែលស្នាក់នៅតាមតំបន់ភៀសសឹក ឬកន្លែងសុវត្ថិភាពចំនួន៣៤កន្លែង នៅតាមវត្តអារាម និងកន្លែងផ្សេងៗទៀត ។
គួររំឭកថា ភាគីសៀមបានបើកការបាញ់ប្រហារមកលើកម្ពុជា ដោយប្រើប្រាស់អាវុធតូចធំគ្រប់ប្រភេទ គ្រាប់ផ្លោង ឬកាំភ្លើងត្បាល់ និងយន្តហោះចម្បាំង F-១៦ ទម្លាក់គ្រាប់បែកក្នុងភូមិសាស្ត្រខេត្តបន្ទាយមានជ័យ បណ្តាលឱ្យខូចខាតផ្ទះសម្បែង ទ្រព្យសម្បត្តិប្រជាពលរដ្ឋ និងរដ្ឋ រងការខ្ទេចខ្ទី និងបង្កការភ័យខ្លាចយ៉ាងខ្លាំង ។
រហូតមកដល់ពេលនេះ ភាគីសៀមនៅតែបន្តបាញ់ចូលក្នុងភូមិសាស្ត្រខេត្តបន្ទាយមានជ័យ នៅតាមបណ្តាស្រុក ក្រុង ជាប់ព្រំដែនកម្ពុជា-ថៃ ហើយអាជ្ញាធរខេត្ត និងស្រុក ក្រុងបានជម្លៀសប្រជាពលរដ្ឋទៅរកតំបន់សុវត្ថិភាព ទូទាំងខេត្ត ។
បិទទ្វារសាលារៀន៣២៩កន្លែង ប៉ះពាល់សិស្សជិត១០ម៉ឺននាក់
សាលារៀនចំនួន៣២៩កន្លែងត្រូវបានបិទទ្វារ និងប៉ះពាល់ដល់សិស្សជិត១០ម៉ឺននាក់ គិតរហូតដល់ថ្ងៃទី១៦ ខែធ្នូ ឆ្នាំ២០២៥ ។
លោក ឈូ ប៊ុនរឿង ប្រធានមន្ទីរអប់រំ យុវជន និងកីឡាខេត្ត ថ្លែងថា ក្រោយពីទាហានថៃបើកការបាញ់ប្រហារមក ខេត្តបន្ទាយមានជ័យបានបិទទ្វារសាលារៀនចំនួន៣២៩កន្លែង ប៉ះពាល់ដល់សិស្សសរុបចំនួន ៩៨ ៤៤៤នាក់ ក្នុងនោះមានសាលារៀនរដ្ឋ២៤៥កន្លែង ប៉ះពាល់សិស្ស ៧៤ ០៥៩នាក់(ស្រី ៣៦ ៩៥២នាក់) សាលារៀនឯកជន៨៤កន្លែង ប៉ះពាល់សិស្ស ២៤ ៣៨៥នាក់(ស្រី ១២ ៣២៤នាក់) ។
លោកប្រធានមន្ទីរបញ្ជាក់ថា តំបន់ដែលត្រូវបានបិទទ្វារសាលារៀនរដ្ឋ និងប៉ះពាល់ដល់សិស្សមិនបានចូលសិក្សា មានសាលាមត្តេយ្យចំនួន៤ សាលាបឋមសិក្សាចំនួន១៩៦ អនុវិទ្យាល័យ៣១ វិទ្យាល័យ១៤ និងសាលារៀនឯកជន សាលាបឋមសិក្សា៦០ អនុវិទ្យាល័យ៧ និងវិទ្យាល័យ១៧ ។
លោក ឈូ ប៊ុនរឿង បានបញ្ជាក់ថា មានសិស្សខ្លះដែលភៀសខ្លួនជាមួយឪពុកម្តាយទៅតំបន់សុវត្ថិភាព នៅទីវត្តអារាម និងសាលារៀន បានចូលសិក្សាជាធម្មតានៅតំបន់សុវត្ថិភាព ដូចជានៅក្រុងសិរីសោភ័ណ ស្រុកមង្គលបុរី ស្រុកព្រះនេត្រព្រះ និងស្រុកមួយចំនួនទៀត ដែលនៅឆ្ងាយពីព្រំដែន ។
កាលពីថ្ងៃទី១៥ ខែធ្នូ ឆ្នាំ២០២៥ យន្តហោះF-១៦ បានទម្លាក់គ្រាប់បែក២គ្រាប់នៅស្រុកព្រះនេត្រព្រះ ធ្វើឱ្យសិស្សកំពុងរៀននៅក្នុងសាលា រត់ចែកផ្លូវគ្នាដោយការរន្ធត់ចិត្ត ៕
ចែករំលែកព័តមាននេះ