រាជធានីភ្នំពេញ ៖ ប្រតិកម្មទៅនឹងកាសែតថៃ មិនមែនតែមន្ត្រីទូតរុស្ស៊ីទេ ជុំវិញការចុះផ្សាយថា មានពលរដ្ឋរុស្ស៊ីស៊ីឈ្នួលធ្វើទាហាននៅកម្ពុជា និងជនបរទេសមួយចំនួនកំពុងចូលរួមប្រយុទ្ធនៅកម្ពុជា ។ សម្ដេចតេជោ ហ៊ុន…
រាជធានីភ្នំពេញ ៖ ប្រតិកម្មទៅនឹងកាសែតថៃ មិនមែនតែមន្ត្រីទូតរុស្ស៊ីទេ ជុំវិញការចុះផ្សាយ
ថា មានពលរដ្ឋរុស្ស៊ីស៊ីឈ្នួលធ្វើទាហាននៅកម្ពុជា និងជនបរទេសមួយចំនួនកំពុងចូលរួមប្រយុទ្ធនៅកម្ពុជា ។ សម្ដេចតេជោ ហ៊ុន សែន ប្រធានព្រឹទ្ធសភា បានបដិសេធថា កម្ពុជាពុំមានជនជាតិរុស្ស៊ីឬជនបរទេសផ្សេង ចូលរួមការប្រយុទ្ធលើសមរភូមិ ឬធ្វើជាទីប្រឹក្សាសម្រាប់កងទ័ពកម្ពុជាឡើយ ។
សម្ដេចតេជោ ហ៊ុន សែន បានបដិសេធចំពោះការផ្សព្វផ្សាយរបស់សារព័ត៌មានថៃបែបនេះ នៅលើគេហទំព័ររបស់សម្ដេចផ្ទាល់កាលពីថ្ងៃទី១៦ ខែធ្នូ ឆ្នាំ២០២៥ ។ សម្ដេចតេជោ ហ៊ុន សែន មានប្រសាសន៍ថា ប៉ុន្មានថ្ងៃមកនេះមានការចុះផ្សាយដោយសារព័ត៌មានថៃមួយចំនួន ដោយបានលើកឡើងថាមានទាហានរុស្ស៊ី និងជនបរទេសមួយចំនួនកំពុងចូលរួមប្រយុទ្ធនៅកម្ពុជា ។
ដើម្បីរក្សានូវសេចក្តីថ្លៃថ្នូររបស់កម្ពុជា ក៏ដូចជារបស់រុស្ស៊ី និងជនបរទេសផ្សេងទៀតដែលត្រូវបានគេចោទ ខ្ញុំសូមបញ្ជាក់ជូនថា កម្ពុជាពុំមានជនជនជាតិរុស្ស៊ី ឬជនជាតិបរទេសផ្សេងទៀតចូលរួមការប្រយុទ្ធលើសមរភូមិ ឬធ្វើជាទីប្រឹក្សាយោធាសម្រាប់កងទ័ពកម្ពុជានោះឡើយ ។
យើងមិនមានយោធាបរទេសលើទឹកដីកម្ពុជា ចាប់តាំងពីអ៊ុនតាក់ដកចេញចេញពីកម្ពុជានាឆ្នាំ១៩៩៣មកម្ល៉េះ ។ យើងទទួលស្គាល់ថាយើងធ្លាប់មានយោធាបរទេសចូលមកដើម្បីធ្វើសមយុទ្ធចម្រុះជាតិសាសន៍ ឬទ្វេភាគីនៅលើទឹកដីកម្ពុជា ពិសេសកងទ័ពជើងទឹកបរទេសដែលមកតាមច្រកសមុទ្រខេត្តព្រះសីហនុ ដែលនេះជាទម្លាប់ធម្មតាដែលប្រទេសផ្សេងទៀតធ្លាប់បានធ្វើដូចគ្នា ក្នុងក្របខណ្ឌនៃកិច្ចសហការក្នុងវិស័យការពារជាតិ ។
យើងក៏ទទួលស្គាល់ផងដែរថា ពេលនេះមានជនជាតិបរទេសជាច្រើនជាតិសាសន៍កំពុងស្នាក់នៅកម្ពុជា ដែលជាទេសចរ វិនិយោគិនអ្នកបច្ចេកទេស អ្នកធ្វើការឲ្យក្រុមហ៊ុនបរទេស ឬក្នុងស្រុក។ល។ តែអ្នកទាំងនោះមិនពាក់ព័ន្ធជាមួយវិស័យយោធាឬការប្រយុទ្ធនោះឡើយ ។ បើតាមសម្តេចតេជោ ហ៊ុន សែន ថា ចាប់តាំងពីអាជ្ញាធរបណ្តោះអាសន្ននៃអង្គការសហប្រជាជាតិប្រចាំកម្ពុជា ឬអ៊ុនតាក់ (UNTAC) ត្រូវបានដកចេញពីកម្ពុជានៅឆ្នាំ១៩៩៣មក កម្ពុជាពុំមានយោធាបរទេសណាម្នាក់នៅលើទឹកដីរបស់ខ្លួនឡើយ ។ ប៉ុន្តែសម្តេចតេជោទទួលស្គាល់ថា ធ្លាប់មានយោធាបរទេសចូលមកដើម្បីធ្វើសមយុទ្ធចម្រុះជាតិសាសន៍ ឬទ្វេភាគីនៅលើទឹកដីកម្ពុជា ពិសេសកងទ័ពជើងទឹកបរទេស ដែលចូលតាមច្រកសមុទ្រខេត្តព្រះសីហនុ ។
ការធ្វើសមយុទ្ធយោធា បើតាមសម្តេចតេជោហ៊ុន សែន គឺជាទម្លាប់ធម្មតាដែលប្រទេសផ្សេងទៀតធ្លាប់បានធ្វើដូចគ្នា ក្នុងក្របខណ្ឌនៃកិច្ចសហប្រតិបត្តិការក្នុងវិស័យការពារជាតិ ។សូមជម្រាបថា ស្ថានទូតរុស្ស៊ីប្រចាំប្រទេសថៃ នៅថ្ងៃទី១៥ ខែធ្នូ ឆ្នាំ២០២៥ បានច្រានចោលការចុះផ្សាយរបស់ប្រព័ន្ធផ្សព្វផ្សាយថៃមួយចំនួនដែលថា មានទាហានរុស្ស៊ីស៊ីឈ្នួលចូលរួមប្រយុទ្ធនៅក្នុងជម្លោះព្រំដែនកម្ពុជា-ថៃ។ ចំណែកឯកអគ្គរដ្ឋទូតរុស្ស៊ីប្រចាំកម្ពុជា ឯកឧត្តម Anatoly Boravik នៅថ្ងៃទី១៦ ខែធ្នូ ឆ្នាំ២០២៥ ក៏បានច្រានចោលព័ត៌មាននេះដូចគ្នា ។
ចំពោះរុស្ស៊ី ការចោទប្រកាន់ដោយគ្មានមូលដ្ឋានច្បាស់លាស់បែបនេះ គឺបានរំលោភបំពានដល់សិទ្ធិពលរដ្ឋខ្លួន និងប៉ះពាល់ដល់ទំនាក់ទំនងជាប្រពៃណីជាមួយកម្ពុជា និងថៃ ។ អ្វីដែលទីក្រុងមូស្គូចង់ឃើញ និងចង់បានពេលនេះ គឺការចរចាស្វែងរកដំណោះស្រាយដោយសន្តិវិធី ដើម្បីបិទបញ្ចប់ជម្លោះព្រំដែនរវាងប្រទេសជិតខាងទាំងពីរ កម្ពុជា-ថៃ ៕
ចែករំលែកព័តមាននេះ