ជំងឺមហារីកមាត់ស្បូនអាចការពារបាន! នាំកូនស្រីអាយុ ៩-១៤ឆ្នាំ ទៅចាក់វ៉ាក់សាំងការពារពេញមួយជីវិតឥឡូវនេះ
- ភ្នំពេញ
រាជធានីភ្នំពេញ ៖ កុំឱ្យខកខានឱកាសមាសនេះឱ្យសោះ! ក្រសួងសុខាភិបាល អំពាវនាវឱ្យមាតាបិតានាំកូនស្រីអាយុ ៩-១៤ ឆ្នាំ ទៅចាក់វ៉ាក់សាំង HPV ការពារជំងឺមហារីកមាត់ស្បូនពេញមួយជីវិត ។
ជាក់ស្តែងក្រសួងសុខាភិបាលនៃព្រះរាជាណាចក្រកម្ពុជា បានប្រកាសនារសៀលថ្ងៃទី១១ ខែវិច្ឆិកានេះថា ៖ ថ្ងៃទី១០ ខែវិច្ឆិកា ឆ្នាំ២០២៦ លោកជំទាវសាស្ត្រាចារ្យ អ៊ឹម សិទ្ធិការ្យ រដ្ឋលេខាធិការ តំណាងឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល បានចូលរួមជាអធិបតីក្នុងពិធីបើកយុទ្ធនាការសុខាភិបាល «ផ្តល់ថ្នាំបង្ការជំងឺមហារីកមាត់ស្បូនដល់កុមារីអាយុពី ៩ ដល់ ១៤ឆ្នាំ» នៅទូទាំងព្រះរាជាណាចក្រកម្ពុជា ។
ក្នុងពិធីប្រកាសបើកយុទ្ធនាការផ្តល់ថ្នាំបង្ការជំងឺមហារីកមាត់ស្បូន ដល់កុមារីអាយុពី ៩ ដល់ ១៤ឆ្នាំ នៅទូទាំងព្រះរាជាណាចក្រកម្ពុជា លោកជំទាវសាស្ត្រាចារ្យរដ្ឋលេខាធិការ បានពាំនាំអនុសាសន៍សំខាន់ៗរបស់ឯកឧត្តមសាស្ត្រាចារ្យ រដ្ឋមន្ត្រី ដោយអំពាវនាវដល់គ្រប់ភាគីពាក់ព័ន្ធដូចតទៅ ៖
ក-មន្ទីរសុខាភិបាល នៃរដ្ឋបាលរាជធានី ខេត្តទាំង២៥ និងមន្ត្រីសុខាភិបាលគ្រប់លំដាប់ថ្នាក់ ត្រូវរៀបចំផែនការអនុវត្តឱ្យបានច្បាស់លាស់តាមដំណាក់កាលនីមួយៗ ពង្រឹងការសម្របសម្រួល ផ្សព្វផ្សាយសម្ភារអប់រំសុខភាព (វីដេអូ និងសារសម្លេង) និងធានាការផ្តល់សេវាចាក់វ៉ាក់សាំងប្រកបដោយគុណភាព សុវត្ថិភាព និងសមធម៌ ព្រមទាំងតាមដានវឌ្ឍនភាព និងលទ្ធផលនៃការអនុវត្តឱ្យបានជាប្រចាំ ។
ខ-អាជ្ញាធររាជធានី ខេត្ត និងអាជ្ញាធរមូលដ្ឋានគ្រប់លំដាប់ថ្នាក់ ព្រមទាំងក្រសួងអប់រំ យុវជន និងកីឡា មន្ទីរអប់រំ យុវជន និងកីឡា និងគណៈគ្រប់គ្រងសាលាបឋមសិក្សា និងអនុវិទ្យាល័យទាំងសាធារណៈ និងឯកជន សូមបន្តចូលរួមសហការគាំទ្រយ៉ាងសកម្ម ក្នុងការផ្សព្វផ្សាយ កំណត់អត្តសញ្ញាណ និងកៀរគរកុមារី ដែលមានអាយុគោលដៅទាំងអស់ ជាពិសេសកុមារីដែលមិនបានចូលរៀន ឬគ្មានឱកាសទទួលសេវាតាមសាលារៀន ឱ្យមកទទួលវ៉ាក់សាំងនៅមណ្ឌលសុខភាព ឬទីតាំងផ្តល់ថ្នាំបង្ការតាមសហគមន៍។
គ-មាតាបិតា និងអាណាព្យាបាល សូមចូលរួមសហការ និងនាំកូនស្រីដែលមានអាយុស្របតាមលក្ខខណ្ឌកំណត់ មកទទួលវ៉ាក់សាំង HPV នៅតាមសាលារៀន ឬមណ្ឌលសុខភាព តាមការណែនាំរបស់មន្ត្រីសុខាភិបាល ដោយកុំឱ្យកុមារីណាម្នាក់ខកខានឱកាសទទួលបានការការពារដ៏មានតម្លៃពេញមួយជីវិតនេះ ។
ឃ-ដៃគូអភិវឌ្ឍន៍ និងអង្គការពាក់ព័ន្ធទាំងអស់ សូមបន្តផ្តល់ការគាំទ្រផ្នែកបច្ចេកទេស ហិរញ្ញវត្ថុ និងការកសាងសមត្ថភាព ដើម្បីធានានិរន្តរភាពនៃការផ្តល់វ៉ាក់សាំង HPV និងការពង្រឹងកម្មវិធីជាតិផ្តល់ថ្នាំបង្ការ។
បន្ថែមពីនេះ លោកជំទាវសាស្ត្រាចារ្យ បានកត់សម្គាល់ និងមានប្រសាសន៍បញ្ជាក់បន្ថែមថា ទន្ទឹមគ្នានឹងយុទ្ធនាការផ្តល់ថ្នាំបង្ការជំងឺមហារីកមាត់ស្បូន យើងមិនត្រូវភ្លេចការផ្តល់ថ្នាំបង្ការជាប្រចាំទេ ដោយត្រូវបន្តពង្រឹង និងបង្កើនអត្រាគ្របដណ្តប់ នៃការចាក់វ៉ាក់សាំងជាប្រចាំ ៕
ចែករំលែកព័តមាននេះ