តើប្រទេសណានៅក្នុងក្រុមប្រទេសនិយាយភាសាបារាំង ដែលមានទំនាក់ទំនងពាណិជ្ជកម្មធំៗជាមួយកម្ពុជា ?
- ភ្នំពេញ
នៅពេលដែលកម្ពុជាកំពុងតែរៀបចំខ្លួនធ្វើជាម្ចាស់ផ្ទះនៃកិច្ចប្រជុំហ្វ្រង់កូហ្វូនីលើកទី២០នៅរាជធានីភ្នំពេញនៅចុងសប្តាហ៍នេះ និងដើមសប្តាហ៍ក្រោយ ប្រទេសបីដែលមានទំនាក់ទំនងពាណិជ្ជកម្មលេចធ្លោរជាមួយកម្ពុជា គឺវៀតណាម កាណាដា និង
បារាំង ។
តាមស្ថិតិដែលប្រកាសដោយអគ្គនាយកដ្ឋានគយ និងរដ្ឋាករកម្ពុជា ដែលបានចេញកាលពីថ្ងៃទី១០ ខែវិច្ឆិកា ឆ្នាំ២០២៦ បានឲ្យដឹងថា វៀតណាមដែលជាប្រទេសជិតខាងកម្ពុជាផងនោះ គឺមានទំនាក់ទំនងពាណិជ្ជកម្មធំជាងគេ ។ នៅក្នុងរយៈពេល១០ខែនៃឆ្នាំ២០២៦ ពាណិជ្ជកម្មកម្ពុជា និងវៀតណាមមានទំហំសរុប៧,១៦ពាន់លានដុល្លារកើនឡើង៨,៨ភាគរយ ដោយនៅក្នុងនោះ កម្ពុជានាំចេញ៣,៤ពាន់លានដុល្លារ កើនឡើង៨,៤ ភាគរយ ហើយនាំចូលមានតម្លៃ៣,៧៦ពាន់លានដុល្លារកើនឡើង៩,២ភាគរយ ។
ប្រភពដដែលបានបន្តថា សម្រាប់ពាណិជ្ជកម្មកម្ពុជា និងកាណាដាវិញ ពីខែមករាដល់ខែតុលា ឆ្នាំ២០២៦ មានតម្លៃសរុប១,២២ពាន់លានដុល្លារកើនឡើង៨,៣ភាគរយ នៅក្នុងនោះកម្ពុជានាំចេញទៅកាណាដាមានតម្លៃ១,១៤ពាន់លានដុល្លារ កើនឡើង៧,២ ភាគរយ ហើយកម្ពុជានាំចូលមកវិញមានតម្លៃ៧៥,៥លានដុល្លារប៉ុណ្ណោះ តែមានកំណើន២៧,៨ភាគរយ ។
ដោយឡែក សម្រាប់ទំហំពាណិជ្ជកម្មកម្ពុជា និងបារាំងវិញនៅក្នុងរង្វង់១០ខែនៃឆ្នាំ២០២៦នេះ ប្រទេសទាំងពីរមានពាណិជ្ជកម្មទ្វេភាគីសរុបជិត៥៦១លានដុល្លារ កើនឡើងជិត១៦ភាគរយ ។
កម្ពុជានាំចេញទៅបារាំង៤៣១,៤លានដុល្លារកើន១២,៦ភាគរយ ហើយនាំចូលមកវិញមានតម្លៃជាង១២៩លានដុល្លារកើនឡើង២៨,៤លានដុល្លារ ។
ចែករំលែកព័តមាននេះ