សង្គ្រាមអ៊ុយក្រែន ៖ ប្រធានាធិបតីអ៊ុយក្រែន លោកវ៉ូឡូឌីមៀរ ហ្សេឡេនស្គី និយាយកាលពីថ្ងៃទី១០ វិច្ឆិកា ថា លោកមានការពេញចិត្ត ក្រោយមានការផ្លាស់ប្ដូរជំហរក្នុងការចរចាជាមួយរុស្ស៊ី ដែលត្រូវបន្តទៀត នាថ្ងៃទី១១ វិច្ឆិកា នៅក្រុងអាប៊ូដាប៊ី ប៉ុន្តែលោកទទូចលើភាពចាំបាច់នៃការធានាសន្តិសុខសម្រាប់ប្រទេសលោក ។
ក្រុងគៀវ និងក្រុងមូស្គូ ចាប់ផ្ដើមកាលពីថ្ងៃទី១០ វិច្ឆិកា ការចរចា ក្រោមការធ្វើអាជ្ញាកណ្ដាលរបស់អាមេរិក នៅក្រុងអាប៊ូដាប៊ី ជាមួយក្ដីសង្ឃឹមធ្វើឲ្យមានការជឿនលឿនទៅរកដំណោះស្រាយជម្លោះហើយ បើតាមក្រុងវ៉ាស៊ីនតោនថា នឹងធ្វើការលើក្របខណ្ឌថ្មីនៃសន្តិសុខដែលបណ្ដាប្រទេសអឺរ៉ុបនឹងចូលរួមដែរ ។
នេះជាការចរចាលើកដំបូង ចាប់តាំងពីខែកុម្ភៈ មករវាងគូសត្រូវទាំង២ ក្រោយការចរចាត្រូវជាប់គាំងពេលដែលក្រុងវ៉ាស៊ីនតោនជាប់ផ្ដោតតែលើសង្គ្រាមនៅអ៉ីរ៉ង់ ។ យោងតាមលោកហ្សេឡេនស្គីថា ថ្ងៃទី១១ វិច្ឆិកា ជាថ្ងៃដែលអាចលើកពីបណ្ដាវិធានការ បញ្ឈប់ការវាយប្រហារទាក់ទិននឹងថាមពល និងនៅសមុទ្រខ្មៅ ។ ទោះបីយ៉ាងណា នៅលើទីលានវិញ ការវាយប្រហារគ្នាទៅវិញទៅមកនៅបន្តនាំឲ្យមានការភ័យខ្លាច ជាពិសេសរដូវរងាដែលគ្មានអ្វីកម្ដៅ ដាច់ភ្លើងដាច់ទឹក សម្រាប់ពលរដ្ឋអ៊ុយក្រែនច្រើនលាននាក់ ។
នាថ្ងៃទី១០ វិច្ឆិកា ការវាយប្រហាររបស់រុស្ស៊ីលើអ៊ុយក្រែន បណ្ដាលឲ្យមនុស្សស្លាប់៣នាក់ នៅទីក្រុងឌីនីប្រូ ហើយមនុស្សម្នាក់ទៀតស្លាប់នៅក្រុងអូដេសា ។ នេះបើតាមអាជ្ញាធរមូលដ្ឋាន ។ ខាងរុស្ស៊ីវិញ អភិបាលក្រុងឡេនីន ក្រាដ លោកអាឡិចសាន់ដ្រ៍ដ្រូសដេនកូអា រៀបរាប់នាព្រឹកថ្ងៃទី១១ វិច្ឆិកា ពីការវាយប្រហារខ្លាំងក្លា ដោយហ្វូងដ្រូនអ៊ុយក្រែន លើតំបន់នោះដែលមានជាពិសេសកំពង់ផែប្រេងកាតសំខាន់របស់រុស្ស៊ី គឺកំពង់ផែ OUST LOUGA ជាប់ឈូងសមុទ្រហ្វាំងឡង់ ។ ដ្រូនដល់១៤១គ្រឿង ត្រូវកម្ទេច។
ចំពោះការចរចាថ្ងៃដំបូងប្រធានាធិបតីអ៊ុយក្រែនលើកឡើងថា វិជ្ជមាន ។ លោកគូសបញ្ជាក់ នាថ្ងៃទី១០ វិច្ឆិកា ថា ខ្ញុំមើលឃើញការផ្លាស់ប្ដូរនានា ។ ខ្ញុំពេញចិត្តចំពោះអ្វីដែលបានដឹង ។ យើងនឹងឃើញនូវអ្វីដែលអាចធ្វើបាន ។ ក្នុងការចរចា គេបានលើកពីបញ្ហាគន្លឹះនៃដែនដី ។ ពេលដែលក្រុងមូស្គូទាមទារឲ្យដកកងទ័ពអ៊ុយក្រែនចេញពីតំបន់ដុនបាស់ភាគខាងកើតប្រទេស លោកហ្សេឡេនស្គីអះអាងថា ក្រុងគៀវត្រូវការឲ្យមានការធានាសន្តិសុខពិសេសចំពោះរឿងនេះ។
លោកហ្សេឡេនស្គីបន្តថា លទ្ធភាពនៃការដោះដូរឈ្លើយសឹកគ្នាក្នុងចំនួនច្រើន រវាងក្រុងគៀវ និងក្រុងមូស្គូក៏លើកឡើងដែរ ក្នុងការចរចាថ្ងៃទី១០ វិច្ឆិកា ។ រដ្ឋមន្ត្រីការបរទេសអាមេរិកចាត់ទុកការចរចាថ្ងៃទី១០ វិច្ឆិកា ថា ស្ថាបនាបំផុត ហើយលោកក៏អះអាងដែរថា ទិសដៅរបស់អាមេរិក គឺចង់ពង្រីករូបភាបនៃការចរចា ឲ្យបណ្ដាប្រទេសអឹរ៉ុបចូលរួមដែរ។ រហូតមកទល់ពេលនេះ
រុស្ស៊ីស្វែងរករារាំងអឹរ៉ុបមិនឲ្យចូលរួមចរចា ៕
ចែករំលែកព័តមាននេះ