ទីក្រុងវ៉ាស៊ីនតោន៖ ក្រុមប្រជាធិបតេយ្យនៅអាមេរិកកំពុងតែមួរម៉ៅក្ដៅក្រហាយយ៉ាងខ្លាំងដែលរដ្ឋសភារារាំងមិនឱ្យដកតំណែងរដ្ឋមន្ត្រីការពារជាតិ លោកភីត ហេកសិត ដែលជាអ្នកផ្ដួចផ្ដើមសង្គ្រាមអ៊ីរ៉ង់ និងនាំឱ្យគណបក្សសាធារណរដ្ឋទទួលបរាជ័យនៅក្នុងការបោះឆ្នោតសភា។ ករណីនេះចូលលក្ខណៈបាតឆ្នាំងមិនក្ដៅ បែរជាក្ដៅគ្របឆ្នាំងមុន។ តាមពិត គួរណាស់គណបក្សប្រជាធិបតេយ្យសប្បាយចិត្តដែលខ្លួនទទួលជ័យជម្នះ និងដណ្ដើមបានសំឡេងភាគច្រើនទាំងនៅរដ្ឋសភា និងព្រឹទ្ធសភា។
អ្នកតំណាងរាស្ត្រអាមេរិកាំងម្នាក់ឈ្មោះអាឡិចសាន់ឌ្រា អូកាស៊ីអូ គ័រតេស (Alexandria Ocasio-Cortez) ថ្លែងថាក្រុមអ្នកតំណាងរាស្ត្រចាំបាច់ត្រូវតែស្រុះដៃគ្នាដើម្បីបំពេញការងាររបស់ខ្លួន។ ការថ្លែងដូចនេះបន្ទាប់ពីអ្នកតំណាងរាស្ត្រគណបក្សប្រជាធិបតេយ្យ១១រូបអវត្តមានពីកន្លែងប្រជុំនៅពេលត្រូវបោះឆ្នោតដកតំណែងលោកភីត ហេកសិត។ អវត្តមាននេះប្រៀបបាននឹងការសម្លាប់កិច្ចខិតខំប្រឹងប្រែងដើម្បីដកតំណែងរបស់លោកដូច្នេះដែរ។ អ្នកតំណាងរាស្ត្រប្រចាំរដ្ឋញូយ៉ករូបនេះថ្លែងថាប្រជាជនបោះឆ្នោតឱ្យយើងមកអង្គុយនៅអាសនៈនេះដើម្បីឱ្យយើងបំពេញការងាររបស់យើង។ ខ្ញុំមិនដឹងថាតើអ្នកដែលអវត្តមាននោះមានបញ្ហាសុខភាពពិតមែន ឬក៏មានអ្វីផ្សេង។
អ្នកតំណាងរាស្ត្ររូបនេះសង្ឃឹមថាសភាខង់ហ្ក្រែសនឹងមិនរង់ចាំរហូតដល់មានកិច្ចប្រជុំនីតិកាលថ្មីដើម្បីដកតំណែងលោកហេកសិតទេ។ កាលពីយប់មិញ រដ្ឋសភាបោះឆ្នោតដោយសំឡេង២១១ជំទាស់ ទល់នឹង២០៤សំឡេងគាំទ្រសេចក្ដីស្នើច្បាប់ដើម្បីដកតំណែងលោកភីតហេកសិត។ ដូចនេះ ផែនការដកតំណែងរបស់លោកត្រូវជាប់គាំងទាំងកណ្ដាលទី។ នៅក្នុងព្រឹត្តិការណ៍មួយទៀត សមាជិកព្រឹទ្ធសភាអាមេរិកដែលទើបតែជាប់ឆ្នោតថ្មី លោកអាប់ឌុល អែលសាយេត (Abdul El-Sayed) ចោទជាសំណួរថាតើលោកភីត ហេកសិតមានសមត្ថភាពដឹកនាំក្រសួងការពារជាតិដែរឬទេ។
លោកសូមជំរុញឱ្យលោកភីត ហេកសិតលាលែងពីតំណែងឱ្យហើយទៅ កុំឱ្យគេដេញទាន់។ នៅក្នុងបទសម្ភាសជាមួយទូរទស្សន៍ស៊ីអឹនអឹន លោកអែលសាយេតនិយាយសំដៅទៅរកលោកភីត ហេកសិតពីចម្ងាយថា «តើលោកបន្តកាន់តំណែងនេះដល់ណាទៀត? លោកមិនស័ក្ដិសមនឹងការងារនេះទេ។ លោកបំពេញការងារមិនបានល្អទាល់តែសោះ។ លោកដោះស្រាយបញ្ហាសង្គ្រាមនេះនៅក្នុងផ្លូវខុស។ លោកលាលែងពីតំណែងឱ្យហើយទៅដើម្បីឆាប់ចប់រឿង ជាជាងរង់ចាំឱ្យគេដកតំណែងរបស់លោក»៕ ប្រភព៖ Al Jazeera
ចែករំលែកព័តមាននេះ