ទីក្រុងហាណូយ៖ ការជះឥទ្ធិពលរបស់ស្មាតហ្វូន និងបណ្ដាញសង្គមទៅលើអនីតិជនកំពុងឆ្លងកាត់ការសិក្សា-វិភាគអំពីផលល្អ និងផលអាក្រក់មិនថាតែនៅបស្ចិមប្រទេសប៉ុណ្ណោះទេ សូម្បីតែបណ្ដាប្រទេសនៅទ្វីបអាស៊ីក៏កំពុងគិតគូរអំពីបញ្ហានេះផងដែរ។ ថ្មីៗនេះនៅវៀតណាម អ្នកតំណាងរាស្ត្របានស្នើសុំឱ្យរដ្ឋាភិបាលពិចារណាដាក់ចេញវិធានការហាមឃាត់កុមារក្រោមអាយុ១៦ឆ្នាំមិនឱ្យប្រើប្រាស់ស្មាតហ្វូន។ សំណើនេះកើតមានឡើងចំពេលដែលមានការព្រួយបារម្ភអំពីបញ្ហាមួយចំនួនដូចជា៖ ការចំណាយពេលច្រើនពេកក្នុងមួយថ្ងៃៗនៅមុខអេក្រង់ទូរស័ព្ទ, ការញៀននឹងបណ្ដាញសង្គម និងការប្រឈមនឹងហានិភ័យពាក់ព័ន្ធនឹងសុវត្ថិភាពរបស់កុមារ។
មានប្រសាសន៍ពាក់ព័ន្ធនឹងការធ្វើវិសោធនកម្មច្បាប់ស្ដីពីការការពារកុមារ លោកហ្វាមវ៉ាន់ហោ (Pham Van Hoa) ជាអ្នកតំណាងរាស្ត្រមកពីខេត្តដុងថាប (Dong Thap) ស្នើសុំឱ្យរដ្ឋាភិបាលចាត់វិធានការរឹតត្បិតលើចំណុចនេះបន្ទាប់ពីប្រទេសអភិវឌ្ឍមួយចំនួនបានអនុម័តច្បាប់នេះរួចហើយ។ លោកដាក់ជាសំណួរថាតើវៀតណាមអាចធ្វើដូចប្រទេសទាំងនោះទេ? ដ្បិតអីមានភស្តុតាងបង្ហាញច្បាស់ៗហើយអំពីផលអាក្រក់នៃការប្រើប្រាស់ស្មាតហ្វូនមិនបានត្រឹមត្រូវ។ ហេតុនេះ លោកសូមឱ្យរដ្ឋាភិបាលសិក្សាករណីនេះ។ រដ្ឋាភិបាលបានចាត់តាំងឱ្យក្រសួងអប់រំ និងវិក្រឹតការដឹកនាំគម្រោងសិក្សាស៊ីជម្រៅដើម្បីរៀបចំតាក់តែងជាសេចក្ដីព្រាងច្បាប់ស្ដីពីការប្រើប្រាស់ស្មាតហ្វូន និងបណ្ដាញសង្គមនៅតាមគ្រឹះស្ថានអប់រំ។
អស់រយៈពេល៦ឆ្នាំកន្លងទៅនេះ ការកំណត់បទបញ្ញត្តិនានាដើម្បីអនុញ្ញាតឱ្យសិស្សប្រើប្រាស់ស្មាតហ្វូនបង្កើនប្រសិទ្ធភាពរៀនសូត្រជាមួយគ្រូនៅតែជាបញ្ហាដ៏ចម្រូងចម្រាស។ នៅក្នុងការអនុវត្តជាក់ស្ដែង សាលារៀនជាច្រើនបានដាក់ចេញនូវវិធានការតឹងរ៉ឹងពិតមែនហើយ។ ក្នុងនោះ សាលាខ្លះរហូតដល់ទៅដើរប្រមូលទូរស័ព្ទរបស់សិស្សទុកមួយដុំនៅពេលចាប់ផ្ដើមចូលថ្នាក់រៀន។ ប៉ុន្តែនៅតែមានសិស្សខ្លះលួចប្រើទូរស័ព្ទក្រោមតុដើម្បីផ្ញើសារ ឬអូសវីឌីអូនៅលើទីកតុកជាដើម។ មានន័យថាថ្វីដ្បិតពួកគេកំពុងស្ថិតនៅក្នុងថ្នាក់រៀន ប៉ុន្តែអារម្មណ៍ហោះហើរអណ្ដែតត្រសែតនៅលើបណ្ដាញសង្គម។
ក្មេងឆាប់ចម្លងតាម។ ឧទាហរណ៍ ការឈ្លោះគ្នាតាមបណ្ដាញសង្គមអាចផ្ដល់ជាគំរូឱ្យពួកគេយកមកអនុវត្តជាក់ស្ដែងក្រោយពេលចេញពីថ្នាក់រៀន។ ចំណុចនេះហើយដែលនាំឱ្យគេចោទជាសំណួរថាតើការដាក់កំហិតទៅលើការប្រើប្រាស់ទូរស័ព្ទនៅក្នុងថ្នាក់រៀនតែមួយមុខពិតជាអាចដោះស្រាយការញៀននឹងបណ្ដាញសង្គមដែរឬទេ? ចុះពេលក្មេងៗចេញពីរៀនត្រឡប់ទៅផ្ទះវិញ ពួកគេនៅតែមានឱកាសបើកមើលស្មាតហ្វូន និងអូសមើលវីឌីអូនៅលើបណ្ដាញសង្គមតែដដែលហ្នឹង? អ្នកតំណាងមន្ទីរអប់រំ និងវិក្រឹតការខេត្តហុងយ៉េន (Hung Yen) ទទួលស្គាល់ថាបណ្ដាញសង្គមពិតជាផ្ដល់អត្ថប្រយោជន៍គួរឱ្យកត់សម្គាល់ ប្រសិនបើយើងចេះប្រើវាឱ្យបានត្រឹមត្រូវ។
ប៉ុន្តែបើគ្មានគោលការណ៍ណែនាំ និងគ្មានអ្នកចាំត្រួតពិនិត្យពីខាងលើទេ ក្មេងៗអាចប្រឈមនឹងផលវិបាកធ្ងន់ធ្ងរ។ ថ្នាក់ដឹកនាំមន្ទីរខាងលើស្នើសុំឱ្យរដ្ឋាភិបាលពិចារណាតាក់តែងសេចក្ដីព្រាងច្បាប់ដើម្បីដាក់កំហិតលើកុមារនៅអាយុកម្រិតណាមួយ (ឧទាហរណ៍កុមារក្រោមអាយុ១៦ឆ្នាំ) មិនឱ្យប្រើប្រាស់បណ្ដាញសង្គមដែលមានខ្លឹមសារផ្សព្វផ្សាយអាចបង្កគ្រោះថ្នាក់ ឬពោរពេញដោយគ្រោះថ្នាក់សម្រាប់ពួកគេ។ នៅក្នុងសំណើនោះមានការអំពាវនាវឱ្យរឹតបន្តឹងវិធានការនានាដើម្បីការពារកុមារនៅក្នុងមជ្ឈដ្ឋានឌីជីថល។ មានន័យថាជាការផ្សំបញ្ចូលគ្នាទាំងការដាក់កំហិតផ្អែកលើអាយុ, ការគ្រប់គ្រងពីអាណាព្យាបាល និងការគ្រប់គ្រងស្មាតហ្វូនឱ្យបានតឹងរ៉ឹង៕ ប្រភព៖ សារព័ត៌មាន Tuoitre
ចែករំលែកព័តមាននេះ