ទីក្រុងហាណូយ៖ នេះជារឿងគួរឱ្យសោកស្ដាយសម្រាប់ស្វាមី-ភរិយាមួយគូ នៅក្នុងពិធីមង្គលការបែរជាជួបប្រទះនឹងរឿងអពមង្គល។ កូនក្រមុំប្រឡាក់ភក់ពេញមុខ និងពេញសំលៀកបំពាក់នៅពេលឡានដឹកកូនក្រមុំ និងកូនកំលោះកំពុងបើកនៅលើផ្លូវសុខៗក៏ជ្រុលចង្កូតធ្លាក់ចូលវាលស្រែដោយសារតែកម្រងផ្កាដែលគេតុបតែងពីមុខកញ្ចក់រថយន្តនោះធ្លាក់មកបាំងពីមុខតៃកុងឡាន ជាហេតុធ្វើឱ្យគាត់មើលផ្លូវមិនឃើញ។ ហេតុការណ៍នេះកើតឡើងនៅវៀតណាមភាគខាងជើង វេលាម៉ោង១០ព្រឹកថ្ងៃអង្គារនៅពេលកូនកំលោះឈ្មោះលីវ៉ាន់វៀត (Ly Van Viet) អាយុ២១ឆ្នាំ និងកូនក្រមុំឈ្មោះដាំធីសួន (Dam Thi Xuan) អាយុ១៩ ចាកចេញដំណើរពីផ្ទះខាងស្រីនៅភូមិថូ (Tho) ឆ្ពោះទៅកាន់ផ្ទះខាងប្រុសស្ថិតនៅភូមិបានបាន (Ban Ban) ឃុំហ្វ៊ូលូ (Phu Luu) ខេត្តធ្វានគ័ង (Tuyen Quang)។
នៅពេលក្បួនហែកូនកំលោះ និងកូនក្រមុំធ្វើដំណើរទៅដល់ចំណុចមួយស្ថិតនៅចម្ងាយប្រហែលមួយគីឡូម៉ែត្រពីផ្ទះខាងប្រុស ឡានដឹកពួកគេក៏រេចង្កូតធ្លាក់ពីលើផ្លូវ ហើយក៏ផ្អៀងទៅម្ខាង ធ្វើឱ្យដីភក់ខ្ទាតប្រឡាក់អ្នកអង្គុយនៅក្នុងឡាន។ មុនពេលកើតហេតុមានខ្យល់បក់ខ្លាំង ជាហេតុធ្វើឱ្យកម្រងផ្កាដែលគេចងជារំយោលនោះធ្លាក់ចុះមកក្រោមបិទបាំងពីមុខអ្នកបើកបរ។ លោកលីដានស៊ូ (Ly Dan Su) ជាជាងថតរូប និងជាអ្នកធ្វើដំណើរហែហមក្បួនដឹកកូនកំលោះ និងកូនក្រមុំនោះ ប្រាប់ថារថយន្តកើតហេតុរមៀលជាច្រើនត្រឡប់ទម្រាំផ្អៀងទៅម្ខាង។ កូនក្រមុំអង្គុយកៀកនឹងទ្វារឡានដែលបើកកញ្ចក់ ជាហេតុធ្វើឱ្យភក់ប្រឡាក់ពាសពេញមុខ និងសំលៀកបំពាក់របស់នាង។
ហេតុការណ៍នោះធ្វើឱ្យអ្នកហែហមក្បួនរថយន្តដឹកកូនកំលោះ និងកូនក្រមុំភ្ញាក់ផ្អើលគ្រប់ៗគ្នា។ ពួកគេក៏ប្រញាប់ចុះទៅជួយប្រមៀលឡាន និងជួយគ្រាហ៍គូស្វាមី-ភរិយាទាំង២។ មុនដំបូង មនុស្សប្រុសពេញកម្លាំងបួនប្រាំនាក់ព្យាយាមលើករថយន្តនោះ ប៉ុន្តែមិនអាចទៅរួចទេព្រោះជារថយន្តខ្នាតធំគួរសម និងមានទម្ងន់ធ្ងន់។ ក្រោយមក អ្នករស់នៅម្ដុំនោះក៏ប្រមូលកម្លាំងរាប់សិបនាក់ ទម្រាំអាចលើករថយន្តនោះឱ្យហើបខ្ពស់បន្តិចដើម្បីឱ្យកូនកំលោះ និងកូនក្រមុំអាចលូនចេញមកខាងក្រៅបាន។ ជាងថតរូបឈ្មោះលីដានស៊ូប្រាប់ថាកូនក្រមុំមានគភ៌នៅក្នុងផ្ទៃ ហេតុនេះនៅពេលរថយន្តប្រមៀលក្រឡាប់ផ្កាប់ផ្ងារយ៉ាងដូច្នេះធ្វើឱ្យមនុស្សគ្រប់គ្នាសម្លឹងមើលទាំងលស់ព្រលឹង។ ប៉ុន្តែសំណាងល្អទាំងកូនក្រមុំ និងកូនកំលោះមិនបានរងរបួសអ្វីទេ គ្រាន់តែថាឈុតកូនក្រមុំ និងសក់របស់នាងប្រឡាក់សុទ្ធតែភក់។
មិនបង្អែបង្អង់យូរទេ នាងត្រូវគេដឹកទៅផ្ទះកូនកំលោះដើម្បីដុសលាងសម្អាត និងដូរសំលៀកបំពាក់។ ដូច្នេះ ពិធីផ្សេងៗនៅក្នុងអាពាហ៍ពិពាហ៍នេះបានប្រព្រឹត្តទៅចប់ចុងចប់ដើម។ នៅពេលរសៀល ក្រុមគ្រួសារបាននាំកូនក្រមុំទៅពេទ្យដើម្បីពិនិត្យសុខភាព។ គ្រូពេទ្យបញ្ជាក់ថាទាំងស្ត្រីជាម្ដាយ និងកូននៅក្នុងផ្ទៃមានសុខភាពល្អជាធម្មតា។ កូនកំលោះប្រាប់ថានេះជាហេតុការណ៍ដែលមិននឹកស្មានដល់។ វាជាសំណាងល្អដែលភរិយារបស់គាត់ និងកូននៅក្នុងផ្ទៃមានសុវត្ថិភាព ហើយពិធីមង្គលការអាចរៀបចំរហូតដល់ចប់សព្វគ្រប់។ រូបវីឌីអូឃ្លីបដែលបង្ហាញកូនក្រមុំប្រឡាក់ភក់ពេញខ្លួននោះត្រូវគេបង្ហោះនៅលើបណ្ដាញសង្គម និងទទួលបានការចាប់អារម្មណ៍យ៉ាងខ្លាំង។ ប្រិយមិត្តអ្នកទស្សនាភាគច្រើនបង្ហាញសមានចិត្តអាណិតអាសូរចំពោះស្វាមី-ភរិយាថ្មីថ្មោងមួយគូនេះដោយសារតែជាថ្ងៃមង្គលសិរីសួស្ដី មិនគួរណាមានបញ្ហាល្អក់កករកើតឡើងបែបនេះសោះ។ អ្នកខ្លះទៀតជួយត្រេកអរនៅពេលអ្នកទាំង២មិនមានបញ្ហាអ្វីធ្ងន់ធ្ងរកើតឡើងក្រៅពីការប្រឡាក់ភក់៕ ប្រភព៖ Vietnam Express
ចែករំលែកព័តមាននេះ