ខេត្តកំពង់ឆ្នាំង ៖ បើទោះបីក្រុមគណៈកម្មាធិការចម្រុះមានសមាសភាព១៥រូប ដែលមានលោកស្រី ដោក សុទ្ឋា អភិបាលរងខេត្ត ជាប្រធានគណៈកម្មាធិការ ដែលប្រឹងប្រែងរៀបចំដោះស្រាយវិវាទដីធ្លីរវាងប្រជាពលរដ្ឋជាមួយក្រុមហ៊ុន ខេ.ឌី.ស៊ី កាលពីព្រឹកថ្ងៃទី២៧ មីនា កន្លងទៅ ហាក់ដូចជាទទួលការបរាជ័យទាំងស្រុងក៏ពិតមែន ព្រោះតែមានអ្នកនៅពីក្រោយខ្នងបានពន្យុះឱ្យប្រជាពលរដ្ឋងើបចេញពីកិច្ចប្រជុំនេះ មិនព្រមស្តាប់ការបកស្រាយរបស់មេធាវីក្រុមហ៊ុនក៏ពិតមែន ប៉ុន្តែស្រាប់តែនៅព្រឹកថ្ងៃទី២៨ មីនា ប្រជាពលរដ្ឋទាំងនោះបានព្រមត្រឡប់មករកកិច្ចពិភាក្សាវិញ ហើយដំណោះស្រាយ បានឈានទៅយ៉ាងរលូនតាមការគ្រោងទុក ខណៈដែលមេខ្យល់អវត្តមាននៅព្រឹកនោះ។
គួររំលឹកថា តាមការគ្រោងទុករបស់គណៈកម្មាធិការចម្រុះ និងហៅប្រជាពលរដ្ឋទាំង៥២នាក់ ដែលបានអះអាងថា មានដីធ្លីវិវាទជាមួយក្រុមហ៊ុន មកសាកសួរម្នាក់ម្តង ដោយនៅព្រឹកថ្ងៃទី២៧ មីនា ចំនួន១២នាក់ រសៀលថ្ងៃដដែលចំនួន២០នាក់ និងនៅព្រឹកថ្ងៃទី២៨ មីនា ចំនួន២០នាក់ ។ ប៉ុន្តែនៅម៉ោង១២ថ្ងៃត្រង់ ក្រោយពេលប្រជាពលរដ្ឋទាំង១២នាក់ បានបំភ្លឺជូនគណៈកម្មការហើយ ដល់ពេលមេធាវីក្រុមហ៊ុន គឺលោកផាត់ ពៅសៀង បកស្រាយ ជូនគណៈកម្មការវិញម្តង ស្រាប់តែប្រជាពលរដ្ឋទាំងនោះស្ទុះងើបចេញតាមមេខ្យល់ គឺឈ្មោះរាជ សេម៉ា ធ្វើឱ្យបរិយាកាសដែលសង្ឃឹមថា នឹងមានដំណោះស្រាយ បានប្រែជាអាប់អួរតែមួយពព្រិចភ្នែក ដោយពួកគាត់នាំគ្នាដើរចេញ ហើយបានស្រែកឡូឡាពេញមុខសាលាឃុំតាចេស ធ្វើឱ្យភាគីក្រុមហ៊ុន និងគណៈកម្មការមានការអស់សង្ឃឹមជាខ្លាំង។ ប៉ុន្តែទោះបីបែបនេះក្តី ក៏គណៈកម្មការបានបន្តការងាររបស់ខ្លួន រហូតដល់រសៀលថ្ងៃដដែលនោះ ។
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ