កីឡាការិនីលំដាប់ទី១ ពិភពលោកជាតិអាមេរិក ស៊េរីណា វីលៀម បានសម្តែងនូវក្តីរីករាយជាខ្លាំង បន្ទាប់ពីបំបាក់បានកីឡាការិនីលំដាប់ទី២ ពិភពលោក លីណា ក្នុងវគ្គផ្តាច់ព្រ័ត្រព្រឹត្តិការណ៍វាយកូនបាល់ Sony Open ដែលប្រព្រឹត្តធ្វើនៅទីក្រុងម៉ៃអាមី រដ្ឋផ្លរីដា សហរដ្ឋអាមេរិក កាលពីថ្ងៃសៅរ៍ ទី២៩ ខែមីនាម្សិលមិញ ។
កីឡាការិនីលំដាប់ទី១ ពិភពលោកជាតិអាមេរិក ស៊េរីណា វីលៀម បានសម្តែងនូវក្តីរីករាយជាខ្លាំង បន្ទាប់ពីបំបាក់បានកីឡាការិនីលំដាប់ទី២ ពិភពលោក លីណា ក្នុងវគ្គផ្តាច់ព្រ័ត្រព្រឹត្តិការណ៍វាយកូនបាល់ Sony Open ដែលប្រព្រឹត្តធ្វើនៅទីក្រុងម៉ៃអាមី រដ្ឋផ្លរីដា សហរដ្ឋអាមេរិក កាលពីថ្ងៃសៅរ៍ ទី២៩ ខែមីនាម្សិលមិញ ។
ស៊េរីណា បានយកឈ្នះនាងលីណា ក្នុងលទ្ធផល៧-៥ និង៦-១ ទទួលបានពានជើងឯកជាលើកទី២ ប្រចាំឆ្នាំ២០១៤ ។ សូមបញ្ជាក់ថា ជ័យជម្នះពានជើងឯកលើកដំបូងរបស់កីឡាការិនីវ័យ៣២ឆ្នាំរូបនេះកើតឡើងកាលពីដើមឆ្នាំមកម្លេះនាទីក្រុងប្រ៊ីសបេន ប្រទេសអូស្ត្រាលី ។ តែលើកនោះគឺមិនធំដុំដូចជាលើកនេះឡើយ ។ បើនិយាយក្នុងអាជីពវិញ នេះគឺជាពានជើងឯកលើកទី៥៩ របស់នាងហើយ ។
និយាយជារួមមក សម្រាប់នាងស៊េរីណា នេះគឺជាលើកទី៧ ហើយដែលនាងបានឈានចូលដល់វគ្គផ្តាច់ព្រ័ត្រកម្មវិធី Sony Open ហើយដណ្តើមបានពានជើងឯក ខណៈរូបនាងបានចាប់ប្រកួតនៅទីនេះក្នុងវ័យ១៦ឆ្នាំ ។
ថ្លែងបន្ទាប់ពីទទួលបានពាន ស៊េរីណា បានបញ្ជាក់ថា ៖ «នេះពិតជាជ័យជម្នះយ៉ាងសំខាន់មួយ ។ វាសំខាន់ពីព្រោះ ជាជ័យជម្នះលើនាងលីណា ដែលការលេងរបស់នាងល្អឥតខ្ចោះ» ។
ចំណែកលីណា វិញ នេះជាការបរាជ័យផ្ទួនៗគ្នាលើកទី១០ ហើយនៅក្នុងជំនួប១២លើកជាមួយនាងស៊េរីណា ។ ជ័យជម្នះតែ១លើកគត់របស់នាងលើស៊េរីណា គឺនៅឆ្នាំ២០០៨ ។
នាងបានថ្លែងថា ៖ «ខ្ញុំមិនគិតថា ការប្រកួតរបស់ខ្ញុំអន់ដល់ម្លឹងសោះ ។ ស៊េរីណា ធ្វើបានល្អជាងខ្ញុំបន្តិចប៉ុណ្ណោះ ។ ការប្រកួតនៅថ្ងៃនេះ ខ្ញុំបានធ្វើអ្វីមួយខុសនោះទេ»។
ចេញដំណើរប្រកួតក្នុងឆ្នាំថ្មីនេះ លីណា ហាក់ដូចជាកាក់កបខ្លាំងណាស់ ។ នាងតែងតែឈានចូលដល់វគ្គផ្តាច់ព្រ័ត្រស្ទើរគ្រប់កម្មវិធី ។ ការប្រកួតការពារជើងឯកក្របខ័ណ្ឌធំ Australian Open នៅប្រទេសអូស្ត្រាលីខែមករាកកន្លងទៅ នាងធ្វើបានយ៉ាងល្អឥតខ្ចោះ ដោយនាងបានបំបាក់កីឡាការិនីជើងខ្លាំងលំដាប់ពិភពលោកអស់ជាច្រើនរូប មុនពេលយកឈ្នះកីឡាការិនីមិត្តរួមជាតិខ្លួនក្នុងវគ្គផ្តាច់ព្រ័ត្រ ៕
ចែករំលែកព័តមាននេះ