រាជធានីភ្នំពេញ ៖ ការប្រកួតបាល់ទាត់ពានរង្វាន់ដោនថោនខាប់ លើកទី២ នឹងចាប់ផ្តើមនាល្ងាចថ្ងៃទី៣១ មីនា នៅទីលានបាល់ទាត់ដោនថោនស្ព័ត ដែលមានទីតាំងស្ថិតក្នុងសង្កាត់ទឹកថ្លា ខណ្ឌសែនសុខ បន្ទាប់ពីធ្វើការចាប់ឆ្នោតបែងចែកពូលកាលពីព្រឹកថ្ងៃទី២៩ មីនា កន្លងមកនេះ ។
ចំពោះការប្រកួតនេះ គឺធ្វើតាមរូបមន្តវិលជុំ ដោយក្នុង១ពូល (A និង B) គឺយកតែ៤ក្រុម ដែលមានពិន្ទុខ្ពស់ជាងគេទៅប្រកួតខ្វែងនៅវគ្គ៨ក្រុមចុងក្រោយ ។ ក្រុមនីមួយៗមានគ្នា៧នាក់ ហើយក្នុង១តង់ គឺមានរយៈពេល៣៥នាទី ។
សម្រាប់ពូល A មាន ក្រុម Lion FC, Echo FC, LD panda, Garada FC, Ant United, DP FC. PP Macao FC, White Shark FC, Karavan Angkor Tours និង SIS FC ។ ពូល B មានក្រុម VFC, Killer Team FC, L A Friendly Team, SSPL FC, Best Friend FC, ស្ពៃខៀវ FC, Soriya FC, Cavs, ត្រពាំងល្វា និងក្រុម Domrey FC ។
លោក ហ៊ល សុភ័ក្រ ដែលជានាយកគ្រប់គ្រងទីលានបាល់ទាត់នេះឱ្យដឹងថា ការបង្កើតព្រឹត្តិការណ៍នេះឡើង គឺចង់ផ្សព្វផ្សាយពីការបើកដំណើរការទីលានថ្មី ដើម្បីឱ្យអ្នកដែលតែងតែគាំទ្រទីលានបាល់ទាត់របស់លោក កាន់តែមានភាពងាយស្រួលក្នុងការរកទីលានប្រកួត ។ លោកបន្តថា ចំពោះច្បាប់នៃការប្រកួតគឺគោរពតាម Fair Play ដែលមានចែងដោយសហព័ន្ធកីឡាបាល់ទាត់អន្តរជាតិ FIFA ។ ការប្រកួតទោះចាញ់ ឬឈ្នះ កីឡាករត្រូវតែមានភាពថ្លៃថ្នូរ ត្រឹមត្រូវ និងយុត្តិធម៌ គ្រប់ក្រុមត្រូវគោរពគូប្រកួត មិត្តរួមក្រុម អាជ្ញាកណ្តាល មន្ត្រីគណៈកម្មការ និងទស្សនិកជន ។ ជាពិសេសដើម្បីលើកកម្ពស់ផលប្រយោជន៍វិស័យកីឡាបាល់ទាត់កម្ពុជា ឱ្យកាន់តែមានភាពរីកចម្រើន ត្រូវចៀសឱ្យផុតពីអំពើពុករលួយ ការសេពគ្រឿងញៀន ការប្រកាន់ជាតិសាសន៍ អំពើហិង្សា និងប្រការគ្រោះថ្នាក់ផ្សេងៗចំពោះកីឡា ។
លោក ហ៊ល សុភ័ក្រ បានប្រាប់ឱ្យដឹងទៀតថា ក្រៅពីការប្រកួតនេះ លោកក៏មានគោលបំណងបង្កើតព្រឹត្តិការណ៍ប្រកួតដណ្តើមពានរង្វាន់លីក ដែលត្រូវចាប់ផ្តើមនៅចុងឆ្នាំនេះផងដែរ ដោយយើងត្រូវការក្រុមដែលមានសមត្ថភាពខ្លាំងពូកែយ៉ាងតិច១០ក្រុម ។
សូមបញ្ជាក់ថា ព្រឹត្តិការណ៍បាល់ទាត់ដណ្តើមពានរង្វាន់ដោនថោនខាប់នេះ ធ្លាប់បានធ្វើរួចម្តងមកហើយកាលពីឆ្នាំ២០១៣ ដោយចំណាត់ថ្នាក់លេខ១ បានទៅក្រុម Khmer Hart និងជើងឯករងបានទៅក្រុមឪម៉ាល់ ។ តែសម្រាប់ការប្រកួតលើកនេះ មិនមានវត្តមានក្រុម២នេះចូលរួមនោះទេ ដោយសារតែកីឡាករក្នុងក្រុមសុទ្ធតែជាកីឡាករអាជីពស្ទើរតែទាំងអស់ ខុសពីអ្វីដែលការប្រកួតនេះត្រូវការជ្រើសយកតែកីឡាករដែលមិនអាជីពចូលរួម ។
ចំពោះប្រាក់រង្វាន់សម្រាប់ជ័យលាភីដែលដណ្តើមបានចំណាត់ថ្នាក់លេខ១ ទទួលបានពាន១ អមដោយទឹកប្រាក់ចំនួន២លានរៀល ចំណាត់ថ្នាក់លេខ២ ទទួលបានទឹកប្រាក់១លានរៀល និងចំណាត់ថ្នាក់លេខ៣ ទទួលបានទឹកប្រាក់៥០ម៉ឺនរៀល ។ ទាំង៣ចំណាត់ថ្នាក់នេះ នឹងទទួលបាននូវការឧបត្ថម្ភពីភេសជ្ជៈ XL ផងដែរ ៕
ចែករំលែកព័តមាននេះ