រាជធានីភ្នំពេញ ៖ ម្ចាស់បានផ្ទះកម្តៅសម្ល ភ្លេចបិទហ្គាសចាក់សោផ្ទះចេញទៅក្រៅបាត់ ធ្វើឱ្យឆេះខ្លោចហុយផ្សែងទ្រលោម ហើយអ្នកជិតខាងបាននាំគ្នាតទុយោទឹកបម្រុងបាញ់ទឹកពន្លត់ តែម្ចាស់ផ្ទះមកវិញទាន់ ។ ហេតុការណ៍នេះ បង្កការភ្ញាក់ផ្អើលកាលពីវេលាម៉ោង៧និង៥០នាទីយប់ ថ្ងៃទី២៨ មីនា ២០១៤ នៅផ្ទះលេខ៧៤ ជាអង្គការត្រង់ស៊ីនដូ ជប៉ុន-កម្ពុជា ផ្លូវលេខ៣៨៤ សង្កាត់ទួលស្វាយព្រៃទី២ ខណ្ឌចំការមន ។
ប្រភពព័ត៌មានបានបន្តឱ្យដឹងថា មុនពេលកើតហេតុ អ្នកមើលការខុសត្រូវក្នុងអង្គការបានកម្តៅសម្ល ភ្លេចបិទហ្គាស ថែមទាំងបានចាក់សោចេញទៅក្រៅបាត់ទៀត មួយសន្ទុះក្រោយមកស្រាប់តែអ្នកជិតខាងឃើញផ្សែងហុយទ្រលោម និងមានក្លិនឈ្ងៀមធ្វើឱ្យមានការភ័យស្លន់ស្លោ ហើយបានទូរស័ព្ទរាយការណ៍ទៅសមត្ថកិច្ច រួចនាំគ្នាតទុយោបម្រុងបាញ់ទឹកពន្លត់ ស្រាប់តែម្ចាស់ផ្ទះត្រឡប់មកទាន់ ក៏បានចាក់សោចូលទៅបិទធុងហ្គាសវិញ ព្រមទាំងឃើញឆ្នាំងឆេះខ្លោចទៅហើយ ។
ក្រោយពេលកើតហេតុ ម្ចាស់ផ្ទះបានសុំទោសដល់សមត្ថកិច្ច និងអ្នកជិតខាង ដែលបណ្តាលឱ្យមានការភ្ញាក់ផ្អើល ដោយសារតែការធ្វេសប្រហែសរបស់គាត់ ៕
ចែករំលែកព័តមាននេះ