ខេត្តកំពង់ធំ ៖ លោកវរសេនីយ៍ត្រី ឃុន ប៊ុនហូ មេបញ្ជាការមូលដ្ឋានកងរាជអាវុធហត្ថស្រុកស្ទោង បានឱ្យដឹងថា ដោយមើលឃើញពីការលំបាកក្នុងការធ្វើដំណើរឆ្លងកាត់ប្រាស្រ័យទាក់ទងគ្នាទៅវិញទៅមកនោះ ប្រជាពលរដ្ឋដែលរស់នៅក្នុងភូមិម្សាក្រង ឃុំម្សាក្រង ស្រុកស្ទោង ខេត្តកំពង់ធំ បានសំណូមពរដល់ក្រុមការងារឃុំចុះជួយសាងសង់ស្ពានថ្ម១កន្លែង ដែលមានប្រវែង២៦ម៉ែត្រ និងទទឹង៤ម៉ែត្រកន្លះ ជូនដល់ពួកគាត់ ដើម្បីងាយស្រួលធ្វើដំណើរឆ្លងកាត់ពីភូមិ១ទៅភូមិ១ទៀត ជាការឆ្លើយតបទៅនឹងសំណូមពររបស់ប្រជាពលរដ្ឋនោះ ។
លោកឧត្តមសេនីយ៍ត្រី ហង្ស ថុល មេបញ្ជាការកងរាជអាវុធហត្ថខេត្តកំពង់ធំ អនុប្រធានក្រុមការងារចុះជួយស្រុកស្ទោង និងជាប្រធានក្រុមការងារចុះជួយឃុំម្សាក្រង បានខិតខំស្វែងរកជំនួយជួយឧបត្ថម្ភពីសប្បុរសជន និងពីមន្ត្រីកងរាជអាវុធហត្ថខេត្ត ក្រោមឱវាទប្រមូលថវិកាបានជាង២០.០០០ដុល្លារសហរដ្ឋអាមេរិក ក៏បានដាក់បទបញ្ជាឱ្យរូបលោកដឹកនាំកងកម្លាំងរាជអាវុធហត្ថស្រុកស្ទោង សរុបចំនួន២១នាក់ ចុះជួយសាងសង់ស្ពានថ្ម១កន្លែង ដែលមានប្រវែង២៦ម៉ែត្រ និងទទឹង៤ម៉ែត្រ ជូនដល់ប្រជាពលរដ្ឋដែលរស់នៅក្នុងភូមិម្សាក្រង ឃុំម្សាក្រង ស្រុកស្ទោង ។ កាលពីព្រឹកថ្ងៃទី២៩ មីនា ២០១៤ ដោយមានការចូលរួមពីប្រជាពលរដ្ឋមួយចំនួនតូច ដោយចំណាយទឹកប្រាក់សរុបស្មើនឹង២៦.០០០ដុល្លារសហរដ្ឋអាមេរិក ស្ថិតក្រោមបរិយាកាសសប្បាយត្រេកអរឥតឧបមាពីសំណាក់ប្រជាពលរដ្ឋ ដោយមិននឹកស្មានថា ចាប់ពីថ្ងៃនេះតទៅ ពួកគាត់នឹងងាយស្រួលនៅក្នុងការធ្វើដំណើរឆ្លងកាត់ទីកន្លែងនេះ នៅពេលដែលរដូវវស្សាមកដល់ម្តងៗ ប្រជាពលរដ្ឋមានការលំបាកក្នុងការធ្វើដំណើរឆ្លងកាត់ណាស់ ៕
ចែករំលែកព័តមាននេះ