រាជធានីភ្នំពេញ ៖ បច្ចុប្បន្ននេះគេចាប់អារម្មណ៍លើកីឡាករគ្រប់ផ្នែក ឯសហព័ន្ធកីឡាវ៉ូវីណាមក៏ខិតខំប្រឹងប្រែងបញ្ចេញសកម្មភាពកាន់តែខ្លាំង ដើម្បីបង្ហាញសាធារណជនឲ្យមើលឃើញ ពីសមត្ថភាព និងទេពកោសល្យនៅក្នុងកីឡាប្រភេទនេះ ។ ទោះជាយ៉ាងណា គេនៅតែមើល…
រាជធានីភ្នំពេញ ៖ បច្ចុប្បន្ននេះគេចាប់អារម្មណ៍លើកីឡាករគ្រប់ផ្នែក ឯសហព័ន្ធកីឡាវ៉ូវីណាមក៏ខិតខំប្រឹងប្រែងបញ្ចេញសកម្មភាពកាន់តែខ្លាំង ដើម្បីបង្ហាញសាធារណជនឲ្យមើលឃើញ ពីសមត្ថភាព និងទេពកោសល្យនៅក្នុងកីឡាប្រភេទនេះ ។ ទោះជាយ៉ាងណា គេនៅតែមើល ឃើញដូចគ្នាថាកីឡាវ៉ូវីណាម មិនសូវទទួលបានប្រជាប្រិយភាពពីមហាជននោះទេ បើទោះជាវិញ្ញាសានេះធ្លាប់ទទួលបានមេដាយនៅលើឆាកអន្តរជាតិជាហូរហែកន្លងមកក្តី ។
អគ្គលេខាធិការរងសហព័ន្ធកីឡាវ៉ូវីណាម កម្ពុជា លោក ទេព ជីវសុខុម បានថ្លែងថា កីឡា វ៉ូវីណាមមានដើមកំណើតមកពីប្រទេសវៀតណាម ហើយត្រូវបានប្រទេសជាច្រើនជាពិសេស គឺកម្ពុជាយកមកបង្កើតជាសហព័ន្ធ និងបង្កើនកីឡាករបានយ៉ាងល្អមិនចាញ់កីឡាកររបស់ម្ចាស់ដើម គឺជនជាតិវៀតណាមនោះទេ ។ លោកបានទាំងកត់សម្គាល់ថា កីឡាករកម្ពុជាមានសមត្ថភាពមិនចាញ់កីឡាករវៀតណាមឡើយ គ្រប់ពេលប៉ះគ្នានៅលើឆាកអន្តរជាតិ ។
ទោះជាយ៉ាងណាលោកថ្លែងថា វ៉ូវីណាមកម្ពុជាមិនសូវមានប្រជាប្រិយទេ បើទោះជាកីឡាករគ្រប់ផ្នែកសុទ្ធតែមានសមត្ថភាពប្រកួតគ្រប់គ្រាន់ នៅលើឆាកអន្តរជាតិ ។ ជាក់ស្តែង រូបលោក ដែលជាកីឡាករមួយរូបដែរនោះ តែងតែបានបង្ហាញភាពលេចធ្លោលើឆាកអន្តរជាតិតាមរយៈ ការដណ្តើមបានមេដាយមាស ប្រាក់ និងសំរឹទ្ធិ កម្រិតពិភពលោក អាស៊ី និងអាស៊ាន ជាហូរហែ ប៉ុន្តែមានមហាជនតិចណាស់ដែលស្គាល់ឈ្មោះលោក និងស្នាដៃនៃការប្រឹងប្រែងរបស់លោក ។
លោក ទេព ជីវសុខុម បន្តថា ប្រជាពលរដ្ឋកម្ពុជាគួរមានមោទកភាពចំពោះស្នាដៃ និងសមត្ថភាពរបស់កីឡាករកីឡាការិនីវ៉ូវីណាមកម្ពុជា ។ លោកសង្ឃឹមថា កម្ពុជានឹងទទួលបានជោគជ័យ
ក្នុងការប្រកួតកីឡាស៊ីហ្គេមលើកទី៣០នៅប្រទេសហ្វ៊ីលីពីនឆ្នាំនេះ ។
ជាមួយនឹងការបង្ហាញពីការតូចចិត្ត លោកក៏ប្រកាសពីការប្រឹងប្រែងក្នុងការពង្រឹងសមត្ថភាព ដើម្បីអាចបន្តឱកាសដណ្ដើមមេដាយលើឆាកអន្តរជាតិក្នុងពេលខាងមុខផងដែរ ។ លោកប្រកាសថា មិនបាក់ទឹកចិត្តទេ បើទោះជាការគាំទ្រលោកនៅកម្ពុជា ធៀបនឹងកីឡាករដែលមានសមត្ថភាពប្រហែលលោកនៅក្រៅប្រទេស មិនដូចគ្នាក៏ដោយ ។
ក្រៅពីក្រុមកីឡាករជម្រើសជាតិឈុតធំ សហព័ន្ធកីឡាវ៉ូវីណាមកម្ពុជា កំពុងបណ្តុះបណ្តាល យុវជនថ្នាលប្រមាណ២០រូប ។ សហព័ន្ធនេះ បង្កើតឡើងនៅឆ្នាំ២០០៨ បច្ចុប្បន្នមានក្លិប សមា
គមជាសមាជិកចំនួន៦ ដែលមានកីឡាករ កីឡាការិនីសរុបប្រមាណ២០០នាក់ ។ អ្វីដែលគួរ
ឲ្យកត់សម្គាល់ គឺសហព័ន្ធនេះពុំទាន់មានទីលាន ត្រឹមត្រូវដើម្បីឲ្យកីឡាករហ្វឹកហាត់នៅឡើយទេ ។
លោក ទេព ជីវសុខុម បន្តថា សហព័ន្ធវ៉ូវីណាមកម្ពុជា នៅតែបន្តបំផុសឲ្យមានសមាសភាពថ្មីចូលរួមហ្វឹកហាត់ និងបង្កើតការប្រកួតមិនសូវដាច់នោះទេ ដើម្បីស្វែងរកអ្នកឆ្នើមបន្តវេន ។ ជាមួយនេះ ប្រសិនបើវិស័យឯកជនចូលរួមជ្រោមជ្រែងបានខ្លាំងបន្តិច មិនដឹងជាកីឡាករវ៉ូវីណាម នឹងមានកម្លាំងចិត្តកម្រិតណានោះទេ ជាពិសេសរាល់ពេលហ្វឹកហាត់ម្ដងៗ ហើយមានការឧបត្ថម្ភ
គាំទ្រ ៕ (កែសម្រួលដោយ ៖ បុប្ផា)
ចែករំលែកព័តមាននេះ