រាជធានីភ្នំពេញ ៖ សមិទ្ធិផលនានានៅក្នុងបរិវេណវត្តអម្ពរផល ហៅវត្តចុងកោះ សង្កាត់កោះដាច់ ខណ្ឌឬស្សីកែវ ត្រូវបានសម្ពោធដាក់ឱ្យប្រើប្រាស់ រួមជាមួយបុណ្យចម្រើនព្រះជន្ម ចៅអធិការវត្ត កាលពីរសៀលថ្ងៃទី២៧ មីនា ក្រោមអធិបតីភាពលោកឃ្លាំង ហួត អភិបាលនៃគណ:អភិបាល ខណ្ឌឬស្សីកែវ និងព្រះញ្ញាណវង្សឃឹម សន ព្រះមេគណរាជធានីភ្នំពេញ ព្រមទាំងមានការចូលរួមពីអភិបាលរង មន្រ្តីរាជការ ពុទ្ធបរិស័ទចំណុះជើងវត្តនិងលោកគ្រូ អ្នកគ្រូ សិស្សានុសិស្សយ៉ាងច្រើនកុះករ ។
សមិទ្ធិផលនានាដែលត្រូវសម្ពោធដាក់ឱ្យប្រើប្រាស់នៅពេលនោះមានកុដិ របងវត្ត បង្គោលភ្លើង និងចាក់សាបបេតុង រួមជាមួយសមិទ្ធិផលជាច្រើនទៀត ក្រោមការផ្តើមកសាងឡើងពីព្រះចៅអធិការវត្ត ព្រះនាម រៀម សៀង និងពុទ្ធបរិស័ទចំណុះជើងវត្ត ព្រមទាំងសប្បុរសជនផងដែរ ។
លោក ឃ្លាំង ហួត បានសំដែងនូវមនោសញ្ចេតនារំភើបរីករាយ អបអរសាទរ និងសូមចូលរួម អនុមោទនា ដោយទឹកចិត្តជ្រះថ្លា ចំពោះមហាកុសល ដែលព្រះសង្ឃ គណ:កម្មការ អាចារ្យ ពុទ្ធបរិស័ទបាន ប្រារព្ធពិធីសម្ពោធដាក់ឲ្យប្រើប្រាស់វេរ ប្រគេន ព្រះសង្ឃតាមពុទ្ធបញ្ញត្តិ ពុទ្ធានុញ្ញត្តិ និងការរៀបចំចម្រើនព្រះជន្មប្រគេនព្រះគ្រូចៅ អធិការវត្ត ទៅតាមទំនៀមទម្លាប់ប្រពៃណីព្រះពុទ្ធសាសនា។
ចែករំលែកព័តមាននេះ