កីឡាការិនីអាមេរិក ស៊េរីណា វីលៀម បានឆ្លងចូលដល់វគ្គផ្តាច់ព្រ័ត្រព្រឹត្តិការណ៍វាយកូនបាល់ Sony Open ជាលើកទី៩ ក្រោយពីបានផ្តួលកីឡាការិនីរុស្ស៊ី ម៉ារីយ៉ា សារ៉ាប៉ូវ៉ា នៅទីលាន Crandon Park កាលពីថ្ងៃព្រហស្បតិ៍ ទី២៧ មីនា ម្សិលមិញ ។ កីឡាការិនីការពារជើងឯករូបនេះបានធ្លាក់ដៃបន្តិចពេលចាប់ផ្តើមប្រកួតក្នុងវគ្គដំបូងមុនពេលវាយបកបំបាក់គូប្រជែងជាតិរុស្ស៊ីរបស់នាង ក្នុងលទ្ធផល២សិតជាប់ៗគ្នា៦-៤ និង៦-៣។
អំឡុងបើកការប្រកួតភ្លាមៗ សារ៉ាប៉ូវ៉ា បានធ្វើការនាំមុខនៅដំណាក់កាលដំបូង ដោយបានយកឈ្នះពិន្ទុក្នុងវគ្គទី៤សិតទី១ ។ ទោះជាយ៉ាងណា ប្រៀបរបស់នាងពិតជាមានជីវិតខ្លីខ្លាំងណាស់នៅពេលនាងស៊េរីណា បានយកឈ្នះពិន្ទុ៥វគ្គជាប់ៗគ្នាដណ្តើមបានជ័យ ជម្នះសិតទី១ ទាំងស្រុង ។
ការប្រកួតបន្តក្នុងសិតទី២ សារ៉ាប៉ូវ៉ា ក្នុងនាមជាកីឡាការិនីចំណាត់ថ្នាក់លេខ៤ របស់កម្មវិធីបានវាយបកយកឈ្នះពិន្ទុនាងស៊េរីណា នៅវគ្គទី២ ដណ្តើមបានប្រៀបជាថ្មីម្តងទៀត ។ ប៉ុន្តែសន្ទុះនោះមិនអាចគ្រប់គ្រងស៊េរីណា ជាប់រហូតឡើយ ហើយជាលទ្ធផល កីឡា ការិនីលំដាប់ទី១ ពិភពលោករូបនេះវាយបកបានជោគជ័យជាបន្តបន្ទាប់ ។ វាសនា និងក្តីសង្ឃឹមដណ្តើមបានពានជើងឯកនៅម៉ៃអាមីនេះជាលើកទី១ ក្នុងអាជីពរបស់សារ៉ាប៉ូវ៉ាត្រូវបានបញ្ចប់ជាថ្មីម្តងទៀត ក្រោយពីស៊េរីណា បន្តជ័យជម្នះក្នុងវគ្គទី៧ និងទី៩ ដែលជាវគ្គផ្តាច់ព្រ័ត្រនៃសិតទី២ ។
ថ្លែងបន្ទាប់ឈ្នះការប្រកួត ស៊េរីណា បានបញ្ជាក់ថា ៖ «វាមិនមែនជាការងាយស្រួលនោះទេ ។ ជាក់ស្តែងណាស់ នាងសារ៉ាប៉ូវ៉ា ពិតជា លេងបានយ៉ាងល្អ ។ នាងធ្វើបានល្អខ្លាំងណាស់នៅទីនេះ ។ ដូច្នេះ ខ្ញុំវិញគឺគ្រាន់តែសម្រេចចិត្តថា ត្រូវធ្វើឱ្យបានល្អប្រសើរជាងនាងបន្តិច គឺជាការស្រេច» ។ គួរកត់សម្គាល់ថា នេះជាលើកទី១៥ ហើយដែលស៊េរីណា បំបាក់នាងសារ៉ាប៉ូវ៉ា ។ នៅវគ្គផ្តាច់ព្រ័ត្រ នាងនឹងប៉ះជាមួយកីឡាការិនីចិន លីណា ឬកីឡាការិនីឆែក ដូមីនីកា ស៊ីប៊ុលកូវ៉ា ។
ចំពោះលទ្ធផលនៃការប្រកួតឯកត្តជនផ្នែកបុរសវិញ កីឡាករឆែក Tomas Berdych បំបាក់កីឡាករអ៊ុយក្រែន Alexandr Dolgopolov ក្នុងលទ្ធផល៦-៤ និង៧-៦ ឈានចូលដល់វគ្គពាក់កណ្តាលផ្តាច់ព្រ័ត្រជាលើកទី៣។ នៅវគ្គបន្ទាប់ គេនឹងប៉ះជាមួយអ្នកឈ្នះរវាង រ៉ាហ្វាអែល ណាដាល់ និង Milos Raonic មកពីប្រទេសកាណាដា ។ចំណែកកីឡាករលំដាប់ទី២ ពិភពលោក ណូវ៉ាក់ យ៉ូកូវិច និងកីឡាករជប៉ុន Kei Nishikori ដែលបានផ្តួលកីឡាករអង់គ្លេស Andy Murray និងកីឡាករស្វ៊ីស Roger Federer ក្នុងវគ្គ១/៤ ផ្តាច់ព្រ័ត្រនឹងជួបប្រកួតគ្នាជាលើកដំបូងនៅវគ្គពាក់កណ្តាលផ្តាច់ព្រ័ត្រ ៕
ចែករំលែកព័តមាននេះ