រាជធានីភ្នំពេញ ៖ ទើបតែបានផ្តួលកីឡាករឡេះ តើក មកពីក្លិបពុទ្ធសេរីវង្សកីឡា ឱ្យសន្លប់ក្នុងទឹកទី៤ កាលពីសប្តាហ៍មុនសោះ ស្រាប់តែកីឡាករឯម ខ្លឹមខ្មៅ មកពីក្លិបឫទ្ធិពោធិសែនជ័យ មានមុខឡើងរេញទៀតហើយនៅល្ងាចថ្ងៃសុក្រ ទី២៨ មីនានេះ ដោយប៉ះជាមួយកីឡាករហុឹម សារ៉ាន់ មកពីសមាគមកីឡាប្រដាល់ក្រសួងការពារជាតិ ។
រាជធានីភ្នំពេញ ៖ ទើបតែបានផ្តួលកីឡាករឡេះ តើក មកពីក្លិបពុទ្ធសេរីវង្សកីឡា ឱ្យសន្លប់ក្នុងទឹកទី៤ កាលពីសប្តាហ៍មុនសោះ ស្រាប់តែកីឡាករឯម ខ្លឹមខ្មៅ មកពីក្លិបឫទ្ធិពោធិសែនជ័យ មានមុខឡើងរេញទៀតហើយនៅល្ងាចថ្ងៃសុក្រ ទី២៨ មីនានេះ ដោយប៉ះជាមួយកីឡាករហុឹម សារ៉ាន់ មកពីសមាគមកីឡាប្រដាល់ក្រសួងការពារជាតិ ។
ការឡើងរេញនេះកំពុងមានការចាប់អារម្មណ៍ថា រវាងឯម ខ្លឹមខ្មៅ និងហុឹម សារ៉ាន់ នរណាជាអធិរាជនៅលើសង្វៀន ។ ជំនួបរវាងពួកគេមិនមែនជាលើកទី១នោះទេ ដោយគ្រាន់តែកន្លងមក ហុឹម សារ៉ាន់ ហាក់មានសន្ទុះ និងលទ្ធផលល្អជាងក្នុងពេលប៉ះគ្នាតែបុ៉ណ្ណោះ ។ ការប្រកួតដែលនឹងចាប់ផ្តើមនៅក្នុងសង្វៀនទូរទស្សន៍បាយ័នស្ទឹងមានជ័យល្ងាចនេះ ធ្វើឱ្យមានការជឿជាក់យ៉ាងខ្លាំងថា កីឡាករឯម ខ្លឹមខ្មៅ នឹងអាចយកឈ្នះលើកីឡាករហុឹម សារ៉ាន់ បាន បន្ទាប់ពីការប្រកួតរបស់គេបុ៉ន្មានលើកចុងក្រោយគឺឈ្នះរហូត ហើយឈ្នះដោយមានសន្ទុះដែលអាចនិយាយបានល្អជាងលើកមុន ពោលគឺល្អជាងកាលដែលគេបរាជ័យ ហើយរបូតខ្សែក្រវាត់ស្រាបៀរកម្ពុជាពីដៃនោះទៅទៀត ។
ឯម ខ្លឹមខ្មៅ ប្រាប់ថា តាំងពីចាញ់ក្រោមដៃកីឡាកររឿង សោភ័ណ្ឌ មកពីក្លិបមកុដរាជសីហ៍ដោយមិនអស់ចិត្តក្នុងវគ្គប្រកួតដណ្តើមខ្សែក្រវាត់នោះមក បានជំរុញ និងលើកទឹកចិត្តឱ្យលោកបង្កើនការហ្វឹកហាត់ដើម្បីពង្រីកកម្លាំង និងថាមពលឆ្ពោះទៅរកការប្រកួតសងសឹក និងវាយដណ្តើមយកខ្សែក្រវាត់ដែលបានបាត់បង់ត្រឡប់មកវិញ ។ ជាមួយការប្រយុទ្ធដែលហាក់កើនឡើងនូវសន្ទុះជាងមុន កីឡាករឯម ខ្លឹមខ្មៅ ប្រាប់ថា នៅមិនទាន់ឈានដល់ចំណុចនៃការចង់បាននៅឡើយទេ ដរាបណាគេនៅតែមានឈ្មោះបាត់បង់ខ្សែក្រវាត់ ហើយដណ្តើមយកវិញមិនទាន់បាន ។ ជារៀងរាល់ថ្ងៃ ឯម ខ្លឹមខ្មៅ ប្រាប់ថា ប្រឹងប្រែងចូលក្លិបខុសពីមុន ដោយស្ទើរជារៀងរាល់ថ្ងៃតែម្តង ដែលគេមិនធ្វេសប្រហែស ហើយបង្កើនការបំពេញកម្លាំងសុ៊ហ្វ និងបច្ចេកទេសនៅក្នុងពិភពប្រដាល់។ លោកអរគុណយ៉ាងខ្លាំងចំពោះស្ថានីយទូរទស្សន៍បាយ័ន ដែលបានផ្គូផ្គងឱ្យលោកឡើងរេញញឹកញាប់នាពេលចុងក្រោយ ដែលរុញឱ្យលោកប្រឹងប្រែងជាងមុន បើធៀបនឹងអំឡុង២ទៅ៣ខែមុន ។
ទោះយ៉ាងណា លោកមិនហ៊ានយល់ថា ខ្លួនឯងនឹងផ្តួលកីឡាករហុឹម សារ៉ាន់ បានល្ងាចថ្ងៃនេះនៅឡើយទេ ក្នុងពេលដែលកីឡាករហុឹម សារ៉ាន់ ក៏មិនមែនជាជើងខ្លាំងធម្មតាស្រួលយកឈ្នះ ។ ឯម ខ្លឹមខ្មៅ បានត្រឹមតែត្រៀមការហ្វឹកហាត់ និងបច្ចេកទេសថ្មីៗទុកស្វាគមន៍បុ៉ណ្ណោះ បុ៉ន្តែលទ្ធផលគឺមានតែភាពជាក់ស្តែងនៃការប្រកួត និងឱកាសបុ៉ណ្ណោះដែលអាចកំណត់ថា សម្រេចឬមិនសម្រេចនៅទីបញ្ចប់ ។ យ៉ាងណាក៏ដោយ កីឡាករឯម ខ្លឹមខ្មៅ ហាក់មានជំនឿចិត្តឈ្នះច្រើនជាងចាញ់ នៅពេលសួរនាំការបង្ហាញឆន្ទៈដោយប្រាកដ ។ កីឡាករហុឹម សារ៉ាន់ ប្រាប់ថា មិនខ្លាចការតាំងចិត្តរបស់ ឯម ខ្លឹមខ្មៅ នោះទេក្នុងពេលដែលគ្រាកន្លងមក លោកក៏ធ្លាប់ប៉ះកណ្តាប់ដៃជាមួយគេ ហើយជ្រួតជ្រាបដឹងថា ឯម ខ្លឹមខ្មៅ មានចំណុចត្រង់ណាល្អ និងចំណុចត្រង់ណាអាចស៊ីបានដោយងាយស្រួល ។
មនុស្សភាគច្រើនបានត្រឹមតែយល់ថា ពួកគេមានចំណុចល្អរៀងៗខ្លួនប៉ុណ្ណោះ បុ៉ន្តែម្នាក់ៗហាក់មិនហ៊ានកំណត់ដោយភាពជឿជាក់នោះឡើយថា អ្នកណានឹងឈ្នះ១០០% សម្រាប់ការប្រកួតនាពេលបន្តិចទៀតនេះ ។ បើ ឯម ខ្លឹមខ្មៅ អាចឈ្នះក្នុងសប្តាហ៍នេះទៀតមានន័យថា គេកាន់តែមានក្រេឌីតក្នុងការសងសឹកជាមួយកីឡាកររឿង សោភ័ណ្ឌ ពិតប្រាកដហើយក្នុងពេលដ៏ខ្លី ។ ចាំមើល តើកីឡាករឯម ខ្លឹមខ្មៅ នឹងឈ្នះថ្ងៃនេះទៀត ឬជាឱកាសរបស់កីឡាករហឹុម សារ៉ាន់ ? នៅលើរេញនោះដែរ កីឡាករចាន់ ប៊ុនសែត មកពីក្លិបនិរោធមានជ័យ ប្រកួតជាមួយកីឡាករកន ចន្ថា មកពីមជ្ឈមណ្ឌលកីឡានៃកងយោធពលខេមរភូមិន្ទ ។ កីឡាករវីវ៉ា សាមីត មកពីក្លិបមហិទ្ធិឫទ្ធិតាដំបងដែក ប្រកួតជាមួយកីឡាករសុឹម សំ មកពីក្លិបបញ្ជាការដ្ឋានកងរាជអាវុធហត្ថរាជធានីភ្នំពេញ និងកីឡាការិនីអេ យ៉ានុត មកពីមជ្ឈមណ្ឌលកីឡានៃកងយោធពលខេមរភូមិន្ទ ប្រកួតជាមួយកីឡាការិនី វី ស្រីឆាយ មកពីក្លិបនាគមានជ័យ ។
នៅថ្ងៃសៅរ៍លើសង្វៀនដដែល កីឡាករថៃ ប៊ុនហាន មកពីក្លិបបូរីនាគរាជ ប្រកួតជាមួយកីឡាករភុន សោភ័ណ្ឌ មកពីក្លិបយុវកីឡាខេត្តកណ្តាល និងកីឡាករគួន ប៊ុនហុីម មកពីក្លិបពន្លឺសាមគ្គីខេត្តបាត់ដំបង ប្រកួតជាមួយកីឡាករចាន់ ស៊ីណាត មកពីក្លិបនិរោធមានជ័យ ៕
ចែករំលែកព័តមាននេះ