រាជធានីភ្នំពេញ ៖ យោងតាមសេចក្តីជូនដំណឹងរបស់សហព័ន្ធកីឡាទ្រីយ៉ាត្លុងកម្ពុជា កាលពីពេលថ្មីៗនេះឱ្យដឹងថា សហព័ន្ធកីឡាទ្រីយ៉ាត្លុងកម្ពុជា សហការជាមួយនឹងមណ្ឌលកីឡា Cambodian Country Club (C.C.C) នឹងរៀបចំព្រឹត្តិការណ៍ប្រកួតកីឡា AQUATHLON (ហែលទឹក+រត់ប្រណាំង) លើកទី៣ ដែលនឹងចាប់ផ្តើមនាថ្ងៃទី៤ ខែឧសភា ឆ្នាំ២០១៤ ខាងមុខនេះនៅមណ្ឌលកីឡា C.C.C ចាប់ពីម៉ោង៧ព្រឹកតទៅ ។
ចំពោះវិញ្ញាសានៃការប្រកួតចែកចេញជា៣ គឺ១-អាយុ១៣ឆ្នាំដល់១៧ឆ្នាំ (បុរស-នារី) ហែលទឹកចម្ងាយ១៥០ម៉ែត្រ+រត់ចម្ងាយ៣.២០០ម៉ែត្រ (៤ជុំ) ។ ២-អាយុ១៨ឆ្នាំដល់៣៥ឆ្នាំ (បុរស-នារី) ហែលទឹកចម្ងាយ៣៥០ម៉ែត្រ+រត់ចម្ងាយ៤.៨០០ម៉ែត្រ (៦ជុំ) និងទី៣-អាយុលើ៣៥ឆ្នាំ (បុរស) ហែលទឹកចម្ងាយ២៥០ម៉ែត្រ+រត់ចម្ងាយ៤.០០០ម៉ែត្រ (៥ជុំ) ។ តាមការឱ្យដឹងពីអគ្គលេខាធិការនៃសហព័ន្ធកីឡាទ្រីយ៉ាត្លុងកម្ពុជា លោកងិន សុខបញ្ញាថា ព្រឹត្តិការណ៍ប្រកួតកីឡា AQUATHLON (ហែលទឹក+រត់ប្រណាំង) នេះលោកសង្ឃឹមថា នឹងមានអត្តពលិកជាង៤០០នាក់ចូលរួមប្រកួត ខណៈកាលពីឆ្នាំមុនសហព័ន្ធទទួលបានកីឡាករ-កីឡាការិនីទាំងបរទេស និងខ្មែរ ជាង៣០០នាក់មកពីតាមក្លិប-សមាគម និងមហាជន ។
លោកបន្តថា ព្រឹត្តិការណ៍នេះធ្វើឡើងក្នុងគោលបំណងពង្រឹងសមត្ថភាពកីឡាករកម្ពុជាឱ្យមានស្តង់ដាអន្តរជាតិ តាមរយៈការបង្កើនចម្ងាយនៃការហែល និងរត់ឱ្យមានចម្ងាយឆ្ងាយជាងមុន និងដើម្បីបង្កើតទំនាក់ទំនងរវាងកីឡាករជាតិ និងបរទេសផងដែរ ។ សូមបញ្ជាក់ថា សហព័ន្ធកីឡាទ្រីយ៉ាត្លុងកម្ពុជាចាប់ផ្តើមទទួលពាក្យពីថ្ងៃផ្សាយដំណឹងនេះតទៅ នៅទីស្នាក់ការគណៈកម្មាធិការជាតិអូឡាំពិកកម្ពុជា និងនៅមណ្ឌលកីឡា C.C.C ឬតាមទូរស័ព្ទលេខ ០១២ ៧៩ ៧៩ ៤៤ / ០១៥ ៨២២ ៥៦៦ រហូតដល់ថ្ងៃទី៣០ ខែមេសា នឹងត្រូវបញ្ចប់ ។ ចំពោះតម្លៃចុះឈ្មោះចូលរួមប្រកួតសម្រាប់ជនជាតិកម្ពុជា ១០.០០០រៀល និងជនបរទេស៤០.០០០រៀល (សិស្ស-និស្សិត មិនតម្រូវឱ្យបង់ប្រាក់ទេ) ៕
ចែករំលែកព័តមាននេះ