ក្រុមហ៊ុនច្បាប់របស់អាមេរិក កាលពីថ្ងៃពុធ ទី២៦ មីនា បានចាប់ផ្តើមធ្វើនូវអ្វីដែលខ្លួនហៅថា ជាសំណុំរឿងបណ្តឹងស៊ីវិលលើកដំបូងចំពោះការធ្លាក់យន្តហោះជើងហោះហើរ MH 370 ហើយបាននិយាយថា ខ្លួនគ្រោងនឹងដាក់ពាក្យប្តឹងដោយទាមទារប្រាក់រាប់លានដុល្លារសម្រាប់ក្រុមគ្រួសារជនរងគ្រោះ ។
ក្រុមហ៊ុនច្បាប់របស់អាមេរិក កាលពីថ្ងៃពុធ ទី២៦ មីនា បានចាប់ផ្តើមធ្វើនូវអ្វីដែលខ្លួនហៅថា ជាសំណុំរឿងបណ្តឹងស៊ីវិលលើកដំបូងចំពោះការធ្លាក់យន្តហោះជើងហោះហើរ MH 370 ហើយបាននិយាយថា ខ្លួនគ្រោងនឹងដាក់ពាក្យប្តឹងដោយទាមទារប្រាក់រាប់លានដុល្លារសម្រាប់ក្រុមគ្រួសារជនរងគ្រោះ ។
ក្រុមហ៊ុនច្បាប់ Ribbeck Law Chartered International មានមូលដ្ឋាននៅទីក្រុងស៊ីកាហ្គោ បាននិយាយថា ខ្លួនបានដាក់ពាក្យបណ្តឹងទាមទារទៅតុលាការនៅរដ្ឋអីុលីណយ សំដៅលើក្រុមហ៊ុនអាកាសចរណ៍ម៉ាឡេស៊ី និងក្រុមហ៊ុនប៊ូអីុង ដោយរិះគន់ក្រុមហ៊ុនទាំងពីរចំពោះមហន្តរាយដែលបានកើតមានឡើងនាពេលនេះ ។
អ្នកស្រីម៉ូនីកា ឃែលលី ប្រធានផ្នែកវិវាទអាកាសចរណ៍របស់ក្រុមហ៊ុនច្បាប់អាមេរិកបានថ្លែងប្រាប់អ្នកសារព័ត៌មាននៅទីក្រុងគូឡាឡាំពួរថា យើងនឹងដាក់ពាក្យប្តឹងទាមទារប្រាក់រាប់លានដុល្លារសម្រាប់អ្នកដំណើរម្នាក់ៗ ដោយផ្អែកលើពាក្យបណ្តឹងកាលពីលើកមុនដែលយើងបានធ្វើពាក់ព័ន្ធនឹងការធ្លាក់ដូចនេះ ។ អ្នកស្រីនិយាយថា ក្រុមហ៊ុនអ្នកស្រីបាននិយាយទៅកាន់សាច់ញាតិជនរងគ្រោះជាច្រើនផ្សេងទៀតនៅប្រទេសចិន និងម៉ាឡេស៊ី អំពីការចាត់វិធានការណ៍ដូចគ្នានេះតាងនាមឱ្យពួកគេ ។
ក្រុមហ៊ុន Ribbeck បានចេញរបាយការណ៍កាលពីថ្ងៃពុធ ទី២៦ មីនា កន្លងទៅដោយនិយាយថា ខ្លួនបានដាក់ពាក្យបណ្តឹងសុំព័ត៌មានរឿងក្តីនៅរដ្ឋអីុលីណយ ដោយស្នើសុំតុលាការបញ្ជាចុងចោទឱ្យផ្តល់នូវភ័ស្តុតាង និងព័ត៌មានលម្អិត ។ ជាពិសេស ឯកសារដែលបាននិងកំពុងស្វែងរកទាក់ទងនឹងការខ្វះចន្លោះផ្នែកមេកានិក និងការរចនាម៉ូដ ឬការប្រព្រឹត្តរបស់ក្រុមហ៊ុនអាកាសចរណ៍ដែលទំនងជានាំទៅដល់គ្រោះមហន្តរាយបែបនេះ ។
របាយការណ៍និយាយថា យើងជឿជាក់ថា ចុងចោទទាំងពីរដែលបានកំណត់ឈ្មោះនោះគឺ ត្រូវទទួលខុសត្រូវចំពោះគ្រោះមហន្តរាយនៃយន្តហោះជើងហោះហើរ MH 370 ។ របាយការណ៍បន្ថែមថានេះជារឿងសំខាន់បំផុតសម្រាប់ជនរងគ្រោះទាំងអស់ដើម្បីឱ្យប្រាកដថា ភាគីដែលទទួលខុសត្រូវទាំងអស់ត្រូវនាំទៅកាត់ទោសដោយមិនមានការលើកលែង ។អ្នកស្រីឃែលលី បន្ថែមថា ក្រុមហ៊ុនប៊ូអីុងនិងក្រុមហ៊ុនអាកាសចរណ៍ម៉ាឡេស៊ី មានពេល៣០ថ្ងៃដើម្បីឆ្លើយតប ហើយអ្នកស្រីបន្តថាបណ្តឹងនេះអាចចំណាយពេលច្រើនឆ្នាំដើម្បីកាត់សេចក្តី ៕
ចែករំលែកព័តមាននេះ