ខេត្តបាត់ដំបង ៖ ប្រជាពលរដ្ឋប្រមាណជាង៤០នាក់បានលើកគ្នាមកពីខេត្តប៉ៃលិនមកដល់សាលាដំបូងខេត្តបាត់ដំបង នៅព្រឹកថ្ងៃទី១៧ កញ្ញា នេះ ដែលពួកគេអះអាងថា មកគាំទ្រនិងសុំជួបមុខលោកមេភូមិរបស់ពួកគេដែលត្រូវសមត្ថកិច្ចខេត្តបាត់ដំបង ឃាត់ខ្លួនពាក់ព័ន្ធនឹងការលក់ដីនៅតំបន់អភិរក្សរបស់បរិស្ថាន ។ ក្រុមអ្នកតវ៉ាទាំងនេះ ហាក់មិនបានដឹងរឿងអ្វីទាំងអស់ នៅពេលសួរនាំអំពីមូលហេតុ នៃការលើក គ្នាមកកាន់តុលាការខេត្តបាត់ដំបងនេះ ។
ប៉ុន្តែពួកគេបានប្រាប់ថា ពួកគេមកពីភូមិភ្នំដំបង សង្កាត់អូរតាវ៉ៅ ក្រុងប៉ៃលិន ខេត្តប៉ៃលិន ដែលមានព្រំ ប្រទល់ជាប់នឹងឃុំសំឡូត និងឃុំមានជ័យ ស្រុកសំឡូត ខេត្តបាត់ដំបង ។ ក្រុមអ្នកតវ៉ានេះខ្លះបាននិយាយថា ពួកគេបានលើកគ្នាមកនេះ គឺមកគាំទ្រ ឬមកសុំជួបសួរទុក្ខលោកមេភូមិភ្នំដំបងរបស់ពួកគេ ឈ្មោះឡុង វុទ្ធី ហៅឡាច ដែលត្រូវកម្លាំងកងរាជអាវុធហត្ថ និងកម្លាំងបរិស្ថានខេត្តឃាត់ខ្លួន កាលពីថ្ងៃទី១៦ កញ្ញា ហើយពេលនេះ គេបានបញ្ជូនមេភូមិរូបនោះ មកកាន់សាលាដំបូងខេត្តហើយ ។
នៅពេលសួរថា តើលោកមេភូមិភ្នំដំបងមានកំហុសអ្វី ទើបត្រូវសមត្ថកិច្ចខេត្តបាត់ដំបងចាប់ខ្លួន? អ្នកភូមិទាំងនេះ ហាក់រារែកក្នុងការផ្ដល់ចម្លើយ.. តែបាននិយាយហាក់មានការលាក់បាំងថា «ពួកខ្ញុំមកគាំទ្រគាត់ ហើយចង់សុំជួបសួរសុខទុក្ខគាត់ ព្រោះគាត់ជាមេភូមិល្អ ចេះជួយដោះស្រាយបញ្ហាជួនពលរដ្ឋ»។ ប៉ុន្តែនៅពេលសួរបញ្ជាក់ថា តើអាចជាប់ពាក់ព័ន្ធនឹងរឿងលក់ដីធ្លីរបស់រដ្ឋទេ? ពួកគាត់ហាក់មិនផ្ដល់ចម្លើយទេ ហើយមានបុរសខ្លះហាមឃាត់មិនឲ្យពួកគាត់និយាយពីរឿងដីនេះ ដែលមើលទៅលើទិដ្ឋភាពនេះ ហាក់ត្រូវបានគេរៀបចំជាស្រេចឱ្យពលរដ្ឋទាំងនេះនិយាយនៅពេលមានការសួរនាំ ។
ប៉ុន្តែបើតាមប្រភពពីសមត្ថកិច្ចបានឲ្យដឹងថា មេភូមិភ្នំដំបង លោកឡុង វុទ្ធី ហៅឡាច ត្រូវបានឃាត់ខ្លួន កាលពីថ្ងៃទី១៦ កញ្ញា ដែលសង្ស័យមានពាក់ព័ន្ធនឹងការលួចលក់«ដីព្រៃតំបន់ប្រើប្រាសច្រើនយ៉ាង» ដែលគ្រប់គ្រងដោយមន្ត្រីបរិស្ថាន នៅក្នុងភូមិសាស្ត្រ ស្រុកសំឡូត ។ ប្រភពដដែលបានឲ្យដឹងទៀតថា បើតាមការស៊ើបអង្កេតរបស់សមត្ថកិច្ចលើសកម្មភាពនៃការលើកគ្នាមកតវ៉ារបស់ពលរដ្ឋខេត្តប៉ៃលិន ខាងលើនេះ គឺអាចមានអ្នករៀបចំជាមុន ឬញុះញង់ឲ្យមានការកេណ្ឌគ្នាមកតវ៉ានេះ ។
អ្នកតវ៉ាត្រូវបានគេរៀបចំឱ្យនិយាយ នៅពេលមានសមត្ថកិច្ច ឬអ្នកសារព័ត៌មានសួរនាំ ។ ដូច្នេះហើយ ទើបពួកគេមិននិយាយអំពីរឿងលោកមេភូមិពួកគេ ពាក់ព័ន្ធនឹងរឿងដីធ្លី ខណៈអ្នកខ្លះអះអាងថា «រឿង
មេភូមិពួកគេ ពាក់ព័ន្ធនឹងរឿងលក់ដីនោះ គឺពួកគេទើបដឹងនៅពេលមកដល់បាត់ដំបង»។ ប៉ុន្តែពេលនោះក៏មានអ្នកខ្លះរារាំងមិនឲ្យពួកគេនិយាយពីរឿងនេះទេ គឺបង្គាប់ឲ្យនិយាយតែពីរឿងមកគាំទ្រ ឬ មកសុំជួបលោកមេភូមិរបស់ពួកគេតែប៉ុណ្ណោះ។
ជាមួយគ្នានេះ សមត្ថកិច្ចក៏បានស៊ើបដឹងដែរថា មានមនុស្ស២នាក់ជាអ្នកនៅពីក្រោយ និងបានរៀបចំឲ្យមានការលើកគ្នាមកតវ៉ានេះ ហើយជន២នាក់នោះក៏ត្រូវគេស៊ើបដឹងថា មានជាប់ពាក់ព័ន្ធនឹងការលួចលក់ដីតំបន់ព្រៃអភិរក្ស នៅក្នុងស្រុកសំឡូតនេះដែរ។ ពេលនេះ តុលាការកំពុងកំពុងសាកសូរជនសង្ស័យឈ្មោះឡុង វុទ្ធី ហៅ ឡាច មេភូមិភ្នំដំបង ខេត្តប៉ៃលិននៅឡើយ តែគេមិនទាន់ដឹងថា តើនឹងត្រូវឃុំខ្លួនឬយ៉ាងណានោះទេ ខណៈក្រុមអ្នកគាំទ្រដែលប្រមូលផ្ដុំគ្នានៅម្ខាងផ្លូវខាងលិចនៃសាលាដំបូងខេត្ត កំពុងរកបាយរកទឹក តែពួកគេមិនបានធ្វើសកម្មភាពអ្វីទេ រីឯសមត្ថកិច្ចក៏មិនបានបញ្ជូនកម្លាំងទៅការពារលើសលប់ដែរ ។ (សម្រួលដោយ៖ ស្រីណា)
ចែករំលែកព័តមាននេះ