រដ្ឋាភិបាលជប៉ុន ផ្តល់ជំនួយសង្គ្រោះបន្ទាន់ដល់ជនភៀសសឹកកម្ពុជា ប្រមាណ១,៨លានដុល្លារ និងវិស័យនានាប្រមាណ ១៧លានដុល្លារ
រាជធានីភ្នំពេញ ៖ កាលពីថ្ងៃទី ២៣ ខែមីនា ឆ្នាំ ២០២៦ ឯកអគ្គរាជទូតជប៉ុនប្រចាំប្រទេសកម្ពុជា ឯកឧត្តម អ៊ូអិណុ…
រាជធានីភ្នំពេញ ៖ កាលពីថ្ងៃទី ២៣ ខែមីនា ឆ្នាំ ២០២៦ ឯកអគ្គរាជទូតជប៉ុនប្រចាំប្រទេសកម្ពុជា ឯកឧត្តម អ៊ូអិណុ អាត់ស៊ូស៊ី បានថ្លែងក្នុងពិធីបើកកម្មវិធីទស្សនៈកិច្ចអ្នកសារព័ត៌មាន ស្ដីពីជំនួយអភិវឌ្ឍន៍ផ្លូវការ (ODA) ជប៉ុន ដូចនេះថា ៖ «មុននឹងចូលប្រធានបទកម្មវិធីថ្ងៃនេះ អនុញ្ញាតិឱ្យរូបខ្ញុំលើកឡើងពីបញ្ហាព្រំដែនបន្តិច ។ ប្រទេសកម្ពុជាកំពុងជួបនឹងស្ថានការណ៍លំបាកយ៉ាងខ្លាំង ចាប់តាំងពីខែឧសភាឆ្នាំមុន ដោយសារជម្លោះព្រំដែនជាមួយប្រទេសថៃ ។ ក្នុងន័យនេះ ខ្ញុំប្រាកដណាស់ថា លោកអ្នកជាច្រើនដែលមានវត្តមាននៅទីនេះបានធ្វើដំណើរទៅកាន់តំបន់ព្រំដែន ហើយបានចូលរួមរាយការណ៍អំពីស្ថានភាពទាំងនោះ» ។
ឯកអគ្គរាជទូតជប៉ុន អ៊ូអិណុ អាត់ស៊ូស៊ី បន្តថា ៖ «ជាថ្មីម្ដងទៀតខ្ញុំសូមចូលរួមរំលែកទុក្ខយ៉ាងក្រៀមក្រំបំផុត ចំពោះជនដែលបានបាត់បង់ជីវិតក្នុងជម្លោះព្រំដែន និងសូមសម្តែងនូវសេចក្តីអាណិតអាសូរដោយស្មោះចំពោះអ្នកដែលបានរងគ្រោះក្រោមរូបភាពនានាទាំងអស់ ។ ប្រទេសជប៉ុនសង្ឃឹមយ៉ាងមុតមាំថា ទំនាក់ទំនងរវាងប្រទេសទាំងពីរនឹងមានភាពប្រក្រតីឡើងវិញឆាប់ៗតាមដែលអាចធ្វើបាន តាមរយៈការអនុវត្តយ៉ាងប្រាកដប្រជានូវកិច្ចព្រមព្រៀងឈប់បាញ់ ការអត់ធ្មត់ជាអតិបរមា និងការបន្ថយភាពតានតឹងតាមរយៈការសន្ទនាដោយសន្តិវិធី ។ ជប៉ុននឹងបន្តកិច្ចសហប្រតិបត្តិការជាមួយប្រទេសពាក់ព័ន្ធ ដើម្បីកាត់បន្ថយភាពតានតឹងបន្ថែមទៀត ហើយនឹងបន្ត ផ្ដល់ការគាំទ្រក្រោមទម្រង់ផ្សេងៗ» ។
ឯកអគ្គរាជទូតជប៉ុន បញ្ជាក់ផងដែរថា សម្រាប់ជំនួយទាក់ទងនឹងបញ្ហាព្រំដែន រដ្ឋាភិបាលជប៉ុន ដោយសហការជាមួយអង្គការ IOM និង UNICEF បានផ្តល់ជំនួយសង្គ្រោះបន្ទាន់ ដែលស្មើរនឹងទឹកប្រាក់ ១,៨00,000 ដុល្លារអាមេរិក ដល់ជនភៀសសឹក នៅតាមតំបន់ព្រំដែនកាលពីខែសីហាឆ្នាំមុន ។ លើសពីនេះ ចាប់តាំងពីខែមករាឆ្នាំនេះ ជប៉ុនបាននិងកំពុងផ្តល់ការគាំទ្រដល់ពលករដែលត្រឡប់មកពីប្រទេសថៃ និងជនងាយរងគ្រោះនៅតាមតំបន់ព្រំដែនផងដែរ ។ ជាងនេះទៅទៀតយើងក៏បាននិងកំពុងបន្តផ្តល់ការគាំទ្រ ដោយសហការ ជាមួយរាជរដ្ឋាភិបាលកម្ពុជា និងអង្គការអន្តរជាតិនានា លើវិស័យនានាដូចជា វិធានការប្រឆាំងគ្រាប់មីន និងយុទ្ធភណ្ឌមិនទាន់ផ្ទុះជាដើមផងដែរ ។ ទំហំទឹកប្រាក់សរុបនៃជំនួយទាំងនេះ គឺប្រមាណ ១៧ លានដុល្លារអាមេរិក ។
ឯកអគ្គរាជទូតក៏បានសង្កត់ធ្ងន់ផងដែរថា ជប៉ុនមានបំណងបន្តគាំទ្រសន្តិភាព និងស្ថិរភាពក្នុងតំបន់ ក៏ដូចជាជំរុញការស្តារ និងអភិវឌ្ឍន៍ជីវភាពរស់នៅរបស់ប្រជាជននៅតាមតំបន់ព្រំដែននាពេលអនាគតផងដែរ ៕
ចែករំលែកព័តមាននេះ