អន្តរជាតិ ៖ តម្លៃប្រេងឆៅអន្តរជាតិបានកើនឡើងជាង ១% នៅថ្ងៃទី២៣ ខែតុលា បន្ទាប់ពីការវាយប្រហាររបស់ក្រុមហ៊ូធីយេម៉ែន (Houthi) នៅប្រទេសអារ៉ាប៊ីសាអូឌីត បានបង្កក្តីបារម្ភអំពីការរំខានបន្ថែមដល់ការផ្គត់ផ្គង់ថាមពលពីតំបន់មជ្ឈិមបូព៌ា។ នេះបើតាមការចេញផ្សាយពី Reuters ។
តម្លៃប្រេងឆៅ Brent ស្តង់ដាអន្តរជាតិ បានកើនឡើង ១,៣០ ដុល្លារអាមេរិក ឬ ១,២% ដល់ ១១៤,៤៧ ដុល្លារក្នុងមួយបារ៉ែល គិតត្រឹមម៉ោង ១:៤០ នាទីរសៀល (ម៉ោងនៅកម្ពុជា)។ ចំណែកប្រេងឆៅ West Texas Intermediate (WTI) របស់សហរដ្ឋអាមេរិក បានកើនឡើង ១,៣៧ ដុល្លារ ឬ ១,៤% ដល់ ១០១,៨៤ ដុល្លារក្នុងមួយបារ៉ែល។
ប្រេងឆៅ Brent កាលពីថ្ងៃទី២២ ខែតុលា ដែលបានទូទាត់នៅក្នុងតម្លៃខ្ពស់បំផុតមិនធ្លាប់មាន គិតចាប់តាំងពីថ្ងៃទី៤ ខែឧសភា ត្រូវបានរំពឹងថា នឹងបិទការជួញដូរសប្តាហ៍នេះ តម្លៃខ្ពស់ជាងមុន សម្រាប់សប្តាហ៍ទី៣ជាប់គ្នា ខណៈដែលប្រេងឆៅ WTI ក៏ស្ថិត នៅក្នុងការបញ្ចប់ទៅដោយតម្លៃខ្ពស់ជាងមុន សម្រាប់សប្តាហ៍ទី២ជាប់គ្នាផងដែរ។
ក្រុមហ៊ុនប្រេងយក្សអារ៉ាប៊ីសាអូឌីត Saudi Aramco កាលពីថ្ងៃទី២២ តុលា បានបញ្ជាឱ្យជម្លៀសបុគ្គលិកចេញពីទីស្នាក់ការកណ្តាល នៅក្នុងទីក្រុងដាហរ៉ាន (Dhahran) នៅឈូងសមុទ្រក្បែរប្រទេសបារ៉ែន ខណៈការប្រយុទ្ធគ្នាបានកើនឡើងយ៉ាងខ្លាំងជាមួយក្រុមហ៊ូធី ដែលមានមូលដ្ឋាននៅប្រទេសយេម៉ែន។
ការប៉ះទង្គិចរវាងក្រុមប្រដាប់អាវុធហ៊ូធី និងសម្ព័ន្ធមិត្តដឹកនាំដោយអារ៉ាប៊ីសាអូឌីត ដែលគាំទ្ររដ្ឋាភិបាលស្របច្បាប់របស់ប្រទេសយេម៉ែន បានផ្ទុះឡើងយ៉ាងខ្លាំងក្លា ចាប់តាំងពីការវាយប្រហាររបស់ក្រុមហ៊ូធីគាំទ្រដោយអ៊ីរ៉ង់ បានរុញឆ្ពោះទៅកាន់ច្រកសមុទ្រ បាប់ អែលម៉ាន់ដេប (Bab el-Mandeb) ដែលជាចំណុចរាំងស្ទះផ្លូវនាវាចរណ៍ដ៏សំខាន់មួយនៅមាត់សមុទ្រក្រហម៕
ចែករំលែកព័តមាននេះ