រយៈពេល១សប្ដាហ៍ហើយ ស្ថានភាពជំងឺក្មេងប្រុសម្នាក់ដែលត្រូវគេវា.យដំនៅសាលាឯកជនមួយ នៅតែមិនទាន់ធូរស្រាល
- បាត់ដំបង
ខេត្តបាត់ដំបង ៖ កុមារាអាយុ០៦ឆ្នាំម្នាក់ ដែលម្ដាយអះអាងថា បានរងរបួសធ្ងន់ធ្ងរត្រង់ឆ្អឹងខ្នង និងសាច់ដុំ ដោយសារត្រូវកូនសិស្សក្នុងថ្នាក់រៀនជាមួយគ្នា វាយដំផ្ទប់ទៅនឹងជញ្ជាំងកាលពីសប្ដាហ៍មុននៅក្នុងបន្ទប់រៀនសាលាភាសាអន្តរជាតិមួយកន្លែង ស្ថិតនៅភូមិសំណាញ់ ឃុំភ្នំសំពៅ ស្រុកបាណន់ រហូតមកដល់ថ្ងៃនេះ ស្ថានភាពជំងឺរបស់កុមារានោះនៅតែមិនទាន់បានធូរស្រាលនៅឡើយទេ ហើយកំពុងសម្រាកព្យាបាលនៅមន្ទីរពេទ្យ «គន្ធបុប្ផា»ខេត្តសៀមរាបនៅឡើយ ខណៈនាយកសាលាភាសាអន្តរជាតិមួយនេះ បានបដិសេធមិនទទួលខុសត្រូវចំពោះអំពើហិង្សានេះទេ ។ នេះបើតាមម្ដាយកុមាររងគ្រោះបានបញ្ជាក់ប្រាប់តាមទូរស័ព្ទ ។
អ្នកស្រី វង កន្និដ្ឋា ម្ដាយកុមាររងគ្រោះបានថ្លែងប្រាប់កោះសន្តិភាពតាមទូរស័ព្ទ នៅព្រឹកថ្ងៃទី២៣ តុលា នេះថា កូនប្រុសគាត់ឈ្មោះ យ៉ន គឹមយីសិរីវឌ្ឍនា អាយុ០៦ឆ្នាំ រៀននៅសាលាឯកជន «សាលាភាសារអន្តរជាតិ ឡៃហ្វ៏ ប្រ៊ីដហ្គ៏» ដែលមានទីតាំងនៅភូមិសំណាញ់ ឃុំភ្នំសំពៅ ស្រុកបាណន់ ។ អ្នកស្រីបានប្រាប់ថា អំពើហិង្សាដែលបានកើតឡើងមកលើកូនប្រុសគាត់នេះ បានកើតឡើងកាលពីថ្ងៃទី១៦ តុលា នៅក្នុងបន្ទប់សាលាភាសាអន្តរជាតិខាងលើនេះតែម្ដង ។ កូនប្រុសគាត់ត្រូវកូនសិស្សដែលរៀននៅសាលាជាមួយគ្នាវាយដំ និងធាក់ត្រូវចំចង្កេះផ្ទប់ទៅនឹងជញ្ជាំង បណ្ដាលឲ្យរងរបួសយ៉ាងធ្ងន់ធ្ងរ រហូតត្រូវបញ្ជូនទៅសង្គ្រោះបន្ទាន់នៅមន្ទីរពេទ្យ «គន្ធបុប្ផា» នៅខេត្តសៀមរាប ។ ប៉ុន្តែត្រូវបាននាយកសាលាភាសាអន្តរជាតិមួយនេះបដិសេធមិនទទួលខុសត្រូវឡើយ ។
អ្នកស្រីបានទៅសួរនាំរឿងនេះដល់សាលា តែនាយកសាលានេះបានបដិសេធថា រឿងនេះ មិនបានកើតឡើងនៅក្នុងសាលាគេទេ (សាលាភាសាអន្តរជាតិ ឡៃហ្វ៏ ប្រ៊ីដហ្គ៏)។ អ្នកស្រីបានទាមទាឲ្យនាយកសាលានេះ ត្រូតពិនិត្យកាមេរ៉ាសុវត្ថិភាព តែនាយកសាលានេះមិនព្រមមើលទេ បែរជាថា កាមេរ៉ាសុវត្ថិភាព «ខូច មើលមិនឃើញ» ។
គាត់បានប្រាប់ថា ក្រោយពីនាយកសាលាឯកជនមួយនេះ បដិសេធមិនទទួលខុសត្រូវលើកូនប្រុសគាត់ គាត់ក៏បានទៅដាក់ពាក្យបណ្ដឹងនៅប៉ុស្ដិ៍នគរបាលឃុំភ្នំសំពៅ ប៉ុន្តែនាយកសាលានេះ នៅតែបដិសេធមិនទទួលខុសត្រូវចំពោះអំពើហិង្សា ដែលកើតឡើងលើកូនប្រុសគាត់ដដែល ។
អ្នកស្រី វង ឈឹមកន្និដ្ឋា បានបញ្ជាក់ថា ពេលនេះ កូនប្រុសអ្នកស្រីកំពុងសម្រាកព្យាបាលនៅមន្ទីរពេទ្យ«គន្ធបុប្ផា»ខេត្តសៀមរាប ដែលក្រុមគ្រួពេទ្យកំពុងតាមដានជំងឺនឡើយ ។ ក្រុមគ្រូពេទ្យបានប្រើប្រាស់គ្រប់មធ្យោបាយ ដើម្បីថតឆ្លុះ និងតាមដានជំងឺកូនប្រុសគាត់ និងបានរកឃើញថា កូនប្រុសគាត់រងរបួស «ត្រង់ឆ្អឹងចង្កេះ ឆ្អឹងជំនីរ និង សាច់ដុំ» ។ គាត់បានបន្ថែមថា ពេលនេះ កូនប្រុសគាត់អាចងើបដើរបាន តែនៅឈឺចុកចាប់ខ្លាំង ហើយងើបដើរមិនត្រង់ចង្កេះទេ ដូច្នេះហើយ ទើបគ្រូពេទ្យត្រូវការតាមដានបន្តទៀត ។
ឆ្លើយតបទៅនឹងការចោទប្រកាន់់ខាងលើនេះ អ្នកស្រី នូ ស្រីម៉ិច នាយការសាលាភាសាអន្តរជាតិ «ឡៃហ្វ៏ ប្រ៊ីដហ្គ៏» មិនបានបំភ្លឺតបជាវិជ្ជមានទៅនឹងសំណួរកោះសន្តិភាពទេ ដោយអ្នកស្រីបានជម្រុញឲ្យទៅសួរនាំលោកប៉ូលិសវិញ ។ អ្នកស្រីនាយករូបនេះ បានឆ្លើយតបតាមទូរស័ព្ទត្រឡប់មកវិញយ៉ាងដូច្នេះថា «ទាក់ទងនឹងរឿងនេះដែរ ដោយសារតែខាងសាលាបានសហការជាមួយប៉ូលិសបានដឹងឮ បានចុះមកស៊ើប បានបំភ្លឺអីអស់ហើយ ។ ចឹងបើបងចង់សួរ ចង់សម្ភាសន៍ ឬបងចង់ដឹងព័ត៌មានអី បងអាចស្នើសុំទៅខាងប៉ុស្ដិ៍សិនទៅ ព្រោះប៉ូលិសកំពុងតែធ្វើការដែរ» ។
នាយករូបនេះ បានពន្យល់កោះសន្តិភាពបន្ថែមថា «មូលហេតុ ដែលខ្ញុំចង់ឲ្យទៅសម្ភាសន៍ប៉ូលិស ដោយសារតែប៉ូលិសដឹងរឿងអស់ហើយ ខ្ញុំគ្រាន់តែសុំអនុញ្ញតពីប៉ូលិសសិនថា តើអាចផ្ដល់បទសម្ភាសន៍ឱ្យបងបានដែរឬអត់ ? ដូច្នេះ ខ្ញុំសុំការអនុញ្ញាពីប៉ុស្ដិ៍សិន ចឹងខ្ញុំខលទៅប្រាប់គាត់បន្តិចសិន»។
គេមិនទាន់ដឹងថា តើនាយកសាលាឯកជន ដែលរងការប្ដឹងចោទប្រកាន់ម្នាក់នេះ ត្រូវជាអ្វីនឹងលោកមេប៉ុស្ដិ៍នគរបាលភ្នំសំពៅនោះទេ ទើបត្រូវការសុំយោបល់លោកមន្ត្រីប៉ុស្ដិ៍ជាមុនសិន មុននឹងផ្ដល់បទសម្ភាសន៍ជាមួយកោះសន្តិភាព? មិនត្រឹមតែមិនព្រមបំភ្លឺប៉ុណ្ណោះទេ នាយករូបនេះថែមទាំងបានជម្រុញឲ្យកោះសន្តិភាពទៅសួរនាំទៅមន្ត្រីនគរបាលប៉ុស្ដិ៍ទៀត ដោយបញ្ជាក់ថា «រឿងនេះ ប៉ូលិសដឹងឮអស់ហើយ» តើសំណុំរឿងនេះ លោកមេប៉ុស្ដិ៍នគរបាលភ្នំសំពៅបានដឹងស៊ីជម្រៅដល់កំរិតណាដែរ ទើបភាគីចុងចោទខាងលើនេះផ្ដល់ទំនុកចិត្តដល់ម្លឹង?
នាយប៉ុស្ដិ៍នគរបាលរដ្ឋបាលភ្នំសំពៅ លោក ឈឿន ចាន់ណារិទ្ធ ក៏មិនបានផ្ដល់ចម្លើយពិស្ដារជុំវិញសំណុំរឿងនេះដែរ ។ ការផ្ដល់ចម្លើយរបស់លោក ហាក់ស្រដៀងគ្នាទៅនឹងការផ្ដល់ចម្លើយរបស់អ្នកស្រីនាយកសាលាភាសារអន្តរជាតិខាងលើនេះដែរ ដោយលោកមេប៉ុស្ដិ៍រូបនេះ បានជម្រុញឲ្យកោះសន្តិភាពសួរនាំទៅថ្នាក់លើវិញ ។
លោក ឈឿន ចាន់ណារិទ្ធ បានផ្ដល់ចម្លើយដូច្នេះថា «រឿងនេះ ខ្ញុំបញ្ជូនទៅស្រុកហើយ ចឹងបងអាចសួរទៅស្រុកបានណាបង» ។ សំណួរកោះសន្តិភាព៖ ខ្ញុំចង់ដឹងបឋមពីមូលដ្ឋានសិន តើក្រោយពីទទូលបណ្ដឹងហើយ យើងបានចុះស្រាវជ្រាវមើលកាមេរ៉ាសុវត្ថិភាពដែរឬយ៉ាងណា ? ចម្លើយលោកនាយប៉ុស្ដិ៍ «យើងបានស្រាវជ្រាវរួចហើយ បានបញ្ជូនទៅស្រុក» ។ តើរកឃើញភស្ដុតាងឃើញមានក្មេងៗវាយតប់គ្នាដែរឬទេ? លោកមេប៉ុស្ដិ៍ «អត់មានកាមេរ៉ាទេ» ប៉ុន្តែក្រោយមក លោកនាយប៉ុស្ដិ៍រូបនេះបញ្ជាក់ប្រាប់វិញថា «កាមេរ៉ាមានដែរ តែមានបំពាក់នៅកន្លែងគិតលុយ ហើយខូចទៀត» ។ យ៉ាងណា នេះជាការឆ្លើយបំភ្លឺរបស់មន្ត្រីប៉ុស្តិ៍ដែលទទួលបណ្ដឹងជនរងគ្រោះ ។
ដោយឡែក បើនិយាយពីភាគីដើមបណ្ដឹងវិញ គឺលោកស្រី វង ឈឹមកន្និដ្ឋា បានបញ្ជាក់ថា កូនស្រីគាត់ម្នាក់អាយុ០៥ឆ្នាំ (ប្អូនជនរងគ្រោះ) នៅក្នុងបន្ទប់រៀនដែរ បានឃើញផ្ទាល់ភ្នែកជាមួយនឹងក្មេងៗដទៃទៀត ហើយថែមទាំងស្គាល់ឈ្មោះអ្នកវាយកូនប្រុសគាត់នោះទៀតផង នៅពេលក្មេងប្រុសម្នាក់ទៀតកំពុងវាយទាត់ធាក់កូនគាត់ ។ អ្នកស្រីបានស្នើសុំឲ្យសមត្ថកិច្ច និងត្រូវតែធ្វើការស៊ើបអង្កេតលើសំណុំរឿងនេះឲ្យបានត្រឹមត្រូវ យុត្ដិធម៌ និងឲ្យមានតម្លាភាព ព្រោះពេលនេះ ស្ថានភាពជំងឺកូនប្រុសអ្នកស្រី ហាក់មិនទាន់បានធូរស្រាលនៅឡើយទេ ហើយអាចប្រឈមនឹងពិការភាពទៀតផង ព្រោះពេលនេះ ក្រុមគ្រូពេទ្យបាននិងកំពុងតាមដានពីស្ថានភាពជំងឺកូនប្រុសគាត់យ៉ាងហ្មត់ចត់បំផុត ។
អ្នកស្រីបន្ថែមថា បើសមត្ថកិច្ចដោះស្រាយមិនចេញទេ ត្រូវតែបញ្ជូនសំណុំរឿងនេះទៅកាន់តុលាការហើយ ៕
ចែករំលែកព័តមាននេះ