ឃាត់ខ្លួនជនសង្ស័យ២នាក់ ពាក់ព័ន្ធករណីកា.ប់ប្ល.ន់យកម៉ូតូចំនួន២គ្រឿងបានសម្រេច
- កំពង់ស្ពឺ
ខេត្តកំពង់ស្ពឺ ៖ ជនសង្ស័យជាមុខសញ្ញាកាប់ប្លន់យកម៉ូតូបានសម្រេចចំនួន២នាក់ ក្នុងចំណោមបក្សពួកជិត១០នាក់ ត្រូវបានកម្លាំងនគរបាលស្រុកគងពិសី សហការជាមួយនគរបាលស្រុកបាទី ខេត្តតាកែវ ធ្វើការស្រាវជ្រាវឈានទៅឃាត់ខ្លួន ខណៈដែលក្រុមជនសង្ស័យធ្វើសកម្មភាពយកកាំបិតផ្គាក់កំហែងយកម៉ូតូចំនួន២គ្រឿងរបស់ជនរងគ្រោះបានសម្រេច ។
នគរបាលស្រុកគងពិសីបាននិយាយឲ្យដឹងថា ការឃាត់ខ្លួនក្រុមជនសង្ស័យពាក់ព័ន្ធករណីកំហែងយកម៉ូតូបានធ្វើឡើង កាលពីថ្ងៃទី២១ ខែតុលា ឆ្នាំ២០២៦ លោកអធិការរងទទួលផែនការងារព្រហ្មទណ្ឌ បានដឹកនាំកម្លាំងជំនាញ សហការជាមួយកម្លាំងប៉ុស្តិ៍នគរបាលជង្រុក និងនគរបាលប៉ុស្តិ៍តាំងដូង ស្រុកបាទី ខេត្តតាកែវ បានធ្វើការស្រាវជ្រាវកំណត់មុខសញ្ញាឈានដល់ការបង្ក្រាបជនសង្ស័យចំនួន២៖ ពាក់ព័ន្ធក្នុងករណីកាប់ប្លន់យកម៉ូតូ នៅចំណុចផ្លូវបេតុងភូមិក្របីត្រាំ ឃុំជង្រុក ស្រុកគងពិសី ខេត្តកំពង់ស្ពឺ ។
នគរបាលស្រុកគងពិសីបានបន្តឲ្យដឹងទៀតថា ជនសង្ស័យជាមុខសញ្ញាកំហែងយកម៉ូតូដែលត្រូវបានឃាត់ខ្លួនទី១-ឈ្មោះ តាន់ វណ្ណៈ ភេទប្រុស អាយុ២២ឆ្នាំ មុខរបរមិនពិតប្រាកដ រស់នៅក្នុងភូមិព្រៃក្រាយ ឃុំតាំងដូង ស្រុកបាទី ខេត្តតាកែវ និងទី២- ឈ្មោះ ទែន វិរៈបុត្រ ភេទប្រុស អាយុ២៦ឆ្នាំ មុខរបរមិនពិតប្រាកដ រស់នៅក្នុងភូមិបាំងណា ឃុំជង្រុក ស្រុកគងពិសី ខេត្តកំពង់ស្ពឺ ។
នគរបាលស្រុកគងពិសីបានបន្តទៀតថា នៅមុនពេលស្រាវជ្រាវឃាត់ខ្លួនជនសង្ស័យបាន គឺនៅវេលាម៉ោង៨ និង២៣នាទីយប់ថ្ងៃទី២០ ខែតុលា ឆ្នាំ២០២៦ ស្ថិតនៅលើផ្លូវបេតុង ក្នុងភូមិក្របីត្រាំ ឃុំជង្រុក ស្រុកគងពិសី ខេត្តកំពង់ស្ពឺ មានករណីកំហែងយកម៉ូតូចំនួន២គ្រឿងម៉ាកហុងដាសេ១២៥ ស៊េរីឆ្នាំ២០១៩ ពណ៌ខ្មៅពាក់ផ្លាកលេខ កំពង់ស្ពឺ1N-4424 របស់ឈ្មោះ រិន ឧត្តម ភេទប្រុស អាយុ១៨ឆ្នាំ រស់នៅភូមិក្របីត្រាំ ឃុំជង្រុក ស្រុកគងពិសី ខេត្តកំពង់ស្ពឺ និង១គ្រឿងទៀតម៉ាកហុងដាសេ១២៥ ស៊េរីឆ្នាំ២០២៦ពណ៌ខ្មៅ ពាក់ផ្លាកលេខភ្នំពេញ1MR-8797 របស់ឈ្មោះ នាង ភារម្យ ភេទប្រុស អាយុ១៧ឆ្នាំ ស្នាក់នៅក្នុងភូមិបឹងទ័ពព្យុះឃុំជង្រុក ស្រុកគងពិសី ខេត្តកំពង់ស្ពឺ បង្កដោយជនមិនស្គាល់អត្តសញ្ញាណមួយក្រុមមានគ្នាប្រហែល១០នាក់ ប្រដាប់ដោយកាំបិតផ្គាក់ បានធ្វើសកម្មភាពដេញកាប់ទៅលើជនរងគ្រោះទាំង២នាក់ខាងលើ រួចជនរងគ្រោះក៏បានផ្ដួលម៉ូតូរត់គេចខ្លួនដើម្បីរកគេជួយ ។ បន្ទាប់មក ក្រុមជនសង្ស័យ ក៏បានលើកម៉ូតូទាំង២គ្រឿងខាងលើរបស់ជនរងគ្រោះជិះយកទៅបាត់ ។
នគរបាលស្រុកគងពិសីបានបន្ថែមទៀតថា លុះរហូតដល់វេលាម៉ោង១២និង១០នាទី ថ្ងៃត្រង់ថ្ងៃទី២១ ខែតុលា ឆ្នាំ២០២៦ កម្លាំងជំនាញព្រហ្មទណ្ឌស្រុកគងពិសី សហការជាមួយកម្លាំងប៉ុស្តិ៍នគរបាលរដ្ឋបាលឃុំតាំដូង ស្រុកបាទី ខេត្តតាកែវ ធ្វើការស្រាវជ្រាវតាមប្រព័ន្ធ GPS កំណត់បានទីតាំងផ្តាច់ GPS ក៏បន្តចុះទៅដល់ទីតាំងផ្ទះ ឈ្មោះ តាន់ វណ្ណៈ ភេទប្រុស អាយុ២២ឆ្នាំ ស្ថិតនៅក្នុងភូមិព្រៃក្រាយ ឃុំតាំងដូង ស្រុកបាទី ខេត្តតាកែវ រកឃើញវត្ថុតាង រួមមានក្បាំងម៉ូតូចំនួន២ឈុត ជាក្បាំងម៉ូតូរបស់ជនរងគ្រោះខាងលើ រួចក៏បានឃាត់ខ្លួនម្ចាស់ផ្ទះឈ្មោះ តាន់ វណ្ណៈ ខាងលើ សួរនាំជនសង្ស័យបានឆ្លើយថា មានឈ្មោះទែន វិរៈបុត្រ ភេទប្រុស អាយុ២៦ឆ្នាំ រស់នៅក្នុងភូមិជង្រុក ឃុំជង្រុក ស្រុកគងពិសី ខេត្តកំពង់ស្ពឺ និងបក្សពួកចំនួន៣នាក់ផ្សេងទៀត បានជិះម៉ូតូចំនួន៣គ្រឿងម៉ាកហុងដាសេ១២៥ ចូលផ្ទះរបស់ខ្លួនរួចបានផ្តាច់GPS ហើយក៏ឱ្យខ្លួនជួយដោះក្បាំងម៉ូតូទុកនៅទីនេះ ។
បន្ទាប់ពីបានចម្លើយជនសង្ស័យ នគរបាលបានបន្តឃាត់ខ្លួនឈ្មោះ ទែន វិរៈបុត្រ បានឆ្លើយសារភាពថា ខ្លួនស្គាល់បក្សពួកមួយចំនួន÷ ទី១-ឈ្មោះ អាកា ភេទប្រុស អាយុ១៨ឆ្នាំ រស់នៅភូមិក្របីត្រាំ ឃុំជង្រុក ស្រុកគងពិសី ខេត្តកំពង់ស្ពឺ (រត់គេចខ្លួន)
ទី២-ឈ្មោះ អា និត ភេទប្រុស អាយុ១៨ឆ្នាំ រស់នៅភូមិក្របីត្រាំ ឃុំជង្រុក ស្រុកគងពិសី ខេត្តកំពង់ស្ពឺ (រត់គេចខ្លួន) ទី៣-ឈ្មោះ អា ហេង ភេទប្រុស អាយុ១៦ឆ្នាំ រស់នៅភូមិក្របីត្រាំឃុំជង្រុក ស្រុកគងពិសី ខេត្តកំពង់ស្ពឺ(រត់គេចខ្លួន) ទី៤-ឈ្មោះ អាញ្ញា ភេទប្រុសអាយុ២៦ឆ្នាំរស់នៅភូមិជង្រុក ឃុំជង្រុក ស្រុកគងពិសី ខេត្តកំពង់ស្ពឺ (រត់គេចខ្លួន) និងទី៥-ឈ្មោះ អា ត្រេន ភេទប្រុស អាយុ១៤ឆ្នាំ រស់នៅភូមិសង្គ្រោម ឃុំជង្រុក ស្រុកគងពិសី ខេត្តកំពង់ស្ពឺ (រត់គេចខ្លួន) និងបក្ខពួក៣នាក់ ទៀតមិនស្គាល់អត្តសញ្ញាណ បានរត់គេចខ្លួនបាត់ហើយ ។ ក្រោយឃាត់ខ្លួនក្រុមជនសង្ស័យនគរបាលបានធ្វើការដកហូតវត្ថុតាង មានក្បាំងម៉ូតូចំនួន២ឈុត កូនសោ និងទុលណឺវីសជាច្រើនថែមទៀតផង ។
នគរបាលស្រុកគងពិសីបានបញ្ជាក់ឲ្យដឹងថា បច្ចុប្បន្ន ក្រុមជនសង្ស័យរួមជាមួយនឹងវត្ថុតាងនគរបាលបានកសាងសំណុំរឿងបញ្ជូនទៅស្នងការដ្ឋាននគរបាលខេត្តកំពង់ស្ពឺ ដើម្បីចាត់ការបន្តតាមផ្លូវច្បាប់ ៕
ចែករំលែកព័តមាននេះ