ខេត្តបាត់ដំបង ៖ «ករណីលួចកាត់ខ្សែភ្លើង» បន្ទាប់ពីត្រូវកម្លាំងជំនាញ នៃអធិការដ្ឋាននគរបាលក្រុងបាត់ដំបង ក្របួចកជាប់ លោកចោរសកម្មចំនួន ២នាក់ បានសារភាពនៅចំពោះមុខសមត្ថកិច្ចថា «ពួកខ្ញុំដើរលួចកាត់ខ្សែភ្លើង ដើម្បីយកទៅលក់យកលុយទិញបាយហូប និងទិញថ្នាំញៀនជក់» ។
ជនសង្ស័យពាក់ព័ន្ធនឹងអំពើចោរកម្មយ៉ាងសកម្មចំនួន ២នាក់នេះ ត្រូវបានកម្លាំងជំនាញ នៃអធិការក្រុងបាត់ដំបង ធ្វើការស្រាវជ្រាវរហូតឈានដល់ការឃាត់ខ្លួនបានជាបន្តបន្ទាប់ នៅព្រឹកថ្ងៃទី២៣ តុលា ក្រោយពីទទួលបានព័ត៌មានថា ជនទាំង២នាក់ បានធ្វើសកម្មភាពលួចកាត់ខ្សែភ្លើងអ្នកភូមិចំនួន ២កន្លែងផ្សេងគ្នាក្នុងថ្ងៃតែមួយ នៅវេលារំលងអធ្រាត្រឈានចូលថ្ងៃទី២៣ តុលា នៅក្នុងសង្កាត់អូរម៉ាល់ និងសង្កាត់វត្តគរ។ បើតាមរបាយការណ៍របស់សមត្ថកិច្ច ទី១-នៅចំណុចភូមិដំណាក់ហ្លួង សង្កាត់វត្តគរ និងទី២-នៅចំណុចបុរី «សាន្ត សុវណ្ណារី» ស្ថិតក្នុងភូមិសាលាបាឡាត់ សង្កាត់អូរម៉ាល់ ។
តាមរយៈរបាយការណ៍របស់អធិការក្រុងបាត់ដំបង លោក ពេជ្រ សារ៉ែន បានឱ្យដឹងថា ជនសកម្មក្នុងអំពើចោរកម្មទាំង២នាក់ ម្នាក់ឈ្មោះ ហេង ម៉ីញថុង ភេទប្រុស អាយុ ២៨ឆ្នាំ នៅភូមិរំចេក៣ សង្កាត់រតនៈ ក្រុងបាត់ដំបង និងម្នាក់ទៀតឈ្មោះ ផាន់ ចេម ភេទប្រុស អាយុ ២៥ឆ្នាំ នៅភូមិចម្ការឬស្សី សង្កាត់ព្រែកព្រះស្ដេច ក្រុងបាត់ដំបង ។
នៅចំពោះមុខមន្ត្រីសួរចម្លើយ ជនសកម្មខាងលួចទាំង២នាក់ បានឆ្លើយសារភាពព្រមៗគ្នាថា «ពួកខ្ញុំពិតជាបានលួចកាត់ខ្សែភ្លើងគេនៅទាំង២ចំណុចខាងលើមែន» ហើយថែមទាំងសារភាពថា ពួកខ្លួនបានបបូលគ្នាលួចកាត់ខ្សែភ្លើងយកទៅលក់យកលុយទិញបាយហូប និងទិញថ្នាំញៀនជក់។ សូមបញ្ជាក់ថា នៅម្ដុំបុរី «សាន្ត សុវណ្ណារី» ក្នុងទឹកដីសង្កាត់អូរម៉ាល់ និងសង្កាត់វត្តគរខាងលើនេះ ពួកចោរតែងធ្វើសកម្មភាពញឹកញាប់ណាស់ ។
បើតាមរបាយការណ៍ដដែល លោក ពេជ្រ សារ៉ែន បានឱ្យដឹងដែរថា ជាមួយនឹងការឃាត់ខ្លួនជនដៃដល់ទាំង២នាក់នេះ មន្ត្រីជំនាញដកហូតវត្ថុតាងបានរួមមាន៖ កន្ត្រៃ កាំបិត ដង្កាប់ ការ៉ុង ខ្សែភ្លើងមួយចំនួន និងម៉ូតូមួយគ្រឿងសម្រាប់ជិះធ្វើសកម្មភាពលួច។
ជុំវិញអំពើចោរកម្មដែលកើតឡើងគ្មានពេលស្រាកស្រាន្តខាងលើនេះ បើតាមអ្នកភូមិបានលើកឡើងថា ពេលខ្លះម្ចាស់ផ្ទះដេករង់ចាំមើលសកម្មភាពចោរលួចកាត់ខ្សែភ្លើង ឬធ្វើសកម្មភាពលួចរបស់របរផ្សេងៗស្ទើររាល់យប់ ប៉ុន្តែពេលដេកចាំឃ្លាំមើល មិនដែលប្រទះនឹងចោរធ្វើសកម្មភាពទេ លុះជ្រុលម៉ោងដេកលក់មួយភាំង លោកចោរចូលគាស់ផ្ទះ ឬលួចកាត់ខ្សែភ្លើងងងិតឈឹងកណ្ដាលយប់ ឬទៀបភ្លឺ។ សូម្បីតែបង្គោលសូឡាដែលម្ចាស់ផ្ទះដាក់បំភ្លឺតាមដងផ្លូវ ក៏លោកចោរមិនទុកឱ្យនៅបំភ្លឺបានយូរដែរ ពោលគឺលោកចោរលួចខ្ទេច លួចខ្ទីតែម្ដង ។
ប៉ុន្តែយ៉ាងណា ក្រោយសមត្ថកិច្ចចាប់បានជនសង្ស័យទាំង២នាក់នេះ ពលរដ្ឋរំពឹងថាបញ្ហាអសន្តិសុខនៅក្នុងមូលដ្ឋាននឹងបានធូរស្រាលខ្លះហើយ ៕
ចែករំលែកព័តមាននេះ