រាជធានីភ្នំពេញ ៖ លោកស្រីកិត្តិសង្គហបណ្ឌិត ម៉ែន សំអន ឧបនាយករដ្ឋមន្ត្រី រដ្ឋមន្ត្រីក្រសួង ទំនាក់ទំនងជាមួយរដ្ឋសភាព្រឹទ្ធសភា និងអធិការកិច្ចបានបញ្ជាក់ថា រដ្ឋាភិបាលបានខិតខំប្រឹងប្រែង ដើម្បីឲ្យប្រជាពលរដ្ឋមានជំនឿចិត្តលើសាសនា ។ លោកស្រីក៏បានលើកឡើងអញ្ជើញចូលរួមក្នុងពិធីសូត្រមន្តកាន់បិណ្ឌវេនទី៤ នៅវត្តសារាវន្តតេជោរាជធានីភ្នំពេញ ដើម្បីឧទ្ទិសដល់ដួងវិញ្ញាណក្ខន្ធរបស់ឥស្សរជនវីរជន យុទ្ធជន ដែលបានលះបង់ជីវិតក្នុងបុព្វហេតុរំដោះជាតិនារសៀល ថ្ងៃទី១៦ កញ្ញាថា សម័យប៉ុលពតបានបំផ្លិចបំផ្លាញសាសនា ទីវត្តអារាមស្ទើរតែទាំងស្រុង និងបានធ្វើទារុណកម្មលើប្រជាពលរដ្ឋស្លូតត្រង់យ៉ាងអាណោចអាធម ។
ដូច្នេះក្រោយថ្ងៃរំដោះ៧មករា ឆ្នាំ១៩៧៩ ព្រះពុទ្ធសាសនាបានរស់ឡើងវិញក្នុងនោះសាសនាដទៃក៏បានរស់ឡើងវិញដែរ ។ លោកបានបញ្ជាក់ថា ៖«អីញ្ចឹងហើយបានជាប្រមុខរាជរដ្ឋាភិបាលបានខិតខំប្រឹងប្រែង ដើម្បីផ្តល់នូវជំនឿទំនុកទុកចិត្តទៅលើប្រជាពលរដ្ឋទៅលើព្រះពុទ្ធសាសនាបាននាំនូវទំនៀមទំលាប់ប្រពៃណីដែលជាបុណ្យសម្រាប់យើងទាំងអស់គ្នា ។ ដូច្នេះថ្ងៃដឹងគុណបុណ្យភ្ជុំបិណ្ឌ ដើម្បីជូនដល់វិញ្ញាក្ខន្ធយាងមកអញ្ជើញទទួលយកផល្លានុសង្ឃទាំងអស់គ្នា» ។
លោកបន្តថា ការធ្វើបុណ្យកាន់បិណ្ឌនេះ ដើម្បីឧទ្ទិសដល់ដួងវិញ្ញាណក្ខន្ធរបស់ឥស្សរជនវីរជន យុទ្ធជនដែលបានលះបង់ជីវិត ដើម្បីបុព្វហេតុរំដោះជាតិ និងប្រជាជនពីរបបអនានិគមចាស់ ថ្មី និងពីរបបប្រល័យពូជសាសន៍ប៉ុលពតហើយជាពិសេសជាងនេះទៅទៀត គឺប្រជាជនស្លូតត្រង់ដែលទទួលទុក្ខទារុណកម្មយ៉ាងព្រៃផ្សៃ និងស្លាប់យ៉ាងអយុត្តិធម៌នៅក្នុងរបបកម្ពុជាប្រជាធិបតេយ្យ ដោយសូមឲ្យដួងវិញ្ញាណក្ខន្ធអ្នកទាំងអស់ឲ្យបានទៅកាន់សុគតិភពកុំបីឃ្លៀងឃ្លាត ឡើយ ។
លោកស្រី ម៉ែន សំអនក៏បានបួងសួង ថ្វាយព្រះពរជ័យ ថ្វាយព្រះមហាក្សត្រព្រះមហាក្សត្រីជាសម្តេចម៉ែ សម្តេចយាយ សម្តេចយាយទួត មុនីនាថសីហនុ និងប្រគេនពរដល់ព្រះសង្ឃគ្រប់ព្រះអង្គ និងជូនពរសម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិត ប៊ុនរ៉ានីហ៊ុន សែន ប្រធានកាកបាទ ក្រហមកម្ពុជាថ្នាក់ដឹកនាំសមាជិកព្រឹទ្ធសភាថ្នាក់ដឹកនាំសមាជិករដ្ឋសភា ព្រមទាំងប្រជាពលរដ្ឋនៅទូទាំងប្រទេស សូម ឲ្យជួបសេចក្តីសុខសន្តិភាព និងសេចក្តីចម្រើនគ្រប់ៗគ្នាជារៀងរហូត ៕
ចែករំលែកព័តមាននេះ