រាជធានីភ្នំពេញ ៖ មណ្ឌលអប់រំកែប្រែទី៣ (ត្រពាំងផ្លុង) នៃអគ្គនាយកដ្ឋានពន្ធនាគារ ក្រសួងមហាផ្ទៃ បានចេញលិខិតដោះលែងលោក នី ណាក់ អ្នកអធិប្បាយអំពីបញ្ហាសង្គម…
រាជធានីភ្នំពេញ ៖ មណ្ឌលអប់រំកែប្រែទី៣ (ត្រពាំងផ្លុង) នៃអគ្គនាយកដ្ឋានពន្ធនាគារ ក្រសួងមហាផ្ទៃ បានចេញលិខិតដោះលែងលោក នី ណាក់ អ្នកអធិប្បាយអំពីបញ្ហាសង្គម (ហៅថា អ្នកមាត់ដាច) ត្រូវបានដោះលែងឲ្យមានសេរីភាពវិញ នៅថ្ងៃទី៥ ខែមករា ឆ្នាំ២០២៦ បន្ទាប់ពីរូបលោកបានអនុវត្តទោសជាប់ពន្ធនាគាររយៈពេលពីរឆ្នាំគ្រប់ចំនួនតាមសាលក្រមកំណត់ ។
សូមជម្រាបថា លោក នី ណាក់ ត្រូវបានសមត្តកិច្ចចាប់ខ្លួនកាលពីថ្ងៃទី៥ ខែមករា ឆ្នាំ២០២៤ និងចោទប្រកាន់ពីបទបរិហារកេរ្តិ៍ជាសាធារណៈ និងបទញុះញង់ឱ្យមានការរើសអើងតាមមាត្រា៣០៥ មាត្រា៤៩៤ និងមាត្រា៤៩៦ នៃក្រមព្រហ្មទណ្ឌកម្ពុជា ។ កាលពីខែវិច្ឆិកា ឆ្នាំ២០២៤ សាលាដំបូងរាជធានីភ្នំពេញ បានសម្រេចផ្ដន្ទាទោសលោកនី ណាក់ ឱ្យជាប់ពន្ធនាគាររយៈពេលពីរឆ្នាំ និងពិន័យជាប្រាក់ចំនួន៣លានរៀល (ប្រហែល៧៥០ ដុល្លារសហរដ្ឋអាមេរិក) ។
តុលាការក៏បានបង្គាប់ឱ្យលោក នី ណាក់ សងសំណងជំងឺចិត្តដល់ដើមបណ្តឹងរដ្ឋប្បវេណីចំនួន២០០លានរៀល (ប្រហែល៥០.០០០ដុល្លារសហរដ្ឋអាមេរិក)ផងដែរ ។ ការផ្ដន្ទាទោសនេះ ត្រូវបានសាលាឧទ្ធរណ៍ភ្នំពេញតម្កល់ទុកជាបានការនៅថ្ងៃទី២៧ ខែឧសភា ឆ្នាំ២០២៥ ។ តុលាការកំពូលបានបើកសវនាការជំនុំជម្រះលើបណ្ដឹងសារទុក្ខករណីនេះនៅថ្ងៃទី២៤ ខែធ្នូ ឆ្នាំ២០២៥ និងបានប្រកាសសាលដីកា នៅថ្ងៃទី៣០ ខែធ្នូ ឆ្នាំ២០២៥ ដោយសម្រេចតម្កល់សាលដីការបស់សាលាឧទ្ធរណ៍ទុកជាបានការដដែល ។
ការចោទប្រកាន់នេះធ្វើឡើងបន្ទាប់ពីលោក នី ណាក់ បានបង្ហោះសារនៅលើទំព័រហ្វេសប៊ុករបស់ខ្លួនដែលមានខ្លឹមសាររិះគន់ចំពោះការផ្ដល់ដីសម្បទានមួយកន្លែងដល់បុគ្គលម្នាក់ឈ្មោះ ហេង សួរ ដែលលោក នី ណាក់ គិតថាជារដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ ៕
ចែករំលែកព័តមាននេះ