ខេត្តព្រៃវែង ៖ ការប្រកបរបរកសិកម្មបែបធម្មជាតិ កំពុងក្លាយជាជម្រើសមួយដ៏មានប្រសិទ្ធភាព សម្រាប់ប្រជាកសិករនៅតាមជនបទ ក្នុងការបង្កើនប្រាក់ចំណូល ព្រមទាំងជួយលើកកម្ពស់សុខភាពកសិករអ្នកផលិត និងអ្នកទិញយកទៅបរិភោគផងដែរ។ ជាក់ស្តែង ប្រជាកសិករជាច្រើនគ្រួសារ…
ខេត្តព្រៃវែង ៖ ការប្រកបរបរកសិកម្មបែបធម្មជាតិ កំពុងក្លាយជាជម្រើសមួយដ៏មានប្រសិទ្ធភាព សម្រាប់ប្រជាកសិករនៅតាមជនបទ ក្នុងការបង្កើនប្រាក់ចំណូល ព្រមទាំងជួយលើកកម្ពស់សុខភាពកសិករអ្នកផលិត និងអ្នកទិញយកទៅបរិភោគផងដែរ។
ជាក់ស្តែង ប្រជាកសិករជាច្រើនគ្រួសារ រស់នៅភូមិទូលត្បាល់ ឃុំព្រៃព្នៅ ស្រុកពារាំង ខេត្តព្រៃវែង កំពុងបានជោគជ័យក្នុងការដាំបន្លែសុវត្ថិភាព ដោយមិនប្រើជីគីមី ឬថ្នាំពុល ដែលធ្វើឱ្យជីវភាពគ្រួសាររបស់ពួកគាត់ប្រសើរឡើងជាបន្តបន្ទាប់។
លោកស្រី ម៉ូវ ប៉ាក់ ជាកសិករម្នាក់ក្នុងចំណោមកសិករក្នុងភូមិ បានរៀបរាប់ថា រូបគាត់ប្រកបរបរដាំបន្លែបែបធម្មជាតិនេះ អស់រយៈពេលជាង ៣ ឆ្នាំមកហើយ ដោយដាំនៅជុំវិញផ្ទះ ហើយបន្លែដែលគាត់ដាំមានដូចជា ស្ពៃក្រញាញ់ ស្ពៃតឿ ត្រសក់ ត្រកួន និងបន្លែប្រចាំថ្ងៃជាច្រើនទៀត បន្លែទាំងនេះគាត់បរិភោគខ្លួនឯងផង និងយកទៅលក់នៅទីផ្សារក្នុងសហគមន៍ផង។
លោកស្រី ម៉ូវ ប៉ាក់ បានបញ្ជាក់ថា ដំបូងគាត់ដាំតិចៗសម្រាប់ហូបក្នុងផ្ទះប៉ុណ្ណោះ ប៉ុន្តែបន្ទាប់ពីមានអង្គការមកបង្រៀនពីបច្ចេកទេសដាំ និងធ្វើជីកំប៉ុស គាត់ក៏ចាប់ផ្តើមពង្រីកការដាំច្រើនឡើង ឥឡូវនេះអាចរកចំណូលបានរៀងរាល់ថ្ងៃ ហើយមិនបារម្ភពីសុខភាពទៀត ព្រោះគាត់មិនប្រើថ្នាំគីមីសោះ»។
តាមការបញ្ជាក់ បន្លែដែលគាត់ដាំអាចប្រមូលផលបានប្រហែលពី ៥០ ទៅ ៦០ គីឡូក្រាមក្នុងមួយថ្ងៃ ហើយលក់នៅផ្សារសហគមន៍បានតម្លៃជាមធ្យមប្រមាណ ២៥០០ រៀលក្នុងមួយគីឡូក្រាម ខណៈនៅរដូវវស្សា តម្លៃអាចឡើងដល់ ៥០០០ ទៅ ៦០០០ រៀលក្នុងមួយគីឡូក្រាម ដែលធ្វើឱ្យគាត់អាចរកចំណូលបានប្រហែល ១០លានរៀលក្នុងមួយឆ្នាំ។ ប្រាក់ចំណូលនេះ បានជួយឱ្យគ្រួសាររបស់គាត់មានជីវភាពធូរធារ និងអាចផ្គត់ផ្គង់ការសិក្សារបស់កូនរហូតដល់មហាវិទ្យាល័យទៀតផង។
ជាមួយគ្នានេះ លោកស្រីក៏បានបង្ហាញពីវិធីផលិតជីកំប៉ុសធម្មជាតិ ដោយប្រើសំណល់បន្លែ ស្មៅ ស្ទងចេក លាយជាមួយលាមកគោ និងលាមកចង្រឹត រួចទុកឱ្យរលួយរយៈពេលពី ៣ ទៅ ៦ ខែ មុនយកមកប្រើ។ វាជាវិធីសាស្ត្រងាយស្រួល ចំណាយតិច ហើយជួយថែរក្សាដីឱ្យមានជាតិជី និងបន្ថយការបំពុលបរិស្ថាន។
ចំពោះការដាំបន្លែបែបធម្មជាតិ គឺជាគំរូល្អសម្រាប់ប្រជាកសិករផ្សេងៗ ព្រោះអាចបង្កើនទាំងផលចំណូល កាត់បន្ថយការចំណាយ និងការពារសុខភាពទាំងអ្នកផលិត និងអ្នកបរិភោគ ៕
ចែករំលែកព័តមាននេះ