រឿងមាសនេះ ទោះជាទិញ ឬលក់កុំសំញ៉ែង ឬអួត ប្រយ័ត្នអំនួតកា្លយជាទុក្ខផ្តល់ផលវិបាកសម្រាប់ខ្លួនឯង និងគ្រួសារ បើទោះបីជាបញ្ហាសន្តិសុខមួយរយៈពេលនេះ ហាក់មានស្ថានភាពប្រសើរបន្តិចក៏ដោយចុះ ។ ជាការពិត…
រឿងមាសនេះ ទោះជាទិញ ឬលក់កុំសំញ៉ែង ឬអួត ប្រយ័ត្នអំនួតកា្លយជាទុក្ខផ្តល់ផលវិបាកសម្រាប់ខ្លួនឯង និងគ្រួសារ បើទោះបីជាបញ្ហាសន្តិសុខមួយរយៈពេលនេះ ហាក់មានស្ថានភាពប្រសើរបន្តិចក៏ដោយចុះ ។
ជាការពិត សកម្មភាពឆក់ ប្លន់ មួយរយៈពេលនេះ វាហាក់ដូចជាស្ងប់ស្ងាត់ ។ ប៉ុន្តែទោះបីជាយ៉ាងណា ក៏ដោយក៏កុំប្រហែសពីព្រោះវាអាចមានអ្នកទាល់ច្រក ឬអ្នករង់ចាំឱកាសល្អធ្វើសកម្មភាព ។ ដូច្នេះប្រសិន បើមានទ្រព្យសម្បត្តិ ជាពិសេស គឺរឿងមាស លុយ ទូរស័ព្ទទំនើបអីកុំអួត ហើយក៏កុំបង្ហាញគេពេក ប្រយ័ត្នវាផ្តល់ទុក្ខលំបាកដល់ខ្លួន ។
នៅពេលដែលយើងកាន់តែបង្ហាញ កាន់តែបញ្ចេញជនខិលខូច និងអ្នកឆ្លៀតឱកាស គឺចាំតែសម្ងំរង់ចាំ ឱកាសធ្វើសកម្មភាពប៉ុណ្ណោះ ។ សូមកុំអាង សភាពការណ៍ស្ងប់ស្ងាត់នាពេលបច្ចុប្បន្ននេះថា ស្ថានភាព សន្តិសុខយើងប្រសើរហើយប្រហែស ។ ជាការពិតដើម្បីរក្សាសណ្តាប់ធ្នាប់សង្គម និងពង្រឹងសន្តិសុខ កម្លាំងសមត្ថកិច្ច គឺបានពង្រឹងជាបន្តបន្ទាប់ ប៉ុន្តែកុំភ្លេចថា ទោះសមត្ថកិច្ចមានសមត្ថភាពប៉ុណ្ណា ក៏មិនអាចជួយការពារខ្លួនយើងបានដែរ ប្រសិនបើយើងមិនប្រយ័ត្នប្រយែង ដោយខ្លួនយើងបន្ថែមទេនោះ ។
ជាក់ស្តែង នៅពេលដែលសភាពការណ៍ស្ងប់ស្ងាត់ មានសេចក្តីរាយការណ៍ថា មានករណីប្លន់មាសដល់ទៅពីរករណី បានកើតមានឡើងទាំងកណ្ដាលថ្ងៃត្រង់ និងចំកណ្ដាលក្រុងបាត់ដំបង ដោយជនសង្ស័យបានប្រើប្រាស់ត្រឹមកូនកាំបិតប៉ុណ្ណោះ ។ សកម្មភាពនេះ បានធ្វើឲ្យរបួសមនុស្សយ៉ាងហោចណាស់២នាក់ ហើយមានសេចក្តីរាយការណ៍បឋមថា បានបាត់បង់មាសអស់ដល់ទៅប្រមាណជាង៥០តម្លឹង និងលុយកាក់មួយ ចំនួនបន្ថែមទៀត ។
រឿងអកុសលនេះ គ្រាន់តែជាសក្ខីកម្មមួយ ពញាក់អ្នករកស៊ីទិញ និងលក់មាស បងប្អូនប្រជាពលរដ្ឋដែលកំពុងតែទិញ និងយកមាសទៅលក់ និងអស់អ្នកដែលកំពុងតែមានមាស ឬគ្រឿងអលង្ការមានតម្លៃ ពាក់លំអរខ្លួនឲ្យមានការប្រុងប្រយ័ត្ន ។
ក្រៅអំពីបញ្ហាប្លន់ បងប្អូនអាចនឹងមានគ្រោះព្រោះការឆក់ ការលួច ការសម្លុតការគំរាមផ្សេងៗ ពីព្រោះនៅពេលនេះមាសឥឡូវ វាមានតម្លៃថ្លៃខ្លាំងណាស់ ។ មានមាសជាប់ដៃជាប់ជើងត្រឹមមួយជីក្តី ឬពីរជីក្តី ក៏អាចមានហានិភ័យដែរ ។ ប្រសិនបើអ្នកមានមាស មានរបស់របរពាក់លម្អតាមខ្លួននេះ ទោះតិចតួចក្តី ប៉ុន្តែមានន័យថា អ្នកកំពុងតែស្ពាយលុយតាមខ្លួនរាប់រយហើយ ។ មាសឥឡូវនេះមួយជីជាមធ្យមតម្លៃប្រមាណជា៦០០ដុល្លារចុះ បើមួយតម្លឹងមិន៦.០០០ ហើយបើពីរតម្លឹងអីមិន១២.០០០ ដុល្លារទៅហើយ ។
សូមកុំភ្លេចថា សមត្ថកិច្ចមិនអាចធានាសន្តិសុខសុវត្ថិភាពយើងបាន១០០ភាគរយឡើយ ។ អ្វីដែលធានា គឺមានតែយើងខ្លួនឯងទេ ។ ប្រសិនបើយើងមានរឿងមានរ៉ាវកើតឡើងចំមុខព្រួញដែលសមត្ថកិច្ចចុះល្បាត យើងអាចទទួលបានអន្តរាគមន៍ទាន់ពេល ។ ប៉ុន្តែបើមិនប៉ះទេ ទាល់តែមានអ្នកជូនដំណឹង ឬអ្នកប្តឹង ហើយទម្រាំសមត្ថកិច្ចចុះមក ក៏មិនអាចជួយបានដែរ ពីព្រោះជនខិលខូចវាធ្វើសកម្មភាពលឿនណាស់ ។
នៅពេលនេះ ពេលអ្នកទៅទិញទៅលក់អី គឺត្រូវតែប្រុងប្រយ័ត្ន ដើម្បីសុវត្ថិភាព។ បើទិញបានអីសូមលាក់ទុកទៅកុំបញ្ចេញខ្លាំងពេក ។ ការបញ្ចេញនេះហើយដែលអាចឲ្យជនខិលខូចឫអ្នកមានបំណង អាក្រក់ធ្វើសកម្មភាពងាយស្រួល ។
សរុបទៅ ទោះបីស្ថានភាពសន្តិសុខនៅពេលនេះហាក់មានភាពស្ងប់ស្ងាត់ និងប្រសើរឡើងខ្លះក្តី ក៏មិនមានន័យថា គ្មានហានិភ័យឡើយ ។ សកម្មភាពប្លន់ ឆក់ លួច និងការគំរាមកំហែងនៅតែអាចកើតមានគ្រប់ពេល ជាពិសេសចំពោះអ្នកដែលមានទ្រព្យសម្បត្តិមានតម្លៃដូចជា មាស លុយ និងទូរស័ព្ទទំនើប ។
ដូច្នេះ បងប្អូនប្រជាពលរដ្ឋត្រូវតែមានការប្រុងប្រយ័ត្នខ្ពស់ កុំអួតអាង កុំបង្ហាញទ្រព្យសម្បត្តិចេញក្រៅច្រើនពេក និងត្រូវការពារខ្លួនឯងជាមុនសិន ព្រោះសន្តិសុខពិតប្រាកដមិនអាចពឹងផ្អែកលើសមត្ថកិច្ចបាន១០០ភាគរយទេ ។ ការយកចិត្តទុកដាក់ និងការប្រុងប្រយ័ត្នដោយខ្លួនឯង គឺជាវិធីល្អបំផុតក្នុងការកាត់បន្ថយហានិភ័យ និងការពារខ្លួនឯង ព្រមទាំងគ្រួសារ ឲ្យមានសុវត្ថិភាព។
ចែករំលែកព័តមាននេះ