ខេត្តកំពង់ស្ពឺ៖ មានសហគ្រាសចម្រាញ់ប្រេងខ្មៅ ប្រេងម៉ាស៊ូត ដែលកំពុងធ្វើសកម្មភាពដោយមិនបានគោរពក្រមបរិស្ថាន និងមិនបានវាយតម្លៃផលប៉ះពាល់ផ្នែកបរិស្ថានជាមុន ហើយបង្កឱ្យមានផលប៉ះពាល់ធ្ងន់ធ្ងរដល់បរិស្ថាន សុខភាព និងការរស់នៅរបស់ប្រជាពលរដ្ឋ។ -ជាក់ស្តែងសហគ្រាសស៊ីនសេងតុង អេនើជី…
ខេត្តកំពង់ស្ពឺ៖ មានសហគ្រាសចម្រាញ់ប្រេងខ្មៅ ប្រេងម៉ាស៊ូត ដែលកំពុងធ្វើសកម្មភាពដោយមិនបានគោរពក្រមបរិស្ថាន និងមិនបានវាយតម្លៃផលប៉ះពាល់ផ្នែកបរិស្ថានជាមុន ហើយបង្កឱ្យមានផលប៉ះពាល់ធ្ងន់ធ្ងរដល់បរិស្ថាន សុខភាព និងការរស់នៅរបស់ប្រជាពលរដ្ឋ។
-ជាក់ស្តែងសហគ្រាសស៊ីនសេងតុង អេនើជី (ខេមបូឌា) ឯ.ក របស់ជនជាតិចិន មានទីតាំងនៅភូមិត្រពាំងរុន ឃុំដំណាក់រាំង ស្រុកសាមគ្គីមុនីជ័យ ខេត្តកំពង់ស្ពឺ ជាសហគ្រាសចម្រាញ់ប្រេងម៉ាស៊ូត ដែលធ្វើសកម្មភាពដោយមិនគោរពក្រមបរិស្ថាន និងមិនបានវាយតម្លៃជាមុនលើបច្ចេកទេសបរិស្ថាន បាននិងកំពុងបង្កផលប៉ះពាល់យ៉ាងធ្ងន់ធ្ងរដល់បរិស្ថាន សុខភាព និងការរស់នៅរបស់ប្រជាពលរដ្ឋ។
-កាលពីខែកញ្ញា ឆ្នាំ២០២៥កន្លងទៅ សហគ្រាសនេះ ធ្លាប់បានបង្កការលេចធ្លាយសំណល់ប្រេងទៅក្រៅធ្វើឱ្យប៉ះពាល់លើដីស្រែប្រជាពលរដ្ឋក្បែរខាងចំនួនប្រមាណ២ហិកតា ខូចសន្ទូង ខូចគុណភាពទឹក គុណភាពដី និងប្រព័ន្ធជីវៈចម្រុះជាច្រើនទៀត។
-នៅថ្ងៃទី៣ ខែមករា ដើមឆ្នាំ២០២៦នេះ សហគ្រាសដដែលនេះ បានបង្កជាអគ្គិភ័យឆាបឆេះយ៉ាងខ្លាំងបង្កការប៉ះពាល់យ៉ាងធ្ងន់ធ្ងរដល់បរិស្ថាន និងគុណភាពខ្យល់។
បើតាមប្រភពពីមន្ត្រីជាជំនាញ បានឱ្យដឹងថា សហគ្រាសស៊ីនសេង តុង អេនើជីនេះ ជាសហគ្រាសចម្រាញ់ប្រេងខ្មៅ ប្រេងម៉ាស៊ូតដែល ធ្វើសកម្មភាពដោយមិនគោរពនូវក្រមបរិស្ថាន និងមិនបានវាយតម្លៃផ្នែកបរិស្ថានឱ្យបានត្រឹមត្រូវនោះទេ។ សកម្មភាពរបស់រោងចក្រ សហគ្រាសនេះកំពុងបង្កផលប៉ះពាល់យ៉ាងធ្ងន់ធ្ងរដល់បរិស្ថាន សុខភាពប្រជាពលរដ្ឋ ក៏ដូចជាជីវៈចម្រុះនៅកម្ពុជា។
បើយោងតាមផេកផ្លូវការរបស់ក្រសួងបរិស្ថានថា ៖ រោងចក្រ សហគ្រាស និងក្រុមហ៊ុន ដែលធ្វើអាជីវកម្ម មានសក្តានុពលប្រភពបំពុល ដូចជា ប្រភេទបោកគក់ ជ្រលក់ពណ៌ និងគីមីផ្សេងៗ ត្រូវគោរពទៅតាមបទដ្ឋានបរិស្ថាន ស្របតាមក្រមបរិស្ថាននិងធនធានធម្មជាតិ ដើម្បីធានាទប់ស្កាត់ការប៉ះពាល់ដល់បរិស្ថាន សុខភាពសាធារណៈ និងការទទួលរងនូវពិន័យតាមច្បាប់ធ្ងន់ធ្ងរ រួមទាំងការអនុវត្តវិធានការបញ្ជាកែប្រែបច្ចេកទេស ក្នុងនោះមានទាំងការស្តារបរិស្ថានឡើងវិញ និងសំណងនៃការខូចខាតបរិស្ថានថែមទៀត។ នេះបើយោងតាមផេកផ្លូវការរបស់ក្រសួងបរិស្ថាន ចេញសេចក្តីប្រកាស កាលពីថ្ងៃទី៥ ខែមករា ឆ្នាំ២០២៦ ម្សិលមិញ។
ជាឧទាហរណ៍ ករណីរោងចក្រ XINSHENGTONG ENERGY (CAMBODIA) CO.,LTD ដែលមានមូលដ្ឋាននៅក្នុងភូមិត្រពាំងរុន ឃុំដំណាក់វាំង ស្រុកសាមគ្គីមុនីជ័យ ខេត្តកំពង់ស្ពឺ កាលពីថ្ងៃទី០២ ខែកញ្ញា ឆ្នាំ២០២៥ កន្លងទៅនេះ ត្រូវបានរកឃើញថា មិនបានគោរពច្បាប់បរិស្ថាននិងបទដ្ឋានគតិយុត្តចូលជាធរមាននៅកម្ពុជា។ ក្រុមការងារចម្រុះ បានរកឃើញរោងចក្រខាងលើនេះ បានបង្កឱ្យមានការលេចធ្លាយសំណល់ប្រេង ធ្វើឱ្យប៉ះពាល់ដីស្រែប្រជាពលរដ្ឋ នៅក្បែរនោះចំនួនប្រមាណ២ហិចតា ខូចស្រូវ ខូចសន្ទូង ខូចគុណភាពទឹក គុណភាពដី និងប្រព័ន្ធជីវៈចម្រុះ ជាបទល្មើសមានចែងក្នុងមាត្រា២០៦ មាត្រា២៦៨ មាត្រា២៩៨ និងមាត្រា៦៦៨នៃក្រមបរិស្ថាននិងធនធានធម្មជាតិ។
ឯកឧត្តមបណ្ឌិត អ៊ាង សុផល្លែត រដ្ឋមន្ត្រីក្រសួងបរិស្ថាន បានថ្លែងថា ព្រះរាជាណាចក្រកម្ពុជា បានបង្កើតក្រមបរិស្ថាននិងធនធានធម្មជាតិ ដើម្បីការពារបរិស្ថាន និងការគ្រប់គ្រងធនធាតិធម្មជាតិ សំដៅពង្រឹងវប្បធម៌ស្អាត នៅតាមមូលដ្ឋានអាជីវកម្ម ធានាការរស់នៅរបស់ប្រជាពលរដ្ឋមានសុខភាពល្អ មានជីវភាពល្អប្រសើរនិងការអភិវឌ្ឍប្រទេសជាតិ ប្រកបដោយនិរន្តភាព។ «ក្រសួងបរិស្ថាន រហូតដល់ពេលនេះ បន្តពង្រឹងការអនុវត្តក្រមបរិស្ថាននិងធនធានធម្មជាតិ ដើម្បីទប់ស្កាត់ការពុលចេញពីរោងចក្រ សហគ្រាស និងក្រុមហ៊ុនទាំងឡាយណា ដែលបន្តមិនគោរពច្បាប់ និងធ្វើការបំផ្លាញបរិស្ថាន និងសុខភាពពលរដ្ឋឡើយ។» មាន ឯកឧត្តមរដ្ឋមន្ត្រីប្រសាសន៍បន្ថែម។
សូមបញ្ជាក់ថា នៅក្នុងអាណត្តិទី៧ នៃរដ្ឋសភា រាជរដ្ឋាភិបាលបានដាក់ចេញនូវយុទ្ធសាស្ត្របញ្ចកោណ ដំណាក់កាលទី១ ហើយតាមរយៈយុទ្ធសាស្ត្រនេះ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានធ្វើការណែនាំ និងចង្អុលបង្ហាញ ដល់ក្រសួងបរិស្ថាន ឱ្យរៀបចំឡើងនូវយុទ្ធសាស្ត្រចក្រា ដែលមានសរសរស្ដម្ភបី នោះគឺ ភាពស្អាត ភាពបៃតង និងចីរភាព។ សរសរស្ដម្ភទី១ គឺ ភាពស្អាត ដែលសំដៅធ្វើយ៉ាងណាឱ្យកម្ពុជា មានភាពស្អាតទាំងក្នុងទឹក នៅលើដី និងលើមេឃ នោះគឺត្រូវធ្វើការសម្អាតផ្ទះយើង សង្គមយើង ប្រទេសយើងឱ្យមានភាពស្អាត ដើម្បីធនាការពារបរិស្ថាន សុខភាពប្រជាពលរដ្ឋផង ទាក់ទាញភ្ញៀវទេសចរ និងវិនិយោគិនមកកម្ពុជាផងដែរ៕
ចែករំលែកព័តមាននេះ