រាជធានីភ្នំពេញ ៖ នៅវេលាម៉ោង៣និង៣០នាទីរសៀលថ្ងៃទី២៧ មីនានេះ ការប្រកួតប្រដាល់ជាលក្ខណៈអន្តរជាតិលើកដំបូងរបស់ស្ថានីយទូរទស្សន៍អាស៊ីអាគ្នេយ៍ (SEATV) នឹងដំណើរការដូចការគ្រោងទុកនៅស្ទូឌីយោរបស់ស្ថានីយទូរទស្សន៍នេះតែម្តង ។
រាជធានីភ្នំពេញ ៖ នៅវេលាម៉ោង៣និង៣០នាទីរសៀលថ្ងៃទី២៧ មីនានេះ ការប្រកួតប្រដាល់ជាលក្ខណៈអន្តរជាតិលើកដំបូងរបស់ស្ថានីយទូរទស្សន៍អាស៊ីអាគ្នេយ៍ (SEATV) នឹងដំណើរការដូចការគ្រោងទុកនៅស្ទូឌីយោរបស់ស្ថានីយទូរទស្សន៍នេះតែម្តង ។ ក្នុងចំណោមកីឡាករកម្ពុជា និងបរទេស ដែលមានចំនួន៣រូបម្ខាងៗនោះសុទ្ធតែមានប្រវត្តិខ្លាំងក្លានៅលើរេញប្រដាល់ទាំងអស់ ទើបនាំឱ្យមានការពិបាកវិភាគថា តើក្រុមខាងណាខ្លាំងជាងសម្រាប់ការប្រកួតនៅលើរេញប្រដាល់ SEATV ជាលើកដំបូងនេះ ។
គូអន្តរជាតិដែលឡើងបើកឆាកមុនគេនារសៀលនេះ គឺកីឡាករឈាន ហុង មកពីសមាគមកីឡាប្រដាល់ក្រសួងការពារជាតិ ប្រកួតជាមួយកីឡាករថៃ Mekdam Pumphanung ។ រវាងពួកគេទាំងពីរនាក់សុទ្ធតែមានសមត្ថភាព និងបទពិសោធន៍ខ្ពស់ក្នុងការប្រកួតដូចគ្នា ។ កីឡាករកម្ពុជា ឈាន ហុង មានកម្ពស់១,៦០ម៉ែត្រ ទម្ងន់៦០គីឡូក្រាម ខណៈដែលកីឡាករថៃមានកម្ពស់ខ្ពស់ជាងបន្តិចគឺ១,៦៤ម៉ែត្រ និងមានទម្ងន់ខ្លួនប្រហាក់ប្រហែលគ្នា ។ កីឡាករកម្ពុជាធ្លាប់ប្រកួត៥៥លើក ឈ្នះ៤៥លើក ចាញ់១០លើក និងធ្លាប់ផ្តួលគូប្រកួតឱ្យសន្លប់បានចំនួន៥លើក ។ ចំពោះកីឡាករថៃវិញធ្លាប់ប្រកួតបាន៦៥លើក ឈ្នះ៤លើក ចាញ់១៥លើក និងធ្លាប់ផ្តួលគូប្រកួតឱ្យសន្លប់បានចំនួន២លើក ។
ផ្អែកលើបទពិសោធន៍នេះមានន័យថា កីឡាករថៃហាក់មានប្រវត្តិប្រកួតច្រើនជាង បុ៉ន្តែក្រុមអ្នកឃ្លាំមើលនៅតែជឿជាក់លើកីឡាករឈាន ហុង របស់កម្ពុជាច្រើនជាងដោយសារតែគេពូកែកែង និងរហ័សជើង ហើយមានកម្លាំងពេញនៅឡើយ ក្នុងការឡើងរេញលើកក្រោយៗ ។ យ៉ាងណាក៏ដោយ ការជឿជាក់ថាអ្នកណានឹងឈ្នះ១០០% នៅមិនមានការកំណត់ថា កីឡាករកម្ពុជា ឬកីឡាករថៃនៅឡើយទេ ក្នុងពេលដែលភាគីទាំងពីរហាក់មានក្រេឌីតល្អដូចគ្នាក្នុងការប្រដាល់បែបនេះ ។ គូអន្តរជាតិទី២ ជាការប៉ះគ្នារវាងកីឡាករឡៅ ស៊ីណាត មកពីក្លិបកងទ័ពឆត្រយោង៩១១ ជាមួយកីឡាករប្រេស៊ីល Andre Teixeira ដែលមានតម្លៃខ្លួនខ្ពស់ក្នុងការអញ្ជើញឱ្យមកប្រកួតនៅប្រទេសកម្ពុជាលើកនេះ ។ កីឡាករកម្ពុជាមានកម្ពស់១,៧១ម៉ែត្រ និងកីឡាករប្រេស៊ីលមានកម្ពស់១,៧៧ម៉ែត្រ ដោយពួកគេត្រូវប្រកួតគ្នាក្នុងប្រភេទទម្ងន់៦៧គីឡូក្រាម ។
កីឡាករឡៅ ស៊ីណាត គឺជាជើងចាស់ និងល្បីឈ្មោះបំផុតនៅក្នុងពិភពប្រដាល់របស់ប្រទេសកម្ពុជា បុ៉ន្តែភាគីខាងកីឡាករប្រេស៊ីល ក៏ជាជើងខ្លាំងផងដែរ បន្ទាប់ពីបានហ្វឹកហាត់នៅក្នុងប្រទេសថៃ ហើយមានប្រវត្តិធ្លាប់ប្រកួតដណ្តើមបានខ្សែក្រវាត់ច្រើនគួរសមមកក្តោបក្តាប់ក្នុងដៃ។ កីឡាករកម្ពុជាធ្លាប់ប្រកួតបាន១០៤ដង ឈ្នះ៨៧ដង ចាញ់១៦ដង និងស្មើ១ដង ចំណែកកីឡាករប្រេស៊ីលធ្លាប់ប្រកួតបានតែ៥០ដងបុ៉ណ្ណោះ ដោយធ្លាប់ឈ្នះ៣៥ដង ចាញ់១៣ដង និងស្មើ២ដង បុ៉ន្តែក្នុងរយៈពេលចុងក្រោយមានការអះអាងថា កីឡាករ Andre បានបង្កើតឱ្យមានការភ្ញាក់ផ្អើលយ៉ាងខ្លាំងនៅក្នុងប្រទេសថៃ និងនៅក្នុងប្រទេសកំណើតរបស់គេ បន្ទាប់ពីគេមានឱកាសយកឈ្នះគូប្រកួតដណ្តើមបានខ្សែក្រវាត់២ ក្នុងការប្រកួតជាលក្ខណៈអន្តរជាតិ ។ ម្នាក់ៗកំពុងផ្តោតការសួរនាំថា តើរវាងគូនេះកីឡាករកម្ពុជា ឡៅ ស៊ីណាត និងកីឡាករប្រេស៊ីល អ្នកណាទទួលជោគជ័យពិតប្រាកដ បើម្នាក់ៗសុទ្ធតែមានភាពខ្លាំងរៀងខ្លួនបែបនេះ ?
គូអន្តរជាតិទី៣ គឺកីឡាករសេន ប៊ុនថេន មកពីសមាគមកីឡាប្រដាល់ក្រសួងមហាផ្ទៃ ប៉ះជាមួយកីឡាករស្លូវ៉ាគី Richard Gemkai ។ កីឡាករទាំងពីរត្រូវគេមើលឃើញថា មានប្រវត្តិ និងបទពិសោធន៍ខុសគ្នា បុ៉ន្តែសម្រាប់ក្រេឌីត និងភាពល្បីល្បាញនៅក្នុងប្រទេសកំណើតរៀងៗខ្លួន គឺមានលក្ខណៈពិសេសមិនចាញ់គ្នាទេ ។ កីឡាករសេន ប៊ុនថេន ជាជើងខ្លាំងរបស់កម្ពុជា មានកម្ពស់១,៧០ម៉ែត្រ ទម្ងន់៧៣គីឡូក្រាម ឯកីឡាករស្លូវ៉ាគីមានកម្ពស់១,៧៩ម៉ែត្រ និងទម្ងន់៧៣គីឡូក្រាមដូចគ្នា ។ កីឡាករកម្ពុជាធ្លាប់ឆ្លងកាត់ការប្រកួតបាន៩៩ដង ឈ្នះ៨៥ដង ចាញ់តែ៩ដង ស្មើ៥ដង និងមានប្រវត្តិធ្លាប់ផ្តួលកីឡាករបរទេសដល់ទឹកដីបារាំងរួចមកហើយ ។ ដោយឡែកចំពោះកីឡាករស្លូវ៉ាគី ធ្លាប់ប្រកួតបានតែ៤៥ដង ឈ្នះ៣២ដង ចាញ់១៣ដង និងមិនធ្លាប់ស្មើ បុ៉ន្តែតាមប្រភពពីប្រទេសថៃ ដែលកីឡាកររូបនេះបានហ្វឹកហាត់ និងក្លាយជាកីឡាករប្រដាល់បានអះអាងថា Richard គឺជាកីឡាករដែលមានសមត្ថភាពប្រកួតល្អ និងមានកេរ្តិ៍ឈ្មោះបោះសំឡេងយ៉ាងខ្លាំងនៅក្នុងពិភពប្រដាល់ ។
បើទោះជាកីឡាករសេន ប៊ុនថេន ត្រូវគេជឿថា ហាក់មានសន្ទុះក្នុងការប្រកួតល្អជាង បុ៉ន្តែគេមិនដឹងនោះឡើយថា កីឡាករកម្ពុជាអាចមានប្រៀបលើកីឡាករស្លូវ៉ាគី ដែលជាដៃគូ និងមានបទពិសោធន៍ប្រកួតតិចជាង ឬយ៉ាងណា ? ចាំមើលមើល៍ តើការជួបគ្នារវាងកីឡាករកម្ពុជា និងកីឡាករបរទេសទាំង៣គូនេះនឹងធ្វើឱ្យសង្វៀនប្រដាល់របស់ស្ថានីយទូរទស្សន៍អាស៊ីអាគ្នេយ៍ ដែលទើបនឹងបើកឆាកប្រកួតប្រចាំខែជាលើកដំបូងនេះទទួលបានការគាំទ្របុ៉នណា ?
ចែករំលែកព័តមាននេះ