កិច្ចប្រជុំកំពូលរបស់សម្ព័ន្ធអារ៉ាប់ឆ្នាំ២០១៤ បានបើកធ្វើកាលពីថ្ងៃទី២៥ មីនា នៅវិមានបាយ៉ាន ភាគ ខាងត្បូងរដ្ឋធានីកូវ៉ែត ។ ប្រមុខរដ្ឋ១៦រូប របស់បណ្តាប្រទេសអារ៉ាប់ បានចូលរួមក្នុងកិច្ចប្រជុំកំពូលនេះ ។ ប្រទេសអារ៉ាប់ឯទៀតៗដែលប្រមុខរដ្ឋអវត្តមានបានបញ្ជូនគណៈប្រតិភូជាន់ខ្ពស់មក ។
ប្រមុខរដ្ឋកូវ៉ែត សុីក សាបាហ៍អាល់ អាហ៍ម៉ាដ អាល់សាបាហ៍ ដែលថ្លែងក្នុងពិធីបើកកិច្ចប្រជុំកំពូលនេះ បានអំពាវនាវឱ្យមានការទាក់ទងគ្នាកាន់តែជិតស្និទ្ធថែមទៀត រវាងបណ្តារដ្ឋអារ៉ាប់។
ព្រះអង្គមានបន្ទូលថា កិច្ចប្រជុំកំពូលនេះ ធ្វើឡើងពេលដែលសភាពការណ៍តំបន់ និងអន្តរជាតិជួបការលំបាក ។ ដូច្នេះវាសំខាន់ណាស់ដែលយើងត្រូវរួបរួមគ្នា ហើយសម្របសម្រួលនយោបាយរបស់យើង ដើម្បីភាពរុងរឿង និងសន្តិសុខតំបន់ ។
កិច្ចប្រជុំកំពូលនេះ ដែលមានប្រធានបទរួបរួមគ្នាដើម្បីអនាគតដ៏ប្រសើរមួយ មានទិសដៅដោះស្រាយបញ្ហាតំបន់មួយចំនួនធំ ។ វិបត្តិនៅសុីរី និងបុព្វហេតុរបស់ប៉ាឡេស្ទីន ស្ថិតក្នុងរបៀបវារៈនៃកិច្ចប្រជុំកំពូលនោះ ។
បណ្តាអ្នកចូលរួមនឹងស្វែងរកតាក់តែងដំណោះស្រាយមួយ ដើម្បីបញ្ចប់វិបត្តិសុីរី ដែលបណ្តាលឱ្យមនុស្សស្លាប់ជាច្រើនរយពាន់នាក់រួចហើយ ។ កៅអីសុីរីក្នុងសម្ព័ន្ធអារ៉ាប់នៅទំនេរ ព្រោះសុីរីត្រូវព្យួរជើងចាប់តាំងពីឆ្នាំ២០១១មក ប៉ុន្តែមេដឹកនាំរបស់ក្រុមប្រឹក្សាជាតិសុីរី (ក្រុមប្រឆាំង) លោកអាហ៍ម៉ាដ អាល់ហ្សាបា ត្រូវបានអញ្ជើញឱ្យចូលរួមក្នុងកិច្ចប្រជុំកំពូលនេះ ។
បញ្ហាប៉ាឡេស្ទីន គឺជាការប្រឈមសំខាន់សម្រាប់ពិភពអារ៉ាប់ ។ ប្រមុខរដ្ឋកូវ៉ែត មានបន្ទូលថា យើងនឹងបន្តជួយទ្រទ្រង់ដល់ប្រជាជនប៉ាឡេស្ទីន ។ ក្រៅពីបញ្ហាសុីរី និងប៉ាឡេស្ទីន បញ្ហាភេរវកម្ម កិច្ចសហប្រតិបត្តិការសេដ្ឋកិច្ច សភាពការណ៍សន្តិសុខនៅលីបង់ និងបញ្ហានយោបាយនៅអេហ្សុីបក៏លើកឡើងដែរ ៕
ចែករំលែកព័តមាននេះ