សហរដ្ឋអាមេរិក ៖ តាមការចេញផ្សាយសារព័ត៌មានដ៏ល្បីនៅលើពិភពលោក CNN នៅថ្ងៃទី៨ ខែធ្នូ ឆ្នាំ២០២៥ ជាមួយចំណងជើងដ៏ធំថា «ថៃបើកការវាយប្រហារតាមអាកាសលើកម្ពុជា ខណៈដែលកិច្ចព្រមព្រៀងសន្តិភាពរបស់លោក…
សហរដ្ឋអាមេរិក ៖ តាមការចេញផ្សាយសារព័ត៌មានដ៏ល្បីនៅលើពិភពលោក CNN នៅថ្ងៃទី៨ ខែធ្នូ ឆ្នាំ២០២៥ ជាមួយចំណងជើងដ៏ធំថា «ថៃបើកការវាយប្រហារតាមអាកាសលើកម្ពុជា ខណៈដែលកិច្ចព្រមព្រៀងសន្តិភាពរបស់លោក ត្រាំ កំពុងស្ថិតក្នុងស្ថានភាពមិនច្បាស់លាស់»។
នៅក្នុងអត្ថបទដែលបានចេញផ្សាយបានឱ្យដឹងថា ប្រទេសថៃបានបើកការវាយប្រហារតាមអាកាសប្រឆាំងនឹងប្រទេសកម្ពុជា នៅថ្ងៃចន្ទ ខណៈដែលរលកនៃការប្រយុទ្ធគ្នាថ្មីមួយបានផ្ទុះឡើងរវាងប្រទេសជិតខាងអាស៊ីអាគ្នេយ៍ទាំងពីរ ដែលបង្ហាញពីការបរាជ័យនៃផែនការសន្តិភាព ដឹកនាំដោយប្រធានាធិបតីសហរដ្ឋអាមេរិក លោក ដូណាល់ ត្រាំ កាលពីពីរខែមុន។ ភាគីទាំងពីរបានចោទប្រកាន់គ្នាទៅវិញទៅមកថាបានបើកការវាយប្រហារតាមបណ្តោយព្រំដែនដែលមានជម្លោះនៅព្រឹកថ្ងៃចន្ទ បន្ទាប់ពីមានភាពតានតឹងអស់រយៈពេលជាច្រើនសប្តាហ៍ និងការផ្អាកកិច្ចព្រមព្រៀងសន្តិភាពដោយប្រទេសថៃ។
យ៉ាងណាមិញ ក្រសួងការពារជាតិនៃព្រះរាជាណាចក្រកម្ពុជា បានប្រកាសនាព្រឹកថ្ងៃទី៨ ខែធ្នូ ឆ្នាំ២០២៥ ច្រានចោលព័ត៌មានមិនពិតរបស់ប្រទេសថៃ ដោយបញ្ជាក់ថា ការលើកឡើងរបស់ផេកផ្លូវការកងទ័ពថៃ និងបណ្តាញសារព័ត៌មានថៃមួយចំនួនដែលថា កម្ពុជាបើកការបា.ញ់មុន និងប្រើសព្វាវុធធុនធ្ងន់ នៅតាមបណ្តោយព្រំដែនកម្ពុជា-ថៃ គឺជាព័ត៌មានមិនពិត កងកម្លាំងយោធាថៃបានចាប់ផ្តើមបើកការវាយប្រហារមកលើកងកម្លាំងយោធាកម្ពុជា នៅព្រឹកថ្ងៃទី៨ ខែធ្នូ ឆ្នាំ២០២៥ ចាប់តាំងពីម៉ោង៥ព្រឹកមក។
ក្រសួងការពារជាតិ បានបញ្ជាក់ទៀតថា សកម្មភាពនេះធ្វើឡើងបន្ទាប់ពីយោធាថៃ បានធ្វើសកម្មភាពបង្កហេតុជាច្រើនរាប់មិនអស់ច្រើនថ្ងៃមកហើយ ជាពិសេសឧបទវហេតុ កាលពីម្សិលមិញនៅព្រលានថ្ម ក្នុងចេតនាញុះញង់ ដើម្បីនាំដល់ការប៉ះទង្គិចគ្នា។
ជាមួយគ្នានេះ កម្ពុជាបានជូនដំណឹងជាលើកទីពីរទៅក្រុមអ្នកសង្កេត ការណ៍អាស៊ាន (AOT) អំពីឧប្បត្តិហេតុនេះរួចហើយ ព្រមទាំងគ្រោងនឹងស្នើឱ្យ AOT ចុះទៅទីតាំង ដើម្បីធ្វើការស្រាវជ្រាវស៊ើបអង្កេត ដើម្បីស្វែងរកការពិត និងធានាឱ្យបាននូវតម្លាភាព យុត្តិធម៌ និងភាពត្រឹមត្រូវ៕
ចែករំលែកព័តមាននេះ