ខេត្តសៀមរាប ៖ មន្ទីរបរិស្ថានខេត្តសៀមរាប បានសហការជាមួយកងកម្លាំងយោធា តំបន់ប្រតិបត្តិការសឹករងខេត្តសៀមរាប ចាប់ពីថ្ងៃទី២៦ ខែសីហា ឆ្នាំ២០២៦ ដល់ថ្ងៃទី២៥ ខែកញ្ញា ឆ្នាំ២០២៦ បានចុះអនុវត្ដការងារទប់ស្កាត់ និងបង្ក្រាបបទល្មើសធនធានធម្មជាតិ ក្នុងដែនជម្រកសត្វព្រៃបឹងពែរ ភូមិសាស្ត្រខេត្តសៀមរាប។ ក្រុមការងារ បានធ្វើការចុះល្បាត ពិនិត្យជាក់ស្ដែង ឃើញមានទីតាំងដីអាស្រ័យផលក្នុងតំបន់ការពារធម្មជាតិ សរុបចំនួន១៦ទីតាំង ស្មើនឹងទំហំផ្ទៃដី៤៥,៤៥ហិកតា ។
នៅក្នុងអំឡុងពេលជាមួយគ្នា ក្រុមការងារបង្ក្រាបបទល្មើសធនធានធម្មជាតិ បានធ្វើការចុះល្បាតពិនិត្យជាក់ស្ដែងក្នុងដែនជម្រកសត្វព្រៃភ្នំត្នោត-ភ្នំពក ក្នុងភូមិសាស្ត្រខេត្តសៀមរាប និងបានរកឃើញ មានទីតាំងដីព្រៃរងការទន្ទ្រានថ្មី ដើម្បីយកដីធ្វើជាកម្មសិទ្ធ ចំនួន០១ទីតាំង ស្មើនឹងទំហំផ្ទៃដី០,៥៧ហិកតានិងទីតាំងដី អាស្រ័យផលក្នុងតំបន់ការពារធម្មជាតិ សរុបចំនួន០៥ ទីតាំង ស្មើនឹង ទំហំផ្ទៃដី១២,៧១ហិកតា ។
ដោយឡែកនៅក្នុងដែនជម្រកសត្វព្រៃគូលែន-ព្រហ្មទេព ក្រុមការងារបង្ក្រាបបទល្មើសធនធានធម្មជាតិ បានធ្វើការចុះល្បាតពិនិត្យជាក់ស្ដែង ឃើញមាន ទីតាំងកាប់រុករានដីព្រៃថ្មី ដើម្បីយកដីធ្វើជាកម្មសិទ្ធ ចំនួន០១ទីតាំង ស្មើនឹងទំហំផ្ទៃដី១,០៨ហិកតា។ ក្រុមការងារបានរៀបចំ និងបញ្ជូនសំណុំរឿងទៅតុលាការរួចហើយ។ លើសពីនេះ ក្រុមការងារបានបង្ក្រាប ទីតាំងដាក់សញ្ញាសម្គាល់ថ្មី ក្នុងគោលបំណងកាន់កាប់ដីធ្វើជាកម្មសិទ្ធ ចំនួន០១ទីតាំង ស្មើនឹងទំហំផ្ទៃដី ៣ហិកតា និងបានបញ្ជូនសំណុំរឿងទៅតុលាការចាត់ការតាមនីតិវិធីច្បាប់ ។
សូមបញ្ជាក់ថា បទល្មើសពាក់ព័ន្ធនឹងការគ្រប់គ្រងតំបន់ការពារធម្មជាតិ ដូចមានចែង ក្នុងមាត្រា៨៤៩, មាត្រា៨៥០, មាត្រា៨៥១ និងមាត្រា៨៥២ ត្រូវបានផ្តន្ទាទោសតាមមាត្រានីមួយៗនៃក្រមបរិស្ថាននិងធនធានធម្មជាតិ ៕
ចែករំលែកព័តមាននេះ