សុខភាព៖ យោងតាមការចុះផ្សាយពីប្រភពបរទេស ការកក់សក់នៅពេលយប់អាចជួយឱ្យរាងកាយស្រស់ស្រាយក្រោយពីធ្វើការពេញមួយថ្ងៃ ប៉ុន្តែប្រសិនបើធ្វើមិនបានត្រឹមត្រូវ អាចធ្វើឱ្យសក់ខូច ស្ងួត បែកចុង និងប៉ះពាល់ដល់ស្បែកក្បាល។ ជាពិសេស អ្នកដែលតែងតែកក់សក់មុនចូលគេង គួរប្រុងប្រយ័ត្នចំពោះទម្លាប់ ៣ យ៉ាងខាងក្រោម។

ទម្លាប់ទី១ គឺ កក់សក់រួចចូលគេងទាំងសក់នៅសើម។ មនុស្សជាច្រើនគ្រាន់តែជូតសក់ដោយកន្សែងបន្តិច រួចចូលគេង ដោយទុកឱ្យសក់ស្ងួតដោយខ្លួនឯង។ ប៉ុន្តែសក់នៅសើមងាយរងការទាញ និងប៉ះទង្គិច ដែលអាចធ្វើឱ្យសក់ជំពាក់ បាក់ និងបែកចុង។ លើសពីនេះ ការទុកស្បែកក្បាលឱ្យសើមយូរ អាចជួយឱ្យមេរោគខ្លះលូតលាស់ និងធ្វើឱ្យបញ្ហាអង្គែ ឬរលាកស្បែកក្បាលកាន់តែពិបាកគ្រប់គ្រង។ ក្រោយកក់សក់ គួរប្រើកន្សែងទន់ផ្តិតទឹកថ្នមៗ ហើយសម្ងួតត្រង់គល់សក់ និងស្បែកក្បាលឱ្យបានស្ងួតមុនចូលគេង។

ទម្លាប់ទី២ គឺ កក់សក់ដោយប្រើទឹកក្តៅខ្លាំងពេក។ មនុស្សមួយចំនួនចូលចិត្តប្រើទឹកក្តៅដើម្បីឱ្យមានអារម្មណ៍ធូរស្រាល ប៉ុន្តែការប្រើទឹកក្តៅខ្លាំងជាប្រចាំ អាចធ្វើឱ្យសក់ និងស្បែកក្បាលបាត់បង់ជាតិប្រេងធម្មជាតិ បណ្តាលឱ្យសក់ស្ងួត ស្រួយ និងងាយបាក់។ អ្នកដែលមានស្បែកក្បាលងាយរមាស់ ឬមានអង្គែ គួរប្រុងប្រយ័ត្នជាពិសេស។ គួរប្រើទឹកក្ដៅឧណ្ហៗ ឬទឹកសីតុណ្ហភាពធម្មតា ជំនួសទឹកក្តៅខ្លាំង។

ទម្លាប់ទី៣ គឺ ប្រើក្រចកដៃកោសស្បែកក្បាលខ្លាំងពេលកក់សក់។ មនុស្សមួយចំនួនគិតថា ការកោសខ្លាំងៗអាចជួយកម្ចាត់អង្គែ ធូលី និងជាតិខ្លាញ់បានស្អាតជាងមុន ប៉ុន្តែវាអាចធ្វើឱ្យស្បែកក្បាលរលាត់ របួស និងងាយរងការរលាក។ ប្រសិនបើមានរបួស មេរោគអាចចូលទៅក្នុងស្បែកបានងាយ។ វិធីត្រឹមត្រូវគឺធ្វើឱ្យសក់សើមជាមុន ដាក់សាប៊ូកក់សក់ក្នុងបាតដៃ រួចប្រើចុងម្រាមដៃម៉ាស្សាថ្នមៗលើស្បែកក្បាល និងលាងជម្រះឱ្យស្អាត។

ជារួម ដើម្បីថែរក្សាសក់ និងស្បែកក្បាល គួរជៀសវាងការកក់សក់ជិតម៉ោងចូលគេងពេក ប្រសិនបើមិនមានពេលសម្ងួតសក់ឱ្យបានល្អ។ គួរប្រើកន្សែងទន់ ផ្តិតសក់ថ្នមៗ ហើយបើប្រើម៉ាស៊ីនផ្លុំសក់ គួរជ្រើសរើសកម្រិតកម្ដៅទាប និងកុំដាក់ជិតសក់ពេក។ បន្ថែមពីនេះ គួរជ្រើសរើសសាប៊ូដែលសមស្របនឹងស្បែកក្បាល និងលាងឱ្យអស់សំណល់សាប៊ូ។ ប្រសិនបើមានអាការៈរមាស់យូរ អង្គែច្រើន ឬជ្រុះសក់ខុសធម្មតា គួរទៅពិនិត្យជាមួយគ្រូពេទ្យ៕