ទីក្រុងវ៉ាស៊ីនតោន៖ យើងងាកមកបន្តចាប់អារម្មណ៍រឿងអាស្រូវស្នេហាដ៏កក្រើកពិភពលោករវាងនាយកប្រតិបត្តិក្រុមហ៊ុនផលិតបន្ទះឈីបអឹនវីឌា (Nvidia) លោកជេនសិន ហួង (Jensen Huang) និងស្ត្រីអ្នកជំនួញកាលីបខ្ពស់ម្នាក់ឈ្មោះអាលីស ហួង (Alice Huang) ដែលរដ្ឋាភិបាលអាមេរិកកំពុងដាក់ការសង្ស័យថាអ្នកស្រីអាចជាភ្នាក់ងារចារកម្មរបស់រដ្ឋាភិបាលចិន។ អាមេរិកសង្ស័យថាចិនប្រើប្រាស់អ្នកស្រីអាលីស ហួងធ្វើជានុយដើម្បីទៅកៀកនឹងលោកជេនសិន ហួង និងដើម្បីកេងចំណេញពីទំនាក់ទំនងស្នេហានេះលួចផ្ទេរបន្ទះឈីបបំពាក់បច្ចេកវិទ្យាទំនើបទៅឱ្យក្រុមហ៊ុនតូចធំនានាទូទាំងប្រទេសចិន។
ឥឡូវនេះ បើយោងតាមលោកដូណាល់ត្រាំ អែហ្វប៊ីអាយ (FBI) ចាប់ផ្ដើមបើកការស៊ើបអង្កេតទៅលើលោកជេនសិន ហួង និងប្រវត្តិទំនាក់ទំនងស្នេហានេះហើយ។ ប្រសិនបើទៅថ្ងៃមុខ លទ្ធផលស៊ើបអង្កេតបង្ហាញថានាយកប្រតិបត្តិរូបនេះធ្លាក់ចូលទៅក្នុង «អន្ទាក់ស្រីស្អាត ឬ Honey Trap» ដើម្បីបម្រើឱ្យផលប្រយោជន៍ចារកម្មដូចការសង្ស័យមែន មានន័យថាលោកក៏ជាអ្នករងគ្រោះនៅក្នុងរឿងនេះដែរ។ មែនទែនទៅ រដ្ឋាភិបាលប្រទេសមួយប្រើយុទ្ធសាស្ត្រស្រីស្អាតដើម្បីធ្វើជានុយទាក់មនុស្សប្រុស វាជារឿងដែលពិបាកឱ្យភាគីដែលគេតាមប្រមាញ់នោះគេចផុតណាស់។ សូម្បីតែទំនាក់ទំនងស្នេហាលួចលាក់រវាងលោកប៊ីលហ្គេត សហស្ថាបនិកក្រុមហ៊ុនម៉ៃក្រូសូហ្វ (Microsoft) ជាមួយនាងមីឡា អានតូណូវ៉ា (Mila Antonova) ក៏ត្រូវគេសង្ស័យថានាងជាភ្នាក់ងារចារកម្មរបស់រុស្ស៊ីផងដែរ។
យុទ្ធសាស្ត្រស្រីស្អាត-ប្រុសស្អាត (honey trap ឬ sexpionage) ធ្លាប់ត្រូវអតីតសហភាពសូវៀតអនុវត្តយ៉ាងមានជោគជ័យ ហើយបានអូសទាញក្រុមអ្នកការទូត និងមន្ត្រីរដ្ឋាភិបាលលោកខាងលិចឱ្យបម្រើសូវៀតទាំងបង្ខំចិត្ត, បើមិនបម្រើគឺមិនបាន ព្រោះចំណុចខ្សោយត្រូវគេគ្រប់គ្រងបានអស់ហើយ, ហ៊ានតែរើខ្លួនគឺកាន់តែធ្ងន់ក។ ប្រភពខ្លះថាក្រុមហ៊ុន Nvidia បានចាត់តាំងក្រុមហ៊ុនជំនាញខាងកិច្ចការច្បាប់ដ៏ធំមួយរបស់អាមេរិកដើម្បីស៊ើបអង្កេតផ្ទៃក្នុងរបស់អង្គភាពខ្លួន «ប្រកបដោយភាពស៊ីជម្រៅគ្រប់ជ្រុងជ្រោយ និងដោយឯករាជ្យ» ដើម្បីចង់ដឹងថាតើប្រវត្តិទំនាក់ទំនងស្នេហានេះមានដំណើរដើមទងបែបណាខ្លះរវាងលោកជេនសិន ហួង និងអ្នកស្រីអាលីស ហួងដែលគេសង្ស័យថាជាភ្នាក់ងារសម្ងាត់ដែលរដ្ឋាភិបាលចិនបញ្ជូនទៅធ្វើជានុយទាក់លោកឱ្យចូលទៅក្នុងអន្ទាក់ស្រីស្អាតនោះ?
ក្រុមហ៊ុនផលិតបន្ទះឈីបលំដាប់កំពូលដែលមានតម្លៃភាគហ៊ុនជាង៤ទ្រីលានដុល្លារមួយនេះជួលក្រុមហ៊ុន Wachtell, Lipton, Rosen & Katz ដែលមានទីស្នាក់ការនៅទីក្រុងញូយ៉កដើម្បីបើកការស៊ើបអង្កេត ក្រោមកិច្ចសហការពីលោកជូនគីម (Joon Kim)។ Nvidia ត្រូវការបង្ហាញនូវភាពស្អាតស្អំរបស់ខ្លួននៅក្នុងរឿងនេះព្រោះបញ្ហានេះមិនលេងសើចទេ អាចឈានដល់វិវាទរវាងរដ្ឋាភិបាល និងរដ្ឋាភិបាល។ ប្រទេសចិនបានចេញមុខច្រានចោលការចោទប្រកាន់ ឬការសង្ស័យរបស់អាមេរិករួចហើយ។ ប៉ុន្តែសំខាន់ស៊ីសងលើលទ្ធផលស៊ើបអង្កេតទៀត។ លើកនេះស៊ើបអង្កេតពីច្រើនស្ថាប័ន។
ក្រុមហ៊ុន Watchtell ចាត់ទុកលោកគីមជាអ្នកជំនាញការលើច្រើនវិស័យរួមទាំងការស៊ើបអង្កេតផ្ទៃក្នុង, ការការពារក្ដីឱ្យឧក្រិដ្ឋជនលំដាប់ខ្ពស់ និងការគ្រប់គ្រងវិបត្តិជាដើម។ លោកធ្លាប់កាន់ការងារជារដ្ឋអាជ្ញាប្រចាំទីក្រុងញូយ៉ក។ ការស៊ើបអង្កេតនេះមិនប៉ះពាល់ដំណើរប្រព្រឹត្តទៅរបស់ក្រុមហ៊ុនទេ។ ក្រុមហ៊ុនអះអាងថាលោកជេនសិន ហួងនឹងបន្តដឹកនាំក្រុមហ៊ុនដោយមិនធ្វើឱ្យរាំងស្ទះការងារឡើយ។ ក្រុមហ៊ុន Nvidia កំពុងទទួលរងព្យុះភ្លៀងនៃរឿងអាស្រូវផ្លូវភេទដ៏មិនធម្មតាមួយ។ រឿងអាស្រូវនេះបើពាក់ព័ន្ធតែនឹងអំពើផិតក្បត់ក្រៅចំណងអាពាហ៍ពិពាហ៍វាជារឿងមួយ។ ប៉ុន្តែបើរឿងនេះត្រូវបានគេរៀបចំជាខ្សែសង្វាក់មានបណ្ដាញចាត់តាំងជារបៀបក្រុមអេគីបចារកម្មដើម្បីធ្វើស៊ីលោកជេនស៊ី ហួង ដូចអ្វីដែលរដ្ឋាភិបាលអាមេរិកដាក់ការសង្ស័យមែននោះ វានឹងក្លាយជារឿងមិនធម្មតា។ ប៉ុន្តែការពិតយ៉ាងណានោះនៅមិនទាន់ដឹងនៅឡើយទេ។ យើងមានតែរង់ចាំអ៊ុតទាំងអស់គ្នា។
ពាក់ព័ន្ធនឹងពាក្យចចាមអារ៉ាមនៃរឿងអាស្រូវស្នេហានេះ ពីដំបូងទី ក្រុមហ៊ុន Nvidia ព្យាយាមបដិសេធ។ ប៉ុន្តែកាលពីថ្ងៃអាទិត្យកន្លងទៅនេះ លោកជេនសិន ហួងខ្លួនលោកផ្ទាល់បាននិយាយសារភាពតាមត្រង់ថាលោកពិតជាបានប្រព្រឹត្តអំពើមិនស្មោះត្រង់ចំពោះភរិយាពេញច្បាប់របស់លោកមែន។ លោកនិយាយដោយប្រយោល ដោយមិនបានបញ្ចេញឈ្មោះអ្នកស្រីអាលីស ហួងនោះទេ។ នៅថ្ងៃដដែលនោះ ក្រុមហ៊ុន Nvidia ប្រកាសបើកការស៊ើបអង្កេតទៅលើរបាយការណ៍របស់សារព័ត៌មានដែលចុះផ្សាយថាលោកជេនសិន ហួងក្លាយជាចំណាប់ខ្មាំងនៃអន្ទាក់ចារកម្មបរទេស។ គ្រាន់តែផ្ទុះរឿងអាស្រូវនេះមិនយូរប៉ុន្មាន តម្លៃភាគហ៊ុនរបស់ Nvidia ធ្លាក់ចុះ៤៣០ពាន់លានដុល្លារភ្លាមៗព្រោះម្ចាស់ភាគហ៊ុនបារម្ភអំពីផលប៉ះពាល់របស់រឿងអាស្រូវនេះទៅលើក្រុមហ៊ុន និងកេរ្តិ៍ឈ្មោះរបស់នាយកប្រតិបត្តិដែលគេប្រៀបប្រដូចទៅនឹងការអភិវឌ្ឍដ៏ធំសម្បើមនៅក្នុងវិស័យបញ្ញាសិប្បនិម្មិតអេអាយ៕ ប្រភព៖ The Guardian
លោកជេនស៊ី ហួង និងភរិយា
ចែករំលែកព័តមាននេះ