ទីក្រុងប៉េកាំង៖ រដ្ឋមន្ត្រីការបរទេសចិន លោកវ៉ាងយី សន្ទនាគ្នាតាមទូរស័ព្ទជាមួយសមភាគីអាមេរិក លោករូប៊ីអូ (Rubio) «ប្រកបដោយភាពវិជ្ជមាន និងស្ថាបនា» កាលពីយប់មិញ។ នេះបើយោងតាមការផ្សាយរបស់របស់ទីភ្នាក់ងារព័ត៌មានចិន ស៊ីនហួ។ ក្នុងនោះ ភាគីចិនបង្ហាញឆន្ទៈចង់ពង្រឹងប្រព័ន្ធទំនាក់ទំនង និងកិច្ចសហប្រតិបត្តិការជាមួយទីក្រុងវ៉ាស៊ីនតោន។ ការពិភាក្សាគ្នាពីចម្ងាយលើកនេះកើតមានឡើងប្រហែលមួយសប្ដាហ៍មុនគម្រោងរៀបចំកិច្ចប្រជុំកំពូលអេប៉ិច (APEC) នៅទីក្រុងស៊ឹនចិន (Shenzhen) ប្រទេសចិន ហើយគេរំពឹងថាលោកត្រាំ និងលោកស៊ីជីនពីងនឹងចូលរួមកិច្ចប្រជុំ។
លោកវ៉ាងយីបានលើកឡើងថាទម្រាំអាចរក្សាបានស្ថិរភាពនៃទំនាក់ទំនងអាមេរិក-ចិនបានដូចសព្វថ្ងៃនេះមិនមែនជារឿងងាយស្រួលនោះឡើយ។ ដូច្នេះ លោកស្នើសុំឱ្យប្រទេសទាំង២បង្កើតជម្រើសប្រកបដោយវិចារណញាណដោយផ្អែកទៅលើលើគោលការណ៍គោរពគ្នា និងតម្កល់ផលប្រយោជន៍គ្នាទៅវិញទៅមក។ គេឮដំណឹងពីខាងភាគីចិនតែប៉ុណ្ណោះតាមរយៈទីភ្នាក់ងារព័ត៌មានជាផ្លូវការ។ ចំណែកខាងភាគីអាមេរិកមិនទាន់ចេញសេចក្ដីប្រកាសជាលាយលក្ខអក្សរពីក្រសួងការបរទេសនៅឡើយទេ។ លោកត្រាំ និងលោកស៊ីជីនពីងបានជួបគ្នា២ដងរួចហើយនៅឆ្នាំនេះ។ លោករូប៊ីអូថ្លែងប្រាប់អ្នកសារព័ត៌មានកាលពីថ្ងៃអង្គារថាក្រុមការងារកំពុងរៀបចំគម្រោងជួបគ្នាត្រីភាគីរវាងលោកពូទីន លោកត្រាំ និងលោកស៊ីជីនពីងនៅខាងក្រៅកិច្ចប្រជុំអេប៉ិច។
លោករូប៊ីអូថ្លែងថាលោកត្រាំចង់ឱ្យមានកិច្ចជំនួបនេះកើតឡើង ហើយអាមេរិកគិតថាវាអាចទៅរួច។ លោកត្រាំថ្លែងកាលពីថ្ងៃអង្គារថាលោកអាចនឹងជួបលោកស៊ីជីនពីង និងលោកពូទីននៅទីក្រុងស៊ឹនចិនដើម្បីពិភាក្សាគ្នាអំពីការបញ្ចប់សង្គ្រាមអុីរ៉ង់ និងបញ្ចប់កម្មវិធីនុយក្លេអ៊ែររបស់ប្រទេសនេះ។ លោកថាលោកបើកទូលាយជានិច្ចសម្រាប់ការពិភាក្សាគ្នាត្រីភាគីដើម្បីគ្រប់គ្រងគ្រឿងសព្វាវុធដោយផ្ដោតសំខាន់លើការគ្រប់គ្រងអាវុធនុយក្លេអ៊ែរ។ ប៉ុន្តែប្រទេសចិនហាក់មិនចាប់អារម្មណ៍នឹងកិច្ចពិភាក្សានេះទេ។ លោកត្រាំយល់ថាប្រទេសចិនមិនយូរទេនឹងផលិតបានអាវុធនុយក្លេអ៊ែរប្រហាក់ប្រហែលនឹងអាមេរិក។ ប៉ុន្តែក្រសួងការបរទេសចិននិយាយរបៀបដាក់ខ្លួនថាបរិមាណអាវុធនុយក្លេអ៊ែររបស់ខ្លួនមានតិចតួចស្ដួចស្ដើងណាស់ មិនអាចប្រៀបផ្ទឹមជាមួយអាមេរិក និងរុស្ស៊ីបានឡើយ។ ដូច្នេះ មិនមានហេតុផល ឬភាពប្រាកដនិយមណាមួយដែលចិនចាំបាច់ត្រូវចូលរួមការពិភាក្សាគ្នាត្រីភាគីនោះទេ។
សារព័ត៌មានវ៉លស្ទ្រីតជើណល (Wall Street Journal) ចុះផ្សាយថាលោកពូទីនក៏ចង់យកឱកាសនៃការជួបគ្នាត្រីភាគីលើកនេះដើម្បីរកវិធីបិទបញ្ចប់សង្គ្រាមអ៊ុយក្រែនផងដែរ។ ការជួបគ្នាកម្រិតកំពូលរវាងលោកស៊ី និងលោកត្រាំនៅឆ្នាំនេះបានជួយរក្សាស្ថិរភាពនៃទំនាក់ទំនងទ្វេភាគីរវាងចិន និងអាមេរិកពិតមែនហើយ។ ក៏ប៉ុន្តែប្រទេសទាំង២នៅតែមានចំណុចខ្វែងគំនិតគ្នាច្រើន។ នៅពេលជួបគ្នាកាលពីខែកញ្ញានៅទីក្រុងវ៉ាស៊ីនតោន ប្រទេសទាំង២យល់ព្រមបន្តសុពលភាពនៃការផ្អាកសង្គ្រាមពាណិជ្ជកម្មរយៈពេល២ខែ ហើយនឹងផុតសុពលភាពត្រឹមខែវិច្ឆិកានេះ។ ជម្លោះពាក់ព័ន្ធនឹងការដំឡើងពន្ធ ការជំរុញឱ្យចិនទិញទំនិញពីអាមេរិក ការដាក់កំហិតលើការនាំចេញរ៉ែកម្រ។ល។ នៅតែមិនទាន់ដោះស្រាយចេញដដែល៕ ប្រភព៖ Reuters
ចែករំលែកព័តមាននេះ