ខេត្តព្រះវិហារ ៖ ក្នុងឱកាសបុណ្យភ្ជុំបិណ្ឌឆ្នាំនេះប្រជាពលរដ្ឋនៅស្រុកសង្គមថ្មីបានស្នើដល់មន្ទីរជំនាញបង្កើនការសំអាតអនាម័យបរិស្ថានដូចជាដាក់ធុងសំរាមបន្ថែម រៀបចំកន្លែងអាចឲ្យភ្ញៀវទេសចរអង្គុយលេង សម្រាកលំហែកាយ នៅបរិវេណប្រាសាទព្រះខ័នកំពង់ស្វាយ ឲ្យបានសមរម្យដើម្បីទាក់ទាញភ្ញៀវទេសចរណ៍មកកម្សាន្តឲ្យបានច្រើននាឱកាសបុណ្យភ្ជុំបិណ្ឌនេះ ។
លោក អឹម ណារ៉េន ជាប្រជាពលរដ្ឋរស់នៅស្រុកសង្គមថ្មីបានលើកឡើងថា នៅពេលមានពិធីបុណ្យទាន ឬបុណ្យជាតិធំៗលោកតែងតែនាំបងប្អូន ក្រុមគ្រួសារទៅលេងកម្សាន្តជាប្រចាំនៅតំបន់រមណីយ៍ដ្ឋានប្រាសាទព្រះខ័នកំពង់ស្វាយ ប៉ុន្តែតាមការសង្កេតឃើញជាក់ស្តែងអ្វីដែលខ្វះខាតនៅតំបន់នោះដោយសារតែបរិស្ថានមិនសូវស្អាតជុំវិញប្រាសាទ ម្យ៉ាងវិញទៀតចំពោះធុងសំរាមនៅមានកម្រិតនៅឡើយ ។
ដូច្នេះហើយលោកបានស្នើដល់អាជ្ញាធរ ពិសេសនៅក្នុងពិធីបុណ្យភ្ជុំបិណ្ឌឆ្នាំនេះតែម្តងធ្វើយ៉ាងណាបង្កើនការដាក់បន្ថែមនូវធុងសំរាមដើម្បីដាស់តឿនឲ្យប្រជាពលរដ្ឋភ្ញៀវទេសចរចេះទុកដាក់សំរាមឲ្យបានត្រឹមត្រូវមួយវិញគួរបង្កើនជាកន្លែងសម្រាប់ឲ្យភ្ញៀវសំរាកលំហែកាយក្រោយពេលដើរកម្សាន្តរួច ។
លោក នៅ ចាន់គង់ ប្រធានមន្ទីរវប្បធម៌ និងវិចិត្រសីល្បៈខេត្តព្រះវិហារបានអះអាងថា អាជ្ញាធរកំពុងពន្លឿនការសាងសង់ជាកន្លែងសម្រាប់ឲ្យភ្ញៀវសម្រាកហូបបាយ ក្រោយដើរទស្សនាប្រាសាទព្រះខ័នកំពង់ស្វាយ និងប្រាសាទព្រះដំរីរួច ដោយឡែកចំពោះធុងសំរាមវិញក៏កំពុងតែរៀបចំធ្វើយ៉ាងណាដាក់នៅតាមតំបន់នានាក្នុងរមណីយ៍ដ្ឋានមួយនេះឲ្យបានឆាប់ៗខាងមុខនេះ ៕
កែសម្រួលដោយ ៖ សំណាង
ចែករំលែកព័តមាននេះ