ក្រុងហុងកុង ៖ ឆាកនៃអំពើហិង្សាថ្មីៗកើតមានកាលពីយប់ថ្ងៃទី១៥ កញ្ញា រវាងពួកបាតុករ និងប៉ូលិសនៅក្រុងហុងកុង ដោយប៉ូលិសបានប្រើឧស្ម័នបង្ហូរទឹកភ្នែក និងកាណុងបាញ់ទឹក ប្រឆាំងពួកសកម្មជនស្និទ្ធលទ្ធិប្រជាធិបតេយ្យ ដែលគប់ដុំថ្មនិងដបសាំងដុត។…
ក្រុងហុងកុង ៖ ឆាកនៃអំពើហិង្សាថ្មីៗកើតមានកាលពីយប់ថ្ងៃទី១៥ កញ្ញា រវាងពួកបាតុករ និងប៉ូលិសនៅក្រុងហុងកុង ដោយប៉ូលិសបានប្រើឧស្ម័នបង្ហូរទឹកភ្នែក និងកាណុងបាញ់ទឹក ប្រឆាំងពួកសកម្មជនស្និទ្ធលទ្ធិប្រជាធិបតេយ្យ ដែលគប់ដុំថ្មនិងដបសាំងដុត។
មនុស្សជាច្រើនសិបពាន់នាក់ បានបំពានការហាមឃាត់ហើយលើកគ្នាដើរហែក្បួនជាថ្មីនៅតាមវីថីនានា ពិសេសបណ្ដាមហាវិថីតភ្ជាប់សង្កាត់CAUSEWAY BAYនិង CENTRALជាសង្កាត់នាភាគកណ្ដាលកោះហុងកុង។ មិនខុសពីបាតុកម្មលើកមុនៗ ចាប់តាំងពីជាង៣ខែមកហើយ បាតុកម្មលើកនេះក៏ប្រែធាតុពីបាតុកម្មដោយសន្តិវិធី ទៅជាផ្ទុះហិង្សារវាងប៉ូលិសនិងពួកបាតុកររ៉ាឌីកាល់ ដែលបំបែកគ្នាជាក្រុមតូចៗ ហើយអុកឡុកប្លុកអគារដែលមានទីស្នាក់ការរបស់រដ្ឋាភិបាលហុងកុង។
កងកម្លាំងប៉ូលិសបានបាញ់គ្រាប់បែកផ្សែងបង្ហូរទឹកភ្នែកជាច្រើនគ្រាប់និងកាណុងបាញ់ទឹកបាញ់ទឹកមានពណ៌ខៀវលើពួកបាតុករ ដែលគប់ដុំថ្មនិងដបសាំងដុតតបប៉ូលិសវិញ ត្រង់បារ៉ាស់ដែលដាក់ជុំវិញប្លុកអគាររដ្ឋាភិបាល។ បណ្ដារូបភាពផ្សាយតាមទូរទស្សន៍ក្នុងស្រុក បង្ហាញពួកបាតុករដែលនាំគ្នាហែកនិងដុតបដាពាក្យស្លោកអបអរសាទរ ខួបលើកទី៧០នៃការបង្កើតសាធារណរដ្ឋប្រជាមានិតចិន ហើយក៏ដុតផងដែរទង់ជាតិចិនមួយ។
មុនពេលដកថយចំពោះការបង្ក្រាបរបស់ប៉ូលិស បាតុករមួយចំនួនបាននាំគ្នាបង្កើតរបាំងនានា ដុតរបស់របរទាំងឡាយហើយអុកឡុកបណ្ដាស្ថានីយមេត្រូ ចៀសវាងការប៉ះទង្គិចគ្នាដោយផ្ទាល់។
ឧប្បត្តិហេតុទាំងនោះជាការបញ្ចប់រយៈពេលប៉ុន្មានថ្ងៃដែលគ្មានការប៉ះទង្គិចគ្នា រវាងប៉ូលិសនិងពួកបាតុករ។ គម្រោងបាតុកម្មឬកូដកម្មថ្មី សម្រាប់បណ្ដាសប្ដាហ៍ខាងមុខ ត្រូវបានគេផ្សព្វផ្សាយតាមបណ្ដាញសង្គម ខណៈជិតដល់បុណ្យខួបសំខាន់២គឺ ថ្ងៃទី២៨ កញ្ញា កំណត់ពីខួបលើកទី៥នៃការចាប់ផ្ដើមចលនាឆ័ត្រឆ្នាំ២០១៤ ហើយថ្ងៃទី១តុលាជាថ្ងៃខួបទី៧០នៃការបង្កើតសាធារណរដ្ឋប្រជាមានិតចិន៕ (កែសម្រួលដោយ ៖ បុប្ផា)
ចែករំលែកព័តមាននេះ