រាជធានីភ្នំពេញ ៖ ថវិកាឧបត្ថម្ភដែលជាប្រាក់រង្វាន់លើកទឹកចិត្តផ្ទាល់របស់សម្តេចអគ្គមហាសេនាបតីតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ចំនួន១២០.៥០០ដុល្លារអាមេរិកត្រូវបានលោកហ៊ុន ម៉ានី ដែលជាបុត្រារបស់សម្តេចទាំងទ្វេ នាំយកទៅប្រគល់ជូនដល់កីឡាករ-កីឡាការិនីជនពិការ និងគ្រូបង្វឹក-គ្រូជំនួយ ដែលទទួលបានជ័យលាភីពីការប្រកួតកីឡាអាស៊ានប៉ារ៉ាហ្គេមលើកទី៧ នៅប្រទេសមីយ៉ាន់ម៉ា កាលពីរសៀលថ្ងៃទី២៤ មីនា នៅមជ្ឈមណ្ឌលជនពិការកម្ពុជា ស្ថិតនៅក្នុងសង្កាត់ភ្នំពេញថ្មី ។
លោកយី វាសនា អគ្គលេខាធិការគណៈកម្មាធិការជាតិប៉ារ៉ាឡាំពិកកម្ពុជាឱ្យដឹងថា ព្រឹត្តិការណ៍អាស៊ានប៉ារ៉ាហ្គេមលើកទី៧ នៅទីក្រុងណៃពីដោ ប្រទេសមីយ៉ាន់ម៉ា ដែលកម្ពុជាបានចូលរួម គឺចាប់ផ្តើមតាំងពីថ្ងៃទី១១ ដល់ ២១ ខែមករា ឆ្នាំ២០១៤ មកម៉្លេះ ។ ក្នុងនោះគណៈកម្មាធិការជាតិប៉ារ៉ាឡាំពិកកម្ពុជាបានដឹកនាំប្រតិភូ កីឡាករ-កីឡាការិនី គ្រូបង្វឹក សរុបមានចំនួន៣៣រូបទៅចូលរួមប្រកួតលើប្រភេទវិញ្ញាសាអត្តពលកម្ម (រត់ចម្ងាយ, ប្រណាំងរទេះ) ហែលទឹក និងបាល់ទះអង្គុយ ។ ជាលទ្ធផល កីឡាករ-កីឡាការិនីជនពិការកម្ពុជា ទទួលបានជ័យលាភីល្អគួរឱ្យកត់សម្គាល់ ក្នុងនោះរួមមាន ផ្នែកអត្តពលកម្មទទួលបានមេដាយមាស៣គ្រឿង, ប្រាក់១១គ្រឿង, សំរឹទ្ធ៥គ្រឿង ។
ផ្នែកហែលទឹកទទួលបានមេដាយមាស១គ្រឿង និងផ្នែកបាល់ទះអង្គុយទទួលបានមេដាយសំរឹទ្ធ១២គ្រឿង ។ សរុបមេដាយទទួលបានទាំងអស់ចំនួន៣២គ្រឿង ក្នុងនោះមាស៤គ្រឿង, ប្រាក់១១គ្រឿង និងសំរឹទ្ធ១៧គ្រឿង ។ លោកបន្តថា ឆ្លើយតបនឹងការខិតខំប្រឹងប្រែងរបស់កីឡាករ-កីឡាការិនី គ្រូបង្វឹក គ្រូជំនួយ រាជរដ្ឋាភិបាលកម្ពុជាដែលមានសម្តេចតេជោ ហ៊ុន សែន ជានាយករដ្ឋមន្ត្រី បានយកចិត្តទុកដាក់ និងលើកទឹកចិត្ត ដោយបានធ្វើវិសោធនកម្មលើអនុក្រឹត្យផ្តល់ប្រាក់រង្វាន់ជ័យលាភី និងដាក់ឱ្យប្រើប្រាស់អនុក្រឹត្យថ្មីលេខ៥៣២ អនក្រ.បក ចុះថ្ងៃទី២៥ ខែវិច្ឆិកា ឆ្នាំ២០១៣ ស្តីពីការផ្តល់ប្រាក់រង្វាន់ច្រើនជាងមុនចំពោះជ័យលាភី និងប្រាក់ឧបត្ថម្ភចំពោះគ្រូបង្វឹកក្នុងការប្រកួតកីឡាលក្ខណៈអន្តរជាតិនោះ បានធ្វើឱ្យការប្រកួតទទួលបានជោគជ័យយ៉ាងធំធេងសម្រាប់ប្រទេសជាតិ ។
លោកហ៊ុន ម៉ានី មានប្រសាសន៍ថា ថ្ងៃនេះលោកមានកិត្តិយសខ្លាំងណាស់ដែលបាននាំយកថវិកា និងប្រសាសន៍ផ្តាំផ្ញើសាកសួរសុខទុក្ខ និងការកោតសរសើរពីសំណាក់សម្តេចទាំងពីរជូនដល់កីឡាករ-កីឡាការិនីជនពិការ រួមទាំងគ្រូបង្វឹក និងគ្រូជំនួយ ដែលបានខិតខំប្រឹងប្រែងអស់ពីកម្លាំងកាយចិត្តនាំយកនូវមេដាយជ័យលាភីមកជូនជាតិមាតុភូមិយើង ។ េមដាយដែលទទួលបានពីការប្រកួតកីឡាអាស៊ានប៉ារ៉ាហ្គេមលើកទី៧ គឺជាជោគជ័យមួយដែលសបញ្ជាក់ឱ្យឃើញពីការគាំទ្ររបស់គណៈកម្មាធិការជាតិប៉ារ៉ាឡាំពិកកម្ពុជា ក្នុងការស្វែងរកកេរ្តិ៍ឈ្មោះជូនព្រះរាជាណាចក្រកម្ពុជាទាំងក្នុងថ្នាក់តំបន់ និងលើឆាកអន្តរជាតិ ។ លោកបន្តទៀតថា រាជរដ្ឋាភិបាលកម្ពុជានៅតែចាត់ទុកកីឡាករ-កីឡាការិនីជនពិការជាកោសិកាមួយដ៏សំខាន់ និងមានតម្លៃសម្រាប់ប្រទេសជាតិ ។ ការប្តេជ្ញាមោះមុតនេះហើយដែលធ្វើឱ្យអត្តពលិកជនពិការយើងសម្រេចបានជោគជ័យ និងមេដាយយ៉ាងច្រើន ។
សម្រាប់ប្រាក់រង្វាន់ដែលត្រូវប្រគល់ជូនអត្តពលិកជនពិការនៅពេលនេះ គឺមេដាយមាសទទួលបានទឹកប្រាក់ចំនួន៥.០០០ដុល្លារ, មេដាយប្រាក់៣.០០០ដុល្លារ និងេមដាយសំរឹទ្ធ២.០០០ដុល្លារក្នុងមួយគ្រឿងៗ ។ សូមបញ្ជាក់ថា មកទល់បច្ចុប្បន្ននេះ មេដាយដែលអត្តពលិកជនពិការដណ្តើមបានពីព្រឹតិ្តិការណ៍កីឡាអាស៊ានប៉ារ៉ាហ្គេមតាំងពីលើកទី១ រហូតដល់លើកទី៧ នេះ សរុបមានចំនួន១២០គ្រឿងហើយក្នុងនោះមេដាយមាស២០គ្រឿង មេដាយប្រាក់៥៤គ្រឿង និងមេដាយសំរឹទ្ធ៤៦គ្រឿង ៕
ចែករំលែកព័តមាននេះ