រាជធានីភ្នំពេញ ៖ ការប្រកួតកីឡាវាយកូនបាល់ជ្រើសរើសជើងឯកយុវជនថ្នាក់ជាតិលើកទី២ ប្រចាំឆ្នាំ២០១៤ ដែលបានចាប់ផ្តើមតាំងពីថ្ងៃទី២១ មីនាមកនោះ បានបញ្ចប់កាលពីល្ងាចថ្ងៃទី២៣ មីនា ហើយពិធីបិទការប្រកួតត្រូវបានគេរៀបចំធ្វើនៅមជ្ឈមណ្ឌលបណ្តុះបណ្តាលកីឡាវាយកូនបាល់កម្ពុជា (CCC) ។
រាជធានីភ្នំពេញ ៖ ការប្រកួតកីឡាវាយកូនបាល់ជ្រើសរើសជើងឯកយុវជនថ្នាក់ជាតិលើកទី២ ប្រចាំឆ្នាំ២០១៤ ដែលបានចាប់ផ្តើមតាំងពីថ្ងៃទី២១ មីនាមកនោះ បានបញ្ចប់កាលពីល្ងាចថ្ងៃទី២៣ មីនា ហើយពិធីបិទការប្រកួតត្រូវបានគេរៀបចំធ្វើនៅមជ្ឈមណ្ឌលបណ្តុះបណ្តាលកីឡាវាយកូនបាល់កម្ពុជា (CCC) ។
លោកជា ពៅ ដែលជាមន្ត្រីគណៈកម្មការរៀបចំការប្រកួតបានឱ្យដឹងថា ការប្រកួតកីឡាវាយកូនបាល់ជ្រើសរើសជើងឯកយុវជនថ្នាក់ជាតិលើកទី២ នេះ គឺបានដំណើរការប្រកួតរយៈពេល៣ថ្ងៃ ដោយមានកីឡាករ-កីឡាការិនីចូលរួមសរុបចំនួន៧៤នាក់ ក្នុងនោះកីឡាការិនី២១នាក់ ។ សម្រាប់វិញ្ញាសាប្រកួតរួមមាន ប្រកួតឯកត្តជនបុរស-នារីអាយុក្រោម១២ឆ្នាំ, អាយុក្រោម១៤ឆ្នាំ និងអាយុក្រោម១៨ឆ្នាំ ។ លោកទេព រិទ្ធីវិទ្ធ អគ្គលេខាធិការសហព័ន្ធកីឡាវាយកូនបាល់កម្ពុជា បានបញ្ជាក់ថា ការប្រកួតនេះត្រូវបានរៀបចំឡើងក្នុងគោលបំណងដើម្បីជ្រើសរើសរកយុវជនដែលមានសមត្ថភាពមកពីបណ្តាខេត្ត-រាជធានី ដើម្បីត្រៀមធ្វើការហ្វឹកហាត់ចូលរួមនៅក្នុងព្រឹតិ្តការណ៍ប្រកួតកីឡាស៊ីហ្គេមនៅក្នុងឆ្នាំ២០២៣ ដែលកម្ពុជាទទួលធ្វើជាម្ចាស់ផ្ទះ ។
លោកបានបញ្ជាក់បន្ថែមទៀតថា នៅក្នុងចំណោមកីឡាករ-កីឡាការិនីដែលមកចូលរួមប្រកួតនេះ លោកសម្លឹងឃើញកីឡាករ-កីឡាការិនីឆ្នើមចំនួន៤នាក់ដែលមានអាយុក្រោម១២ឆ្នាំ និងក្រោម១៤ឆ្នាំ ហើយពួកគាត់ទាំងនោះនឹងត្រូវបានសហព័ន្ធជ្រើសយកដើម្បីធ្វើការបណ្តុះបណ្តាលត្រៀមទុកចូលរួមប្រកួតនៅក្នុងព្រឹត្តិការណ៍ស៊ីហ្គេមឆ្នាំ២០២៣ ។ ជាចុងក្រោយ លោកបានថ្លែងអំណរគុណដល់ដៃគូឧបត្ថម្ភមាន ក្រុមហ៊ុន Ezecom អង្គការហាការ និងភោជនីយដ្ឋាន ដែលបានចូលរួមធ្វើជាដៃគូឧបត្ថម្ភដល់សហព័ន្ធកីឡាវាយកូនបាល់កម្ពុជា ដើម្បីធ្វើឱ្យការប្រកួតនេះដំណើរការទៅបានយ៉ាងល្អប្រសើរ ។ ចំពោះលទ្ធផលនៃការប្រកួត វិញ្ញាសាឯកត្តជនបុរសអាយុក្រោម១២ឆ្នាំ ចំណាត់ថ្នាក់លេខ១ បានទៅលើកីឡាករឡេង សារិនរាជ និងចំណាត់ថ្នាក់លេខ២ បានទៅលើកីឡាករប៉ែន សុឃៀង ។ ផ្នែកនារី ចំណាត់ថ្នាក់លេខ១ បានទៅលើកីឡាការិនីចេង សារីវត្តី និងចំណាត់ថ្នាក់លេខ២ បានទៅលើកីឡាការិនីដារីរ៉ាត់ ជីទីណា។
វិញ្ញាសាឯកត្តជនបុរសអាយុក្រោម១៤ឆ្នាំ ចំណាត់ថ្នាក់លេខ១ បានទៅលើកីឡាករប៉ែន សុផុន និងចំណាត់ថ្នាក់លេខ២ បានទៅលើកីឡាការទេព ធីម៉ូទី ។ ផ្នែកនារី ចំណាត់ថ្នាក់លេខ១ បានទៅលើកីឡាការិនីហួ ស្រីពៅ និងចំណាត់ថ្នាក់លេខ២ បានទៅលើកីឡាការិនីដារី សុដាណេ ។ វិញ្ញាសាឯកត្តជនបុរសអាយុក្រោម១៨ឆ្នាំ ចំណាត់ថ្នាក់លេខ១ បានទៅលើកីឡាករចេង រុងរាជ និងចំណាត់ថ្នាក់លេខ២ បានទៅលើកីឡាករសុខ វិចិត្រ ។ ផ្នែកនារី ចំណាត់ថ្នាក់លេខ១ បានទៅលើកីឡាការិនីចេង ចាន់នាង និងចំណាត់ថ្នាក់លេខ២ បានទៅលើកីឡាការិនីឥត លក្ខិណា ៕
ចែករំលែកព័តមាននេះ