រាជធានីភ្នំពេញ ៖ ថវិកាឧបត្ថម្ភដែលជាប្រាក់រង្វាន់លើកទឹកចិត្តផ្ទាល់របស់ម្តេចអគ្គមហាសេនាបតីតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ចំនួន១២០.៥០០ដុល្លារអាមេរិកត្រូវបាននំាយកមកប្រគល់ជូនដល់កីឡាករ កីឡាការិនីជនពិការនិងគ្រូបង្វឹក-គ្រូជំនួយ ដែលទទួលបានជ័យលាភីពីការប្រកួតកីឡាអាស៊ានប៉ារ៉ាហ្គេមលើកទី៧ នៅប្រទេសមីយ៉ាន់ម៉ាហើយ កាលពីរសៀលថៃ្ងទី២៤ មីនា នៅមជ្ឈមណ្ឌលជនពិការកម្ពុជាក្នុងសង្កាត់ភ្នំពេញថ្មី។
ពិធីនេះត្រូវបានធ្វើឡើងក្រោមអធិបតីភាព លោក ហ៊ុន ម៉ានី ប្រធានសហភាពសហព័ន្ធយុវជនកម្ពុជាតំណាងដ៍ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន និងសម្តេចកិត្តិព្រឹទ្ធបណ្ឌិតប៊ុន រ៉ានី ហ៊ុន សែន អមដោយអនុរដ្ធលេខាធិការក្រសួងអប់រំយុវជននិងកីឡា ព្រមទំាងគណៈប្រតិភូអមដំណើរជាច្រើន។
លោក យី វាសនា អគ្គលេខាធិការប៉ារ៉ាឡាំពិកកម្ពុជា បាន ឱ្យដឹងថា ព្រឹត្តិការណ៍អាស៊ានប៉ារ៉ាហ្គេមលើកទី៧ នៅទីក្រុងណៃពីដោរ ប្រទេសភូមា ដែលកម្ពុជាបានចូលរួមគឺចាប់ផ្តើម កាលពីថ្ងៃទី១១ដល់២១ មករា ក្នុងនោះគណៈកម្មាធិការជាតិប៉ារ៉ាឡាំពិកកម្ពុជា បានដឹកនាំប្រតិភូ កីឡាករ កិឡាការិនី គ្រូបង្វឹក សរុបចំនួន៣៣រូប ទៅចូលរួមប្រកួតលើប្រភេទវិញ្ញាសា អត្តពលកម្ម (រត់ចំងាយ, ប្រណាំងរទេះ), ហែលទឹក និងបាល់ទះអង្គុយ ។ ជាលទ្ធផលកីឡាករ កីឡាការិនីជនពិការកម្ពុជា ទទួលបានជ័យលាភីល្អគួឱ្យកត់សំគាល់ក្នុងនោះរួមមាន ផ្នែកអត្តពលកម្ម ទទួលបានមេដាយមាស ០៣គ្រឿង, ប្រាក់ ១១គ្រឿង, សំរឹទ្ធ០៥គ្រឿង, ផ្នែកហែលទឹកទទួលបានមេដាយមាស០១គ្រឿង, ផ្នែកបាល់ទះអង្គុយទទួលបានមេដាយសំរឹទ្ធ ១២គ្រឿង។ សរុបមេដាយទទួលបានទាំងអស់ចំនួន៣២គ្រឿង មាស៤គ្រឿង, ប្រាក់១១គ្រឿង និងសំរឹទ្ធ ១៧គ្រឿង។
លោក បន្តទៀតថា ឆ្លើយតបនឹងការខិតខំប្រឹងប្រែងរបស់ កីឡាករ កីឡាការីនី គ្រូបង្វឹក គ្រូជំនួយ និងពិសេសក្រោមការដឹកនាំរបស់រាជរដ្ឋាភិបាលដែលមាន សម្តេចតេជោ ជានាយករដ្ឋមន្រ្តីនៃព្រះរាជាណាចក្រកម្ពុជា បានយកចិត្តទុកដាក់និងលើកទឹកចិត្ត ធ្វើវិសោធនកម្មលើអនុក្រឹត្យប្រាក់រង្វាន់ជ័យលាភី និងដាក់ឲ្យប្រើប្រាស់អនុក្រឹត្យថ្មី លេខ ៥៣២ អនក្រ.បក ចុះថ្ងៃទី២៥ វិច្ឆិកា ឆ្នាំ ២០១៣ ស្តីពីការផ្តល់ប្រាក់រង្វាន់ចំពោះជ័យលាភី និងប្រាក់ឧបត្ថម្ភចំពោះគ្រូបង្វឹកក្នុងការប្រកួតកីឡាលក្ខណៈអន្តរជាតិនោះ បានធ្វើឱ្យការប្រកួតទទួលបានជោគជ័យយ៉ាង ធំធេងសម្រាប់ប្រទេសជាតិ ៕
ចែករំលែកព័តមាននេះ