រាជធានីភ្នំពេញ ៖ ក្រសួងធនធានទឹក និងឧតុនិយម បានឲ្យប្រកាសឲ្យប្រជាពលរដ្ឋមានការប្រុងប្រយ័ត្នចំពោះបាតុភូតផ្គរ រន្ទះ ទឹកជំនន់និងរលកសមុទ្រ ខណៈមានភ្លៀងបន្តធ្លាក់ចាប់ពីថ្ងៃទី១៥ ដល់១៩ ខែកញ្ញា។ យោងតាមសេចក្តីជូនដំណឹងរបស់ក្រសួងធនធានទឹកនិងឧតុនិយម ចេញផ្សាយនៅថ្ងៃទី១៣ ខែកញ្ញា ឆ្នាំ២០១៩ បានឲ្យដឹងថា អនុលោមតាមសារាចររបស់រាជរដ្ឋាភិបាលលេខ០៩ ចុះថ្ងៃទី១០
ខែកញ្ញា ឆ្នាំ២០១៩ ស្តីពីការបន្តវិធានការត្រៀមទប់ទល់នឹងគ្រោះទឹកជំនន់ ។
ផ្អែកលើសភាពការណ៍ជាក់ស្តែងនៃការវិវត្តអាកាសធាតុ ពាក់ព័ន្ធនឹងឥទ្ធិពលនៃប្រព័ន្ធសម្ពាធទាប (ITCZ) ដែលបានអូសបន្លាយកាត់លើប្រទេសថៃ ឡាវ និងវៀតណាម ហើយដែលបច្ចុប្បន្ន បានរំកិលចុះមក
ក្រោម កាត់លើកម្ពុជាក្នុងរយៈពេល ២-៣ ថ្ងៃខាងមុខនេះ ។ ស្ថានភាពបែបនេះធ្វើឲ្យ ៖
១-ចាប់ពីថ្ងៃទី១៦-១៩ ខែកញ្ញា នឹងមានភ្លៀងធ្លាក់រាយប៉ាយក្នុងកម្រិតបរិមាណកើនឡើងជាលំដាប់ ក្នុងក្របខណ្ឌស្ទើរទូទាំងប្រទេសដែលអាចបណ្តាលឲ្យបណ្តាខេត្តមួយចំនួនប្រឈមនឹងជំនន់ទឹកភ្លៀង ។ ២-ចាប់ពីថ្ងៃទី១៥-១៩ ខែកញ្ញា បណ្តារាជធានី-ខេត្តដែលអាចប្រឈមខ្ពស់នឹងជំនន់ទឹកភ្លៀងមាន រាជធានីភ្នំពេញ ខេត្តកណ្តាល កំពង់ស្ពឺ តាកែវ ពោធិ៍សាត់ ព្រៃវែង ស្វាយរៀង កំពង់ធំ កំពង់ចាម ត្បូងឃ្មុំ និងខេត្តនៅជាប់មាត់សមុទ្រ ។
អាស្រ័យដូចបានជម្រាបជូនខាងលើ សូមសាធារណជនជ្រាបជាព័ត៌មាន និងមានការប្រុងប្រយ័ត្នខ្ពស់ចំពោះបាតុភូត ផ្គរ រន្ទះ ទឹកជំនន់ និងរលកសមុទ្រ ។
គណៈរដ្ឋមន្ត្រី នាព្រឹកថ្ងៃទី១១ ខែកញ្ញា បានបើកកិច្ចប្រជុំពេញអង្គក្រោមអធិបតីភាពសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ។ មុនបើកកិច្ចប្រជុំ សម្ដេចតេជោនាយករដ្ឋមន្ត្រី ហ៊ុន សែន មានប្រសាសន៍ថា ថ្ងៃនេះសម្ដេចចៅហ្វាវាំង គង់ សំអុល បាននាំយកអំណោយទៅចែកនិងចុះទៅសួរសុខទុក្ខប្រជាពលរដ្ឋនៅខេត្តក្រចេះ ។ ដូច្នេះ ខេត្តស្ទឹងត្រែង ក្រចេះកំពង់ចាម លោកអភិបាលខេត្តមិនបាច់មានក៏បានដែរ គឺនៅខាងលើប្រចាំការសម្រាប់សភាពការណ៍ ។
យោងតាមការព្យាករ ឆ្នាំនេះអាចនឹងមានជំនន់ធំ ឥឡូវនេះនៅខេត្តស្ទឹងត្រែង ក្រចេះ កំពង់ចាម ទឹកស្ថិតនៅលើកម្រិតប្រកាសអាសន្ន ហើយអាចនឹងមានការធ្លាក់ចុះ តែការធ្លាក់ចុះនេះក៏មិនច្រើនដែរ នឹងអាចហក់ឡើងវិញក្លាយទៅជាជំនន់ធំ ។ ប៉ុន្មានថ្ងៃកន្លងទៅនេះ នៅខេត្តស្ទឹងត្រែង គឺទឹកឡើងដល់កម្រិតត្រូវប្រកាសអាសន្ន ក៏ប៉ុន្តែដោយសារនៅខាងលើតាមបណ្តាព្រែកវាមិនទាន់ចូល ដូច្នេះមកដល់មុខព្រះបរមរាជវាំងទឹកមានកម្ពស់ជាង៩ ម៉ែត្រ ។
ប៉ុន្តែបើទឹកហូរមកលើកក្រោយ នៅពេលដែលខាងលើចូលពេញគឺទឹកបានគំរាមកំហែងនៅតាមបណ្តាខេត្តតាមដងទន្លេមេគង្គ ដងទន្លេបាសាក់ ដងទន្លេសាប និងតាមដងទន្លេទាំងអស់ ត្រូវមានការប្រុងប្រយ័ត្ន និងត្រៀមរៀបចំជួយយកអាសា ត្រូវរៀបចំខ្លួនព្រោះស្ថានភាពទឹកជំនន់ធំ ។ ទឹកនេះមិនដល់ឆ្នាំ២.០០០ទេ ក៏ប៉ុន្តែវាអាចដូចឆ្នាំ២.០១៤ដែលយើងអាចចាត់ទុកថា ជាទឹកជំនន់មួយដែលមានទំហំធំ ។
សម្ដេចតេជោមានប្រសាសន៍ថា ប៉ុន្តែបើសម្រាប់អ្នករស់នៅតាមដងទន្លេ បើទឹកមិនលិចអ្នកទន្លេព្រួយចិត្តណាស់ បើទឹកលិចគឺល្អ ។ ប៉ុន្តែបើទឹកលិចយូរពេកក៏វាមិនកើត ។ កន្លងទៅនេះយើងមិនទាន់មានបញ្ហាអំពីទឹកទន្លេទេ តែទោះជាយ៉ាងណាយើងត្រូវតែមានការប្រុងប្រយ័ត្នជាប់ ចំពោះបញ្ហាបាក់ច្រាំង ទឹកជំនន់ យើងត្រូវប្រុងប្រយ័ត្នពីជំងឺតម្កាត់ផ្សេងៗ និងសត្វធាតុ ត្រូវរកកន្លែងទួលសុវត្ថិភាព គឺយើងត្រូវគិតគូរគ្រប់ផ្នែកទាំងអស់ ៕
អត្ថបទសរសេរ ដោយ
អត្ថបទសរសេរ ដោយ
ចែករំលែកព័តមាននេះ