រាជធានីភ្នំពេញ ៖ នៅលើសង្វៀនស្ថានីយទូរទស្សន៍ស៊ីអិនស៊ីថ្ងៃសៅរ៍ទី១៤ ខែកញ្ញា មានការប្រកួតប្រដាល់ជាលក្ខណៈមិត្តភាពអន្តរជាតិដ៏កក្រើក រវាងជើងខ្លាំងកម្ពុជា៣រូបប៉ះជាមួយអ្នកប្រដាល់ឆ្លងដែនមកពីថៃ ។
កីឡាករ មឿន សុខហ៊ុច មកពីក្លិបពុទ្ធសេរី វង្សពោធិ៍សែនជ័យ ប្រកួតជាមួយកីឡាករថៃ ក្រៀងក្រៃ ត.សិលាឆ័យ ក្នុងប្រភេទទម្ងន់៦៣,៥គីឡូក្រាម ។ កីឡាករ វ៉ាន់ វឿន មកពីក្លិបឃ្លាំងមឿងកីឡា ប្រកួតជាមួយកីឡាករថៃ ដាំកាន់វ៉ាន ស៊ីត.ក ក្នុងប្រភេទទម្ងន់៥៧គីឡូក្រាម ។ សេក គឹមសាន មកពីក្លិបអង្គរមានជ័យខេត្តសៀមរាប ប្រកួតជាមួយកីឡាករថៃ ខាវហម ស. ស៊ុមម៉ាយ ក្នុងប្រភេទទម្ងន់៥៧គីឡូក្រាម ។
ការប្រកួតរវាងកីឡាករ មឿន សុខហ៊ុច និងកីឡាករថៃ ក្រៀងក្រៃ ត្រូវបានគេចាត់ទុកថាជាគូប្រកួតដ៏ជក់ចិត្តនៅក្នុងសប្ដាហ៍នេះ ព្រោះថាគេទាំង២នាក់ធ្លាប់ជួបប្រកួតគ្នានៅលើសង្វៀន
ស៊ីអិនស៊ីច្រើនលើកច្រើនសាមកហើយ ហើយលទ្ធផលមានចាញ់មានឈ្នះទៅវិញទៅមក
ដូចគ្នា ។ ទោះជាយ៉ាងណា អ្នករៀបចំការប្រកួតនៅតែមិនទាន់អស់ចិត្ត សូម្បីតែអ្នកតាមដានការប្រកួតក៏មិនអស់ចិត្តដូចគ្នា ហើយចង់ឃើញគេទាំងពីរប្រកួតគ្នាម្ដងទៀត ។ ម្យ៉ាងវិញទៀតគេទាំងពីរមានថ្វីដៃប្រកួតនៅលើសង្វៀនល្អប្រហាក់ប្រហែលគ្នាទៀត ។ ដូច្នេះ សម្រាប់ការជួបគ្នាលើកនេះ គ្មានអ្នកណាម្នាក់ហ៊ានទាយទុកមុនបានទេថា អ្នកណាជាអ្នកដែលមានសំណាងយកឈ្នះលើការប្រកួតនេះ ។
ចំណែកជើងខ្លាំង វ៉ាន់ វឿន ត្រូវជួបប្រកួតជាមួយអ្នកប្រដាល់ជើងខ្លាំងថៃ ដាំកាន់វ៉ាន ។គូនេះមិនធ្លាប់ជួបប្រកួតគ្នាពីមុនមកទេ ប៉ុន្តែអ្នករៀបចំកម្មវិធីប្រកួតអះអាងថា កីឡាករថៃរូបនេះគឺជាជើងខ្លាំងដែលមានថ្វីដៃប្រកួតល្អបំផុត ។
ចំណែក វ៉ាន់ វឿន ក៏មិនអន់ដែរ គេជាអ្នកប្រដាល់ជើងខ្លាំងទម្ងន់ស្រាលមួយរូប និងពិបាករក ដៃគូប្រកួតបំផុត ។ ទោះជាយ៉ាងណា កីឡាករប្រដាល់ប្រចាំក្លិបឃ្លាំងមឿងកីឡារូបនេះមិនសូវចេះអួតក្អេងក្អាងនោះទេ ប៉ុន្តែទម្លាប់របស់គេគឺមិនងាយចុះចាញ់ឡើយ ទោះខ្លាំងប៉ុណ្ណាក៏ត្រូវតែប្រកួតដែរ ។ ម្យ៉ាងវិញទៀត សំអាងលើស្នៀតជង្គង់ដ៏ស្ទាត់ជំនាញរបស់គេ ប្រហែលជាមិនធ្វើឱ្យអ្នកគាំទ្រអស់សង្ឃឹមឡើយ ។
កីឡាករ សេក គឹមសាន ប៉ះជាមួយកីឡាករថៃ ខាវហម ដែលមិនធ្លាប់មកប្រកួតនៅស្រុកខ្មែរពីមុនមកទេ ហើយក៏គ្មានអ្នកណាម្នាក់ដឹងថា គេមានថ្វីដៃប្រកួតខ្លាំងប៉ុនណានោះដែរ។ ដូច្នេះបើចង់ដឹងច្បាស់ កុំភ្លេចទៅទស្សនាការប្រកួតទាំងអស់គ្នានៅសង្វៀនស៊ីអិនស៊ីថ្ងៃសៅរ៍ខាងមុខនេះ។ រីឯគូប្រកួតមិត្តភាពនៅក្នុងសប្ដាហ៍នេះ សារឿន ទិត្យ មកពីក្លិបតាព្រហ្មមានជ័យ ប្រកួតជាមួយ សោម ពិសិដ្ធ មកពីក្លិបអេភូថងកីឡា ៕ (កែសម្រួលដោយ ៖ បុប្ផា)
ចែករំលែកព័តមាននេះ