រាជធានីភ្នំពេញ ៖ បន្ទាប់ពីបានលេចធ្លោនៅក្នុងសង្វៀនប្រដាល់នាពេលចុងក្រោយនេះ កីឡា
ករជើងខ្លាំងវ័យក្មេង ឡុង ឡា ត្រូវគេឃើញឡើងកូដឡើងប្រកួតនៅលើសង្វៀនអន្តរជាតិ នាល្ងាចថ្ងៃសៅរ៍១៤ ខែកញ្ញា ដោយប៉ះជាមួយកី ឡាករជើងខ្លាំងថៃ ហ្វានិមិត្ត ។ គូនេះត្រូវគេរំពឹងថា ពិតជាធ្វើឲ្យរញ្ជួយសង្វៀនអន្តរជាតិ នៅ ក្នុងព្រឹត្តិការណ៍ Tv5 Knock out Serie by K-Cement ដែលជាការប្រកួតបើកវគ្គជម្រុះពីក្នុងចំណោម១៦នាក់យក៨នាក់ នាសប្ដាហ៍ចុងក្រោយ ។
កីឡាករកម្ពុជារូបនេះត្រូវបានគេចាប់អារម្មណ៍ហួសប្រមាណ ក្រោយពីមានការប្រកាសថា តម្រូវឲ្យស្វាគមន៍កីឡាករថៃហ្វានិមិត្ត ដែលអ្នកណាៗក៏ស្គាល់ថាជាជើងខ្លាំងធ្លាប់ប្រកួតឈ្នះកីឡាករកម្ពុជាកន្លងមក ។ វត្តមានកីឡាករទាំងកម្ពុជានិងថៃក្នុងសប្ដាហ៍នេះ មិនថាការប្រកួតជាលក្ខណៈអន្តរជាតិ ឬការប្រកួតជាលក្ខណៈមិត្តភាពក្នុងស្រុកនោះទេ ពិតជាធ្វើឲ្យអ្នកស្នេហាវិស័យប្រដាល់មានការចាប់អារម្មណ៍ ជាពិសេសគឺវត្តមានរបស់កីឡាករ ឡុង ឡា មានការចាប់អារម្មណ៍យ៉ាងខ្លាំង ដោយសារតែកីឡាកររូបនេះបាត់មុខមួយរយៈមកហើយ។
សមាសភាពគូប្រកួតជាលក្ខណៈអន្តរជាតិនេះ ត្រូវបានគេអះអាងថាមានការសម្រាំងយ៉ាងពិសេស ដើម្បីឲ្យអ្នកទស្សនាកាន់តែកន្ត្រាក់អារម្មណ៍ ក្នុងពេលដែលសប្ដាហ៍នេះគឺជាសប្ដាហ៍ដែលតម្រូវឲ្យអ្នកមានឈ្មោះក្នុងការប្រកួតជ្រើសរើសជើងឯកទាំង១៦រូប ប្រកួតជម្រុះយក៨នាក់ចុងក្រោយ ដើម្បីបន្តយកអ្នកឈ្នះ៨នាក់ទៅប្រកួតយក៤នាក់ នៅជុំទី២ ។
លោក សេង កដិកា អ្នករៀបចំការប្រកួតបញ្ជាក់ថា សមាសភាពខាងកម្ពុជាសម្រាប់ការ ប្រកួតជាមួយថៃ លោកជឿជាក់ខ្លាំងលើកីឡាករ ឡុង ឡា ដោយសារតែគេគឺជាជើងខ្លាំង ហើយបើទោះជាគេទើបតែឡើងកូដ ប៉ុន្តែសមត្ថភាពគេល្អ ។ លោកសម្រេចដាក់ឲ្យប្រកួតជាលក្ខៈអន្តរជាតិ ដោយសារតែកីឡាកររូបនេះមានសមត្ថភាពខ្លាំងក្នុងរយៈពេលចុងក្រោយនេះ និងទទួលបានការចាប់អារម្មណ៍នៅក្នុងវិស័យប្រដាល់ ។
ជាមួយនឹងវត្តមានរបស់កីឡាករថៃ ហ្វានិមិត្ត លោកចង់ផ្ដល់ឱកាសឲ្យ ឡុង ឡា ដោយសារតែអ្នកទាំងពីរសុទ្ធតែជាជើងខ្លាំងដូចគ្នា បើទោះជាអ្នកគាំទ្រភាគច្រើនថាកីឡាករកម្ពុជាអាចនឹងពិបាកទប់ជាមួយកីឡាករថៃ ព្រោះគេជាជើងថ្មីក្តី ។ លោកបានកំណត់ឲ្យកីឡាករកម្ពុជាហ្វឹកហាត់ជាប់លាប់មិនតិចជាង១សប្ដាហ៍ទេមុនពេលផ្គូផ្គង ទើបលោកយល់ថាសមត្ថភាពរបស់កីឡាករកម្ពុជារូបនេះគ្រប់គ្រាន់សម្រាប់ឲ្យស្ថានីយទូរទស្សន៍ប៉ុស្តិ៍លេខ៥ដាក់ឲ្យប្រកួតជាលក្ខណៈអន្តរជាតិ នៅថ្ងៃសៅរ៍នេះ ។
លោក សេង កដិកា ថ្លែងថា កីឡាករកម្ពុជានិងថៃ សុទ្ធតែត្រូវបានអះអាងថាមានការត្រៀមខ្លួនច្បាស់លាស់ ដោយសារតែភាគីម្ខាងៗចង់ឈ្នះការប្រកួតរៀងៗខ្លួន និងមិនចង់បាត់បង់ក្រេឌីតក្រោយពេលប៉ះគ្នា ។ សម្រាប់គូនេះ មានការចាប់អារម្មណ៍ភាគច្រើន ដោយរំពឹងថានឹងមានអ្នកស្នេហាវិស័យប្រដាល់ជក់ចិត្ត និងចង់ដឹងពីបទពិសោធន៍អ្នកទាំងពីរនៅពេលប៉ះគ្នា ។
លោក សេង កដិកា បន្តថា ជំនួបជាលក្ខណៈអន្តរជាតិដែលបានធ្វើឡើងនៅសង្វៀនស្ថានីយទូរទស្សន៍ប៉ុស្តិ៍លេខ៥ មិនមែនសុទ្ធតែរន្ថើនព្រឹត្តិការណ៍ជើងឯកឲ្យអ្នកទស្សនាកាន់តែមានអារម្មណ៍កញ្ជ្រោលនោះទេ ប៉ុន្តែសម្រាប់ជំនួបរវាងកីឡាករទាំង២ លោកជឿជាក់ថានឹងកក្រើក
ដោយសារកីឡាករថៃលោកស្គាល់ថ្វីដៃច្បាស់ហើយថាមិនធម្មតា ហើយសម្រាប់កីឡាករកម្ពុជា
ក៏ល្អស្ថិតក្នុងទំនុកចិត្តលោក តាំងពីមុនផ្គូផ្គង ៕ (កែសម្រួលដោយ ៖ បុប្ផា)
ចែករំលែកព័តមាននេះ