ខេត្តកណ្ដាល ៖ កូនស្រីឃើញឪពុកមានអាការៈដកដង្ហើមដង្ហក់ លុះ២០នាទីក្រោយមកស្រាប់តែឪពុកលែងដឹងខ្លួន នាងរត់ហៅគេឱ្យមកជួយមើល ទើបដឹងថាឪពុកស្លាប់បាត់ទៅហើយ ។
ហេតុការណ៍ខាងលើនេះបង្កឱ្យមានការភ្ញាក់ផ្អើលកាលពីវេលាម៉ោង១២និង២០នាទីយប់រំលងអធ្រាត្រឈានចូលថ្ងៃទី១៣ កញ្ញា ឆ្នាំ២០១៩ នៅចំណុចបន្ទប់ស្នាក់នៅក្នុងកាស៊ីណូម្កុដពេជ្រ ស្ថិតក្នុងភូមិក្អមសំណរក្រោម ឃុំក្អមសំណរ ស្រុកលើកដែក ខេត្តកណ្តាល។
ជនរងគ្រោះដែលស្លាប់ឈ្មោផន ប៊ុនធី ភេទប្រុស អាយុ៤៧ឆ្នាំ មុខរបរជាងអគ្គិសនី ស្នាក់នៅជាមួយកូនស្រីម្នាក់ឈ្មោះម៉ុល ថៃណា អាយុ១២ឆ្នាំ ក្នុងកាស៊ីណូម្កុដពេជ្រខាងលើ និងមានទីលំនៅភូមិព្រែកឈ្មោះ ឃុំព្រែករៃ ស្រុកល្វាឯម ខេត្តកណ្តាល។ ចំណែកប្រពន្ធរបស់ជនរងគ្រោះឈ្មោះពៅ សុខខេង អាយុ៤៧ឆ្នាំ មុខរបរកសិករ។
តាមរបាយការណ៍របស់សមត្ថកិច្ចបានឱ្យដឹងថា មុនពេលកើតហេតុ កាលពីវេលាម៉ោង២០និង៣០នាទីយប់ថ្ងៃទី១២ កញ្ញា ជនរងគ្រោះបានជិះម៉ូតូចេញទៅមុខកាស៊ីណូម្កុដពេជ្រ ដើម្បីចាំទទួលកូនស្រីចេញពីរៀន ក្រោយពីទទួលកូនរួចហើយក៏បានយកសម្ភារទុកក្នុងបន្ទប់ស្នាក់នៅ បន្ទាប់មកក៏បាននាំកូនស្រីទៅហូបអាហានៅផ្ទះបាយក្នុងកាស៊ីណូ ដោយពីរនាក់ឪពុកនិងកូនហូបមីឆា ។
តាមប្រភពដដែលបានបន្តថា លុះហូបរួចហើយ នៅម៉ោងប្រហែល៩និង៣០នាទីយប់ថ្ងៃទី១២ កញ្ញា ជនរងគ្រោះបាននាំកូនមកបន្ទប់គេង ចំណែកកូនស្រីបានអង្គុយរៀនរហូតដល់ម៉ោងប្រហែលជា១១យប់ថ្ងៃទី១២ កញ្ញា កូនស្រីបានឃើញឪពុកមានអាការៈដកដង្ហើមដង្ហក់ ពេលនោះកូនស្រីក៏បានជួយរឹតទ្រូង និងច្របាច់ធ្វើចលនាឲ្យឪពុក ដោយបានសួរឪពុកថា «យកប្រេងកូឡាលាបអត់ប៉ា?» តែជនរងគ្រោះជាឪពុកពុំបានឆ្លើយតបទេ គ្រាន់តែគ្រវីក្បាល ។
តាមប្រភពដដែលបានបន្តទៀតថា លុះប្រហែលជា២០នាទីក្រោយមក ដោយឃើញឪពុកលេងដឹងខ្លួន កូនស្រីក៏បានរត់ទៅហៅមេកាកាស៊ីណូឈ្មោះកុយ ថន ភេទប្រុស អាយុ៥២ឆ្នាំ ឲ្យមកជួយមើលឪពុករបស់ខ្លួន ពេលដែលមេការបានមកដល់ និងស្ទាបមើល ព្រមទាំងពិនិត្យដង្ហើមរបស់ជនរងគ្រោះ ឃើញថា មិនមានដង្ហើមនោះទេ ទើបបុរសជាមេការបានរាយការណ៍ប្រាប់សមត្ថកិច្ចនគរបាលស្រុកឱ្យចុះមកពិនិត្យតែម្តង ។
បន្ទាប់ពីទទួលបានព័ត៌មានខាងលើភ្លាម សមត្ថកិច្ចជំនាញខេត្តបានចុះពិនិត្យកន្លែងកើតហេតុ ដោយមានសមាសភាពចូលរួមដូចជាកម្លាំងពិនិត្យវិភាគខេត្ត, គ្រូពេទ្យខេត្ត, នគរបាលព្រហ្មទណ្ឌ និងផ្នែកពិនិត្យវិភាគ, កម្លាំងប៉ុស្តិ៍នគរបាលរដ្ឋបាលក្អមសំណរ និងក្រុមប្រឹក្សាឃុំមេភូមិ បានធ្វើការពិនិត្យសពជនរងគ្រោះ រកមិនឃើញមានស្លាកស្នាមអ្វីគួរឱ្យកត់សម្គាល់នោះទេ ។
ក្រោយពេលពិនិត្យសពរួច ទើបលោកគ្រូពេទ្យនិងក្រុមពិនិត្យវិភាគធ្វើការសន្និដ្ឋានថា ជនរងគ្រោះបានស្លាប់ដោយសារគាំងបេះដូង ហើយក៏ប្រគល់សពឲ្យក្រុមគ្រួសារដើម្បីយកទៅធ្វើបុណ្យតាមប្រពៃណី ៕ (កែសម្រួលដោយ ៖ ធីតា)
ចែករំលែកព័តមាននេះ