រាជធានីភ្នំពេញ ៖ ក្រោយការព្យាបាលជំងឺអស់ជាច្រើនថ្ងៃមកនេះ នៅទីបំផុត នាយ ក្រិន ត្រូវបានក្រុមគ្រូពេទ្យអនុញ្ញាតឲ្យចេញពីមន្ទីរពេទ្យត្រឡប់ទៅផ្ទះវិញហើយ បន្ទាប់ពីអាការៈជំងឺរបស់លោកបានធូរស្បើយ និងកាន់តែភាពល្អប្រសើរឡើង ។…
រាជធានីភ្នំពេញ ៖ ក្រោយការព្យាបាលជំងឺអស់ជាច្រើនថ្ងៃមកនេះ នៅទីបំផុត នាយ ក្រិន ត្រូវបានក្រុមគ្រូពេទ្យអនុញ្ញាតឲ្យចេញពីមន្ទីរពេទ្យត្រឡប់ទៅផ្ទះវិញហើយ បន្ទាប់ពីអាការៈជំងឺរបស់លោកបានធូរស្បើយ និងកាន់តែភាពល្អប្រសើរឡើង ។
បើយោងតាមការប្រកាសពីអ្នកនាង ប្រិមប្រិយ ដែលជាអ្នកមើលថែទាំផ្ទាល់នាយ ក្រិន នោះ បានបញ្ជាក់តាមបណ្តាញសង្គម នៅថ្ងៃទី២៥ ខែមីនា នេះថា ព្រឹកនេះ បងក្រិនត្រូវបានលោកគ្រូពេទ្យអោយត្រឡប់ទៅផ្ទះវិញហើយ ។
ដំណឹងពីការជាសះស្បើយ និងអាចវិលត្រឡប់ទៅកាន់គេហដ្ឋានពីសំណាក់ នាយ ក្រិន នាពេលនេះ បានធ្វើឲ្យមហាជន ជាពិសេស បណ្តាអ្នកគាំទ្ររូបលោកជាច្រើនសម្តែងការត្រេកអរ និងជូនពរលោកឲ្យមានសុខភាពល្អប្រសើរផងដែរ ។
យ៉ាងណា ទន្ទឹមនឹងអាចវិលត្រឡប់ទៅផ្ទះសម្បែង និងជួបជុំក្រុមគ្រួសារនាពេលនេះ នាយ ក្រិន ក៏បានបង្ហាញអារម្មណ៍ស្រងេះស្រងោចយ៉ាងខ្លាំង ដ្បិតការវិលត្រឡប់ពីការព្យាបាលជំងឺលោកនាពេលនេះ គឺមិនអាចឃើញមុខឪពុករបស់លោកទៀតឡើយ ដោយសារឪពុកបានលាកចាកលោកទៅហើយ ។
តាមរយៈវីដេអូខ្លីមួយដែលបង្ហោះលើបណ្តាញសង្គមតារាកំប្លែងមាឌតូចល្អិតនាយ ក្រិន បានលើកឡើងថា នៅពេលដែលក្រុមគ្រូពេទ្យបានអនុញ្ញាតឲ្យលោកវិលត្រឡប់ទៅផ្ទះវិញនោះ លោកពិតជាមានអារម្មណ៍ស្រស់ស្រាយចិត្ត ដោយលោកបានទៅជួប និងមើលថែកូន ហើយនឹងបងប្អូនរបស់លោកទាំងអស់ផងដែរ ។
ទោះជាយ៉ាងណា លោកបញ្ជាក់ថា លោកមានអារម្មណ៍ស្រងេះស្រងោចមួយក្នុងចិត្ត ព្រោះរាល់ដង នៅពេលដែលលោកមកពីខេត្តដល់ផ្ទះលោកតែងតែជួបមុខៗកូន បងប្អូន ជាពិសេស គឺឪពុករបស់លោក ប៉ុន្តែឥឡូវលោកឪពុកក៏បានទទួលមរណភាពទៅហើយ ។
គួរបញ្ជាក់ថា តារាកំប្លែងនាយ ក្រិន ត្រូវបានក្រុមគ្រួសារនាំមកពិនិត្យ និងព្យាបាលនៅក្នុងមន្ទីរពេទ្យ បន្ទាប់ពីលោកបានធ្លាក់ខ្លួនឈឺដោយសាររលាកត្រចៀក ហើយរាលដាលប៉ះពាល់ដល់ប្រព័ន្ធប្រសាទ ជាហេតុធ្វើអោយរូបលោកវង្វេងលែងដឹងខ្លួនតែម្តង ។
ដំណឹងនេះ ត្រូវបានចែករំលែកឲ្យដឹងពីតារាសម្តែងលោក សាវីន ហ្វីលីព ដែលបានបង្ហោះលើបណ្តាញសង្គម កាលពីថ្ងៃទី១០ ខែមីនា ឆ្នាំ២០២៦ ខណៈពេលដែលលោកក៏ត្រូវបានក្រុមគ្រួសារបញ្ជូនមកសម្រាកព្យាបាលនៅក្នុងមន្ទីរពេទ្យកាល់ម៉ែត ។
អាការៈរបស់នាយ ក្រិន គឺមានលក្ខណៈធ្ងន់ធ្ងរ ដោយវង្វេងលែងស្គាល់អ្នកណាទាំងអស់ ហើយមេរោគបានឡើងពេញឈាម ដោយសារនាយរលាកប្រអប់ត្រចៀកខាងឆ្វេង ធ្វើឲ្យមេរោគឡើងពេញខួរក្បាល ។
ដោយសារស្ថានភាពនេះ នាយ ក្រិន គឺតម្រូវឲ្យប្រើថ្នាំដែលធ្ងន់ និងថ្លៃដែលអាចមួយថ្ងៃចំណាយប្រមាណជាង១០០ដុល្លារ ។
ទោះជាយ៉ាងណាក៏ដោយ អំឡុងពេលសម្រាកព្យបាលជំងឺក្នុងមន្ទីរពេទ្យ នាយ ក្រិន ត្រូវបានក្រុមហ៊ុនភេសជ្ជៈមួយធានានៅក្នុងការចេញថ្លៃព្យាបាលទាំងស្រុង ហើយជាពិសេសថែមទៀតនោះ សម្តេចតេជោ ប្រធានព្រឹទ្ធសភាក៏បានផ្តល់វត្តមានដ៏ខ្ពង់ខ្ពស់អញ្ជើញសួរសុខសទុក្ខ នាយ ក្រិន ដល់មន្ទីរពេទ្យផងដែរ ។
ទន្ទឹមនឹងការអញ្ជើញចុះសួរសុខទុក្ខដោយផ្ទាល់នោះ សម្តេចតេជោ បានប្រគល់ការងារឲ្យអ្នកនាងប្រិមប្រិយទៅជួយរៀបចំកូននាយក្រិនទាំង៣នាក់នៅបាត់ដំបងឲ្យបានចូលរៀនឡើងវិញ ក្រោយនាយក្រិនចេញពីមន្ទីរពេទ្យ ៕
ចែករំលែកព័តមាននេះ