រាជធានីភ្នំពេញ៖ បន្ទាប់ពីបានចំណាយពេលជាង២ម៉ោងនៅព្រឹកថ្ងៃទី២៤ មីនា ២០១៤នោះរួចមក ទីបំផុតទៅក្រុមការងារគណៈកម្មការចម្រុះរវាងគណបក្សប្រជាជនកម្ពុជា ( CPP ) និង គណបក្សសង្គ្រោះជាតិ ( CNRP ) មិនបានចេញសេចក្តីប្រកាសរួម ពោលគឺការពិភាក្សាបានខ្វែងគំនិតគ្នានៅលើប្រធានបទដែលត្រូវលើកយកមកជជែក ។
បើតាមអ្នកឆ្លើយឆ្លងព័ត៌មានកោះសន្តិភាពបានបញ្ជាក់ឲ្យដឹងទៀតថា បន្ទាប់ពីជជែកគ្នាមិនត្រូវ ភាគីទំាងពីរបានចេញមកធ្វើធ្វើសន្និសីទកាសែតដាច់ដោយឡែកពីគ្នានោះថែមទៀត ។
លោក សុន ឆ័យ ប្រធានក្រុមការងារខាងគណបក្សសង្គ្រោះជាតិ បានមានប្រសាសន៏បា្រប់ក្រុមអ្នកកាសែតថា គណបក្សសង្គ្រោះជាតិចង់ឲ្យមានការពិភាក្សាទៅលើការកែទម្រង់ការបោះឆ្នោត ជាពិសេសការដាក់ស្ថាប័នគណៈកម្មាធិការជាតិរៀបចំការបោះឆ្នោត ( គ,ជ,ប) ទៅក្នុងស្ថាប័នរដ្ឋធម្មនុញ្ញ ប៉ុន្តែខាងគណបក្សប្រជាជនមិនព្រឹម ។
បើតាមលោក សុន ឆ័យ ការជជែករវាងក្រុមការងារនៃគណបក្សទំាងពីរគួរតែបញ្ចប់ការជួបគ្នាក្នុងរយៈពេលមួយសបា្តហ៏ម្តង ព្រោះមិនអាចឈានទៅរកការបញ្ចប់វិបត្តិនយោបាយនោះទេ មានតែថ្នាក់ដឹកនំាកំពូលគណបក្សទំាងពីរត្រូវជួបគ្នាទើបអាចសម្រេចបាន ។
យ៉ាងណាក៏ដោយ ភ្លាមៗបន្ទាប់ពីលោក សុន ឆ័យ បានបញ្ចប់ការថ្លែងបា្រប់អ្នកកាសែត លោកឧបនាយករដ្ឋមន្រ្តី ប៊ិន ឈិន ប្រធានក្រុមការងារខាង CPP បានឡើងបញ្ជាក់ឆ្លើយតបថា ខាងគណបក្សប្រជាជនកម្ពុជា មិនមែនបដិសេធទៅការពិភាក្សាអំពីកំណែទម្រង់ការបោះឆ្នោតនោះទេ ពោលគឺ CPP ចង់ឲ្យមានការដាក់បញ្ចូលនូវអ្វីដែលយើងបានព្រមព្រៀងគ្នាទំាង១៤ចំណុច ទៅក្នុងសិក្ខាសាលាថ្នាក់ជាតិជាមុន ដើម្បីឲ្យមានការចូលរួមមតិយោបល់ពីគ្រប់មជ្ឈដ្ឋានជាតិ ។
លោក ប៊ិន ឈិន បានបញ្ចាក់ថា CPP គោរពជានិច្ចទៅតាមសេចក្តីប្រកាសរួមរវាងថ្នាក់ដឹកនំាកំពូលនៃគណបក្សទំាងពីរកាលពីថ្ងៃទី១៨ កុម្ភៈ ២០១៤ ។
គេនៅមិនទាន់ដឹងថា តើក្រុមការងារនៃគណបក្សទំាងពីរដែលទទួលបានអាសនៈសភាក្នុងនីតិកាលទី៥នេះ នឹងបន្តជួបគ្នាជាថ្មីនៅពេលណានោះទេ ៕
ចែករំលែកព័តមាននេះ