(រាជធានីភ្នំពេញ)៖ ថ្នាក់ដឹកនាំក្រសួងពាណិជ្ជកម្មកម្ពុជាថ្មីៗនេះបានស្នើនិងជម្រុញឲ្យក្រុមប្រឹក្សាធុរកិច្ចអាស៊ាន-អាមេរិកឲ្យមានតំណាងនៅកម្ពុជាដើម្បីជួយជំរុញសកម្មភាពធុរកិច្ចក៏ដូចជាកិច្ចសហប្រតិបត្តិការរវាងប្រទេសទាំងពីរ។
ការស្នើឡើងនេះគឺត្រូវបានធ្វើឡើងនូវឯកិច្ចប្រជុំទ្វេភាគីមួយរវាងលោក ប៉ាន សូរស័ក្តិ រដ្ឋមន្ត្រីពាណិជ្ជកម្មជាមួយក្រុមប្រឹក្សាធុរកិច្ចអាស៊ាន-អាមេរិកទីក្រុងបាងកក ប្រទេសថៃ នាឱកាសដែលលោកបានដឹកនាំគណៈប្រតិភូកម្ពុជាចូលរួមកិច្ចប្រជុំរដ្ឋមន្ត្រីសេដ្ឋកិច្ចអាស៊ាន លើកទី៥១ និងកិច្ចប្រជុំពាក់ព័ន្ធនៅ ចាប់ពីថ្ងៃទី ៥-១០ ខែកញ្ញាឆ្នាំ២០១៩ ។
លោករដ្ឋមន្ត្រី បានស្វាគមន៍យ៉ាងកក់ក្តៅចំពោះគណៈប្រតិភូក្រុមប្រឹក្សាធុរកិច្ចអាស៊ាន-អាមេរិក ដឹកនាំដោយឯកអគ្គរដ្ឋទូត Michael Michalak អនុប្រធានជាន់ខ្ពស់ក្រុមប្រឹក្សាធុរកិច្ចអាស៊ាន-អាមេរិក និងបានជម្រាបពីការប្តេជ្ញាចិត្តរបស់រាជរដ្ឋាភិបាលកម្ពុជាក្នុងការជំរុញពាណិជ្ជកម្ម វិនិយោគ និងបរិយាកាសធុរកិច្ច នៅកម្ពុជា។ ក្នុងកិច្ចប្រជុំនេះផងដែរ ឯកឧត្តមរដ្ឋមន្ត្រីបានផ្តល់អនុសាសន៍ដល់ក្រុមប្រឹក្សាធុរកិច្ចអាស៊ាន-អាមេរិកឲ្យមានតំណាងនៅកម្ពុជាដើម្បីជួយជំរុញសកម្មភាពធុរកិច្ចក៏ដូចជាកិច្ចសហប្រតិបត្តិការរវាងប្រទេសទាំងពីរ។
កិច្ចប្រជុំនោះក៏បានពិភាក្សាអំពីផែនការរបស់ប្រទេសកម្ពុជាក្នុងការកែលម្អហេដ្ឋារចនាសម្ព័ន្ធការតភ្ជាប់ អភិបាលកិច្ចល្អ និងការអភិវឌ្ឍធនធានមនុស្ស សេដ្ឋកិច្ចឌីជីថល ពាណិជ្ជកម្មអេឡិចត្រូនិក និងការអភិវឌ្ឍសហគ្រាសធុនតូច និងមធ្យមផងដែរ។
យ៉ាងណាមិញ នៅក្នុងកិច្ចប្រជុំទ្វេភាគីជាមួយរុស្ស៊ីដាច់ដោយឡែកមួយទៀតនោះ
រដ្ឋមន្ត្រីក្រសួងពាណិជ្ជកម្មកម្ពុជាបានជម្រាបជូនគណៈប្រតិភូរុស្ស៊ីអំពីបរិយាកាសវិនិយោគ និងលក្ខខណ្ឌអនុគ្រោះជាច្រើនសម្រាប់ការវិនិយោគរបស់ក្រុមហ៊ុនបរទេសនៅកម្ពុជា។ ភាគីទាំងពីរក៏បានពិភាក្សាលើវិស័យសក្តានុពលសម្រាប់កិច្ចសហប្រតិបត្តិការពាណិជ្ជកម្ម និងការវិនិយោគ ក៏ដូចជាការត្រៀមរៀបចំសម្រាប់ដំណើរទស្សនកិច្ចផ្លូវការរបស់មន្ត្រីជាន់ខ្ពស់កម្ពុជានាខែតុលា ដែលផ្តោតសំខាន់លើការវិនិយោគក៏ដូចជាការចូលជាសមាជិកលើកិច្ចព្រមព្រៀងពាណិជ្ជកម្ម EAEU ។
សម្រាប់លទ្ធផលសំខាន់មួយក្នុងចំណោមលទ្ធផលសំខាន់ៗដែលសម្រេចបាននៅកិច្ចប្រជុំរដ្ឋមន្ត្រីសេដ្ឋកិច្ចអាស៊ាន លើកទី៥១ និងកិច្ចប្រជុំពាក់ព័ន្ធនោះ គឺលទ្ធផលនៃកិច្ចប្រជុំថ្នាក់រដ្ឋមន្ត្រីលើកទី៧ ស្តីពីកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់កិច្ចប្រជុំ។ កិច្ចប្រជុំនេះបានត្រួតពិនិត្យលើវឌ្ឍនភាពនៃការចរចាបន្ទាប់ពីអន្តរកិច្ចប្រជុំរដ្ឋមន្ត្រីអាសិប (RCEP) លើកទី៨ នៅទីក្រុងប៉េកាំងកន្លងទៅ និងបានពិភាក្សាលើទិសដៅផែនការបញ្ចប់ការចរចាកិច្ចព្រមព្រៀងអាសិបនៅក្នុងឆ្នាំ២០១៩នេះ តាមអាណត្តិផ្តល់ឲ្យដោយប្រមុខដឹកនាំនៃប្រទេសចរចាអាសិបទាំង១៦។
«រដ្ឋមន្ត្រីអាសិបទាំងអស់ បានឯកភាពលើផែនការការងារចរចា និងកំណត់គោលដៅបញ្ចប់ការចរចាលើបញ្ហាបច្ចេកទេសទាំងលើអត្ថបទ និងការបើកច្រកទីផ្សារនៅកិច្ចប្រជុំនៅដាណាង សាធារណរដ្ឋសង្គមនិយមវៀតណាម ដើម្បីដាក់ជូនប្រមុខដឹកនាំកំពូលនៃប្រទេសទាំង១៦ ប្រកាសអំពីការបញ្ចប់ការចរចាជាផ្លូវការនៅខែវិច្ឆិកា ឆ្នាំ២០១៩ ស្របគ្នានឹងកិច្ចប្រជុំកំពូលអាស៊ាន លើកទី៣៥» ។ នេះបើយោងតាមប្រកាសព័ត៌មានលើហ្វេសប៊ុកផេករបស់ក្រសួងពាណិជ្ជកម្មចុះថ្ងៃទី ១១ ខែកញ្ញា ឆ្នាំ២០១៩ ៕ កែសម្រួលដោយ ៖សុឃាក់
ចែករំលែកព័តមាននេះ