រាជធានីភ្នំពេញ ៖ នៅក្នុងកិច្ចប្រជុំកំពូលអាស៊ាន-អង្គការសហប្រជាជាតិលើកទី ១៥ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានអះអាងជាថ្មីនូវការប្តេជ្ញាចិត្តយ៉ាងមុតមាំរបស់កម្ពុជាចំពោះសន្តិភាព ពហុភាគីនិយម…
រាជធានីភ្នំពេញ ៖ នៅក្នុងកិច្ចប្រជុំកំពូលអាស៊ាន-អង្គការសហប្រជាជាតិលើកទី ១៥ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានអះអាងជាថ្មីនូវការប្តេជ្ញាចិត្តយ៉ាងមុតមាំរបស់កម្ពុជាចំពោះសន្តិភាព ពហុភាគីនិយម និងគោលការណ៍នានានៃធម្មនុញអង្គការសហប្រជាជាតិ ។
យោងតាមសេចក្តីប្រកាសព័ត៌មាន ក្រសួងការបរទេស និងសហប្រតិបត្តិការអន្តរជាតិ បានឱ្យដឹងថា នៅថ្ងៃទី ២៧ ខែតុលា ឆ្នាំ ២០២៥ នាទីក្រុងគូឡាឡាំពួ ប្រទេសម៉ាឡេស៊ី នៅក្នុងកិច្ចប្រជុំកំពូលអាស៊ាន-អង្គការសហប្រជាជាតិលើកទី ១៥ ថ្នាក់ដឹកនាំអាស៊ាន និងអង្គការសហប្រជាជាតិ បានអះអាងជាថ្មីនូវការប្ដេជ្ញាចិត្តក្នុងការពង្រឹងភាពជាដៃគូគ្រប់ជ្រុងជ្រោយ ក្រោមផែនការសកម្មភាពសម្រាប់ការអនុវត្តសេចក្ដីប្រកាសរួមស្តីពីភាពជាដៃគូគ្រប់ជ្រុងជ្រោយអាស៊ាន-អង្គការសហប្រជាជាតិ (ឆ្នាំ ២០២៦-២០៣០) ដែលទើបបានអនុម័តនាពេលថ្មីនេះ ។ កិច្ចប្រជុំកំពូលបានគូសបញ្ជាក់ពីកិច្ចខិតខំប្រឹងប្រែងរួមគ្នា ក្នុងការបន្សំគ្នារវាងផែនការសកម្មភាពនេះទៅនឹងទស្សនវិស័យអាស៊ានឆ្នាំ ២០៤៥ និងរបៀបវារៈស្តីពីការការអភិវឌ្ឍប្រកបដោយចីរភាពឆ្នាំ ២០៣០ របស់ អង្គការសហប្រជាជាតិ ។
សម្តេចបវរធិបតីនាយករដ្ឋមន្ត្រី បានអះអាងជាថ្មីនូវការប្តេជ្ញាចិត្តយ៉ាងមុតមាំរបស់កម្ពុជាចំពោះសន្តិភាព ពហុភាគីនិយម និងគោលការណ៍នានានៃធម្មនុញអង្គការសហប្រជាជាតិ ។ សម្ដេចធិបតីបានគូសបញ្ជាក់ថា ពុំមានប្រទេសណាមួយមានលទ្ធភាពប្រឈមមុខនឹងបញ្ហាដ៏ស្មុគស្មាញនាពេលបច្ចុប្បន្នតែម្នាក់ឯងនោះទ និងបានអំពាវនាវឱ្យប្រកាន់យកនូវស្មារតីទំនួលខុសត្រូវរួម ក្នុងការលើកកម្ពស់នូវតួនាទីស្នូលរបស់អង្គការសហប្រជាជាតិ ក្នុងការកសាងពិភពលោកឱ្យមានសន្តិភាព ស្ថិរភាព និងយុត្តិធម៌ កាន់តែប្រសើរ ។
សម្តេចបវរធិបតី បានសង្កត់ធ្ងន់ថា អាស៊ានស្ថិតក្នុងចំណោមតំបន់ដែលមានកំណើតយ៉ាងឆាប់រហ័សរបស់សកលលោក ។ ប៉ុន្មានឆ្នាំចុងក្រោយនេះ អាស៊ានបានខិតខំកាន់តែខ្លាំងមិនត្រឹមតែដើម្បីសម្រេចបាននូវកំណើនដ៏ឆាប់រហ័សប៉ុណ្ណោះទេ ប៉ុន្តែថែមទាំងធានាបានថា កំណើននេះគឺប្រកបដោយចីរភាព បរិយាបន្ន និងរឹងមាំ ។ អាទិភាពទាំងអស់នេះបានឆ្លុះបញ្ចាំងយ៉ាងច្បាស់នៅក្នុងឯកសារចក្ខុវិស័យអាស៊ានឆ្នាំ ២០៤៥ ៖ អនាគតរួមគ្នាដែលបានដាក់ចេញនូវទិសដៅសម្រាប់កិច្ចខិតខំរួមគ្នារបស់អាស៊ាន ឆ្ពោះទៅសម្រេចបានជាតំបន់មួយដែលប្រកបដោយព័ណ៌បៃតង ចីរភាព និងសមភាព កាន់តែល្អប្រសើរជាងមុន ៕
ចែករំលែកព័តមាននេះ